ბაზისბანკი, განათლების მხარდამჭერი პროექტების ფარგლებში, მე-11 წელია სულხან-საბა ორბელიანის უნივერსიტეტის წარმატებულ სტუდენტებს სახელობით სტიპენდიას გადასცემს. სტიპენდიები ყოველ სემესტრში გაიცემა საბაუნის ბიზნესისა და ტექნოლოგიების ფაკულტეტის სტუდენტებზე.ბაზისბანკის სასტიპენდიო პროგრამის მიზანია მაღალი აკადემიური მოსწრების მქონე სტუდენტების მხარდაჭერა და წახალისება, რომლებიც ამავდროულად ჩართულნი არიან კურიკულუმსგარე აქტივობებში.საბაუნის ბიზნესისა და ტექნოლოგიების ფაკულტეტის საბაკალავრო და სამაგისტრო პროგრამები ერთ-ერთი ყველაზე მოთხოვნადია ქართულ აკადემიურ სივრცეში. ბაზისბანკთან მრავალწლიანი თანამშრომლობა და ბანკის მიერ დაწესებული სასტიპენდიო პროგრამა კი, განსაკუთრებული შესაძლებლობაა საბაუნის სტუდენტების მოტივაციის ამაღლებისა და აკადემიური მოსწრების გასაუმჯობესებლად, რაც თავის მხრივ, ყოველწლიურ შედეგებშიც აისახება.„ბაზისბანკისა და სულხან-საბა ორბელიანის უნივერსიტეტს შორის თანამშრომლობა მე-11 წელია გრძელდება. აქტიურად ვართ ჩართული ახალგაზრდა თაობის განათლების მხარდაჭერის პროექტებში და ყოველწლიურად გავცემთ სტიპენდიებს წარჩინებულ სტუდენტებზე. ასევე, ვთანამშრომლობთ საქართველოს სხვადასხვა საშუალო და უმაღლეს სასწავლებელთან და მნიშვნელოვან კონტრიბუციას ვახორციელებთ მომავალი თაობის განათლებისა და წახალისების მიმართულებით. სულხან-საბა ორბელიანის უნივერსიტეტსა და ბაზისბანკის მრავალწლიანი თანამშრომლობის შედეგად, სტიპენდიები უკვე ასობით სტუდენტზე გვაქვს გაცემული“, - ბაზისბანკის სტრატეგიული კომუნიკაციების დეპარტამენტის უფროსი, თამარ ხადური.

საბერძნეთის მთავრობა უცხოელ ტურისტებს, რომლებიც გასულ ზაფხულს მასშტაბური ტყის ხანძრების გამო იძულებული გახდნენ, კუნძული დაეტოვებინათ, წელს უფასო დასვენებას სთავაზობს. ინფორმაციას The Guardian ავრცელებს.25,000-მდე დაზარალებული დამსვენებლისთვის, რომელთა შორის უმეტესობა ბრიტანელია, კომპენსაციები უკვე გაიცემა. ტურიზმის ადგილობრივი ოფიციალური პირების თქმით, ეს მსოფლიოში პირველი პრეცედენტია.ცნობისთვის: 2023 წლის ზაფხულში, ტურისტული სეზონის პიკის დროს ტყის მასშტაბურმა ხანძრებმა საბერძნეთის კუნძული, როდოსი მოიცვა. ხელისუფლებამ კუნძულის ისტორიაში ყველაზე დიდი ევაკუაცია გამოაცხადა, რის გამოც ბევრი ტურისტი იძულებული გახდა, შვებულება შეეწყვიტა. პროგრამის ფარგლებში, როდოსის სასტუმროებში გაჩერებული ტურისტები, საიდანაც ხანძრის გამო მათი ევაკუაცია მოხდა, ერთკვირიანი საცხოვრებელი ხარჯის დასაფარად 500 ევრომდე ღირებულების ელექტროვაუჩერის გადაცვლას შეძლებენ. ინიციატივა ორ ეტაპად, კერძოდ, მიმდინარე თვიდან 31 მაისამდე და 1 ოქტომბრიდან 15 ნოემბრის ჩათვლით განხორციელდება.როდოსის ტურიზმის ოფიციალური პირების ცნობით, ინიციატივამ დიდი გამოხმაურება გამოიწვია და პროგრამაში უკვე 5,000-ზე მეტი დამსვენებელი დარეგისტრირდა.კუნძულის ოტელიერთა პროფკავშირის ხელმძღვანელი, იანის პაპავასილიუ აცხადებს, რომ კომპენსაცია ასახავს თანხას, რომელიც მომხმარებლებმა ტუროპერატორებს თავდაპირველად გადაუხადეს და ის 300-დან 500 ევრომდე ვარირებს. მისი თქმით, ეს მხოლოდ სასტუმროებს მოიცავს და Airbnb-ის ტიპის კერძო განსახლებებს არ ეხება.წელს საბერძნეთის ხელისუფლებამ ტურიზმთან დაკავშირებით რამდენიმე მნიშვნელოვანი გადაწყვეტილება მიიღო. კერძოდ, იანვარში ცნობილი გახდა, რომ მთავრობამ კლიმატის ცვლილებებთან საბრძოლველად ტურისტებისთვის ახალი გადასახადი შემოიღო. ტურისტებს საცხოვრებელ ადგილებზე დამატებითი გადასახადის გადახდა მოუწევთ. თუმცა ახალ სისტემას მხოლოდ სეზონის პიკზე, მარტიდან ოქტომბრამდე იყენებენ, ხოლო გადასახადის ოდენობა განსახლების ოფიციალური რეიტინგის მიხედვით დღე-ღამეში 1-დან 4 ევრომდე ვარირებს.ამასთან, წელს საბერძნეთში პლაჟის წესები გამკაცრდა. კერძოდ, ერთ-ერთი ცვლილებით, საბერძნეთის პლაჟების 70% შეზლონგებისგან გათავისუფლდება, რომ პლაჟები არ გადაიტვირთოს და დასვენება უფრო კომფორტული გახდეს. ასევე, შეზლონგებსა და სანაპირო ზოლს შორის, მინიმუმ, ოთხმეტრიანი დისტანცია დაწესდა, რომ ადამიანებს წყალთან მისვლა გაუადვილდეთ.

ბრიტანულმა გამოცემა Which? Travel-მა თბილისი და საქართველო მაისში დასვენებისთვის წამყვან ექვს მიმართულებას შორის შეიყვანა.გამოცემამ სეირნობის, ტაძრების დათვალიერებისა და ღვინის დეგუსტაციის მხრივ მაისის საუკეთესო დასასვენებელი ადგილები დიდ ბრიტანეთში, ევროპასა და მის ფარგლებს გარეთ შეარჩია.Which? Travel ტურისტებს ურჩევს, საქართველოში მაისში იმოგზაურონ, როცა ტემეპერატურა, მაქსიმუმ, 23°C გრადუსია, რომ თავიდან აიცილონ ზაფხულის სიცხე, განსაკუთრებით, თუ ისინი დაბლობების მონახულებას აპირებენ. „დედაქალაქ თბილისის ხეობის დრამატული გარემო და ფერადი ძველი ქალაქი, თავისი ქვაფენილიანი ქუჩებითა და გუმბათის ფორმის აბანოებით, აუცილებლად გაგაოცებთ.... ევროპასა და აზიას შორის მოქცეული საქართველო მოგზაურთა სურვილების სიაში თანდათან იკვეთება და ეს შემთხვევითი არაა: იქ თქვენ დიდებულ მთები, ბორცვებზე აღმართული მონასტრები, მდიდარი კერძები და სასმელები გელით... კულინარიული მაჩვენებლებია ხაჭაპური (ოვალური ფორმის პიცა ზემოდან ყველითა და კვერცხით) და ხინკალი (ბულიონით სავსე დამპლინგი). ნებისმიერი მათგანი შეუხამეთ უგემრიელესი ჭიქა წითელ ღვინოს. საქართველო მსოფლიოში ერთ-ერთი უძველესი ღვინის მწარმოებელი ქვეყანაა, სადაც 500-ზე მეტი ადგილობრივი ვაზის ჯიშია,“ - წერს Which? Travel.მაისში მოსანახულებლად Which? Travel-ის საუკეთესო ექვსეულია:🔵 ტბის უბანი - დიდი ბრიტანეთი (13°C)🔵 შამპანი - საფრანგეთი (18°C)🔵 სიცილია - იტალია (21°C)🔵 მემფისი - აშშ (27°C)🔵 თბილისი - საქართველო (23°C)🔵 ბალი - ინდონეზია (30°C)გამოცემის ცნობით, საქართველოში დასვენების რეკომენდაციას პროვაიდერები, Trailfinders-ი და Exodus Adventure Travels-ი იძლევიან.

არქიტექტორებისა და ინჟინერ-მშენებლების სერტიფიცირების ამოქმედება მესამედ, 2025 წლის 1-ელ დეკემბრამდე გადავადდა. მთავრობის შესაბამისი დადგენილება საკანონმდებლო მაცნეზე გამოქვეყნდა.დადგენილების თანახმად, მშენებლობის ნებართვის მისაღებად წარდგენილი არქიტექტურული და კონსტრუქციული პროექტები სერტიფიცირებული არქიტექტორის ან ინჟინერ-მშენებლის მიერ უნდა იყოს დამოწმებული. ამასთანავე, აღნიშნულ პროექტებზე ექსპერტიზა სერტიფიცირებულმა ექსპერტმა უნდა განახორციელოს.გარდა ამისა, დადგენილების თანახმად, სამშენებლო სამუშაოების განხორციელებისთვის პასუხისმგებელ პირად განისაზღვრება სერტიფიცირებული ინჟინერ-მშენებელი. რაც შეეხება სერტიფიკატის გაცემის წესს, დადგენილების მიხედვით, სასერტიფიკატო გამოცდის წარმატებით ჩაბარების შემთხვევაში, დოკუმენტს აკრედიტებული სერტიფიკაციის ორგანო გასცემს. სერტიფიკატის მოქმედების ვადა კი 5 წელი იქნება.შეგახსენებთ, რომ სამშენებლო კოდექსით გათვალისწინებული არქიტექტორებისა და ინჟინერ-მშენებლების სერტიფიცირება უნდა ამოქმედებულიყო 2022 წლის 1-ელი ოქტომბრიდან, აღნიშნული ვადა მოგვიანებით 2024 წლის 1-ელ მარტამდე გადაიდო. როგორც უკვე აღვნიშნეთ, ბოლოს განხორციელებული ცვლილებების შედეგად, ამოქმედების პერიოდი 2025 წლის 1-ელ დეკემბრამდე გადავადდა.

ბოლო დღეებში სოციალურ ქსელ „ფეისბუქში“ აქტიურად ვრცელდება ინფორმაცია სოციალური ქსელის ცვლილების შესახებ, თითქოს მას მომხმარებლების პირადი ინფორმაციის (ფოტოების, მიმოწერის, პოსტების) გამოყენება შეეძლება.აღნიშნულ ინფორმაციას არასანდოს და ცრუს უწოდებს კიბერ სტრატეგიის კონსულტანტი – მკვლევარი ანდრო გოცირიძე, რომელიც მასთან დაკავშირებით ვრცელ პოსტს აქვეყნებს. მას უცვლელად გთავაზობთ:„ცრუ კამპანია ფბ საფრთხის შესახებ‼️ მეგობრებო, ახლა შესაძლოა ამის დრო არ არის, მაგრამ ბევრი თქვენგანი აზიარებს პოსტს, თითქოსდა ფეისბუკი ხვალიდან თქვენს სურათებს გამოიყენებს etc; ეს ინფორმაცია არ არის სიმართლე, არაფერი არ მოხდება.არ ვიცი რას ემსახურება ეს კამპანია, მაგრამ ახალი არ გახლავთ, წლებია გამოჩნდება ხოლმე. საფრთხეს არ შეიცავს, დაკოპირებას გთხოვთ, შესაძლოა, რამე ალგორითმს ტესტავდეს ინიციატორი ან კავშირებს იკვლევდეს ვინმე. მოკლედ, დაჟინებული მზერის არ იყოს, მარტო კოპირებით საფრთხე არ დადგება, დანარჩენი სტანდარტულად: ბმულზე არ გადავდივართ, უცხო ფაილს ან ვიდეოს არ ვხსნით.რაც შეეხება ფბ-ს და სურათებს, ის მათ ისედაც გამოიყენებს, ამიტომ პიკანტურ ფოტოს, რომელიც არ გინდათ სხვმ ნახოს, რომელიც დაემუქრება თქვენს სამსახურებრივ ან პირად რეპუტაციას, რომელიც გასცემს ინფორმაციას ადგილსამყოფელის შესახებ ნუ გამოაქვეყნებთ.განსაკუთრებით მოერიდეთ მაღალი გარჩევადობის ფოტოს გამოქვეყნებას -ის შესაძლოა გამოყენებულ იქნას მიყურადებისთვის ხელოვნური ინტელექტის ან ჭკვიანი კამერის მეშვეობით, ასევე დიპფეიკის ტექნოლოგიით თქვენი კომპრომეტაციისთვის. (სხვის ტანს თქვენი თავი მიებმება, თქვენ მოძრაობებს "ვასწავლი" და მერე გვიწევს მტკიცება, ჟირაფი რომ არ ვართ.ხო, რუსულ კანონს რომ მივაბა, ამას ვასწავლიდით ხოლმე დასავლური გრანტებით ფონდების მეშვეობით ჩვენ ბავშვებს, მასწავლებლებს, მეწარმეებს, ჟურნალისტებს, რეგიონის ორგანიზაციებს, ხოდა უცხო ქვეყნის ინტერესია ეს?“ - წერს ანდრო გოცირიძე.

„ბიზნეს-ლოგიკით და ჩვეულებრივი საქართველოს მოქალაქის ლოგიკით, ჩემთვის გაუგებარია რას ემსახურება „რუსული კანონის“ ხელახლა დაინიციირება“, - ამის შესახებ „კომერსანტთან“ საუბრისას ბიზნესმენმა თემურ ჭყონიამ განაცხადა.  მისი თქმით, „ამ თემის გარშემო აღარ უნდა გრძელდებოდეს დებატები, საუბრები, აღარ უნდა იყოს ჯიბრი, რომ მაინც და მაინც უნდა მივიღოთ ეს კანონი იმიტომ, რომ კანონი მიუღებელია ქართველი მოსახლეობისთვის, ევროპელი პოლიტიკოსებისთვის, რომელთაც ჩვენ მეგობრებს ვეძახით და მეგობრობას გაფრთხილება, მხარდაჭერა, აზრის გაზიარება და გათავისება სჭირდება“. „კომერსანტი“ თემურ ჭყონიას „უცხოური გავლენის გამჭვირვალობის შესახებ“ კანონპროექტის ხელახლა დაინიცირების და ამ კანონის საჭიროების შესახებ ესაუბრა.ბატონო თემურ, როგორ აფასებთ ერთი წლის შემდეგ, ე.წ. რუსული კანონის კვლავ დაინიცირებას?თემურ ჭყონია, ბიზნესმენი: თემა არის შემდეგი - კანონს ჰქვია „რუსული“. საზოგადოებამ, საქართველოს მოსახლეობამ, რომლის სიტყვა, ჩემი აზრით, გადამწყვეტი უნდა იყოს ყველა პოლიტიკოსისთვის, კანონს „რუსული კანონი“ დაარქვა. რამდენიც არ უნდა ეცადოს პოლიტიკური ელიტა, ამ სახელის ცვლილებას, ეს შეუძლებელია. იმიტომ, რომ საზოგადოებაში და მოსახლეობის უდიდეს ნაწილში მას „რუსული კანონი“ ჰქვია. რუსული აგრესიიდან, დაპყრობილი ტერიტორიებიდან, ომიდან, რუსეთში არსებული აგრესიული შიდა პოლიტიკიდან, გამომდინარე ის ქვეყნები, რომლებმაც უნდა მოგვცენ ევროპის წევრობის გახდომის შესაძლებლობა, და ყველა ლიდერი და პოლიტიკური მოღვაწე ამ კანონს ეწინააღმდეგება. ყველა პოლიტიკოსი, რომელიც ჩართულია საქართველოს პოლიტიკურ და ეკონომიკურ ცხოვრებაში გვეუბნება, რომ ეს კანონი მათთვის მიუღებელია. ე.ი. არავინ და არაფერი დარჩა ამ კანონის მხარდამჭერი. აქედან გამომდინარე, უკვე ამ თემის გარშემო აღარ უნდა გრძელდებოდეს დებატები, საუბრები, აღარ უნდა იყოს ჯიბრი, რომ მაინც და მაინც უნდა მივიღოთ ეს კანონი იმიტომ, რომ კანონი მიუღებელია ქართველი მოსახლეობისთვის, ევროპელი პოლიტიკოსებისთვის, რომელთაც ჩვენ მეგობრებს ვეძახით. მეგობრობას კი გაფრთხილება, მხარდაჭერა, აზრის გაზიარება და გათავისება სჭირდება.ევროპის წევრობა ნიშნავს იმ კანონმდებლობით ცხოვრებას, რაც ევროპაში არსებობს. რატომ ვცდილობთ ევროპაში გაწევრიანებას? რა არის ჩვენი მიზანი? მარტო ის, რომ ვიზის გარეშე ვიაროთ ევროპაში? ევროპაში გაწევრიანება ნიშნავს ევროპული იდენტობის, ევროპის ფინანსების, ევროპის კულტურის ინტეგრირებას საქართველოს კულტურასთან და ფინანსებთან. აქ ჩვენ არავინ არაფერს გვართმევს, პირიქით - შეიძლება ჩვენთან ურთიერთობა უფრო დიდი შენაძენი იყოს ევროპისთვის, ვიდრე ევროპა ჩვენთვის. მე რასაც ვსაუბრობ იმდენად ცხადია, რომ მერიდება კიდეც ამ თემაზე საუბარი. ამ თემაზე საუბარი დაბალი დონეცაა.მაშინ რას ემსახურება მთავრობის მხრიდან კანონის ხელახლა დაინიცირება და ასეთი დაჟინება, რომ „უცხოური გავლენის გამჭვირვალობის შესახებ“ კანონი მიიღონ?ბიზნეს-ლოგიკით და ჩვეულებრივი საქართველოს მოქალაქის ლოგიკით, ჩემთვის გაუგებარია რას ემსახურება „რუსული კანონის“ ხელახლა დაინიცირება. ვერ ვიგებ, რა საჭიროა ეს თემა.მაგრამ ამ თემას აქვს დადებითი მხარეც. ამ ყველაფერმა გამოიღო ძალიან დიდი დადებით შედეგი. დავინახე ის, რასაც მთელი ჩემი შეგნებული ცხოვრება ველოდებოდი. დავინახე ახალგაზრდები, რომლებიც საინტერესოდ საუბრობენ, რომლებსაც საინტერესო ლოგიკა, საინტერესო ჭკუა და თავისი სამშობლოს დიდი ერთგულება აქვთ. დიდი მადლობა „რუსულ კანონს“, რომ ამდენი თანამედროვე ახალგაზრდა გამოაჩინა საქართველოს მომავალი მმართველობის ასპარეზზე.