საქართველოს ეროვნულმა ბანკმა ვალუტის ახალი კურსი დაადგინა. 16 აპრილის ვაჭრობის შედეგად აშშ დოლარი გამყარდა და 2.6710 ლარი გახდა. კურსი, რომელიც დღეს მოქმედებდა, 2.6699 ლარი იყო.გაუფასურდა ევრო, რომლის კურსი 2.8387 ლარია. დღეს მოქმედი კურსი 2.8450 ლარს შეადგენს.თურქული ლირა გაუფასურდა, რომლის ღირებულებაც 0.0822 ლარია.დღევანდელი ვაჭრობის შედეგად მიღებული კურსი 17 აპრილს შევა ძალაში.

საქართველოში ლურჯი მოცვის იმპორტი მცირედით, 0.2%-ით გაიზარდა. საქსტატის მიერ „ბიზნესპრენიუსისთვის“ მოწოდებული ინფორმაციის თანახმად, 2024 წლის იანვარ-თებერვალში საქართველოში იმპორტირებულია 177.6 ათასი დოლარის 15.7 ტონა მოცვი, ხოლო გასული წლის იმავე პერიოდში 177.3 ათასი დოლარის 15.3 ტონა.აღსანიშნავია ისიც, რომ საქართველოში მოცვის იმპორტიორი ქვეყანა ძირითადად ნიდერლანდებია. რაც შეეხება ფასს, 2024 წლის პირველ ორ თვეში 1კგ ლურჯი მოცვის იმპორტი ქვეყანას 11.3 დოლარი დაუჯდა (კურსით 30.3 ლარი), ხოლო გასული წლის იმავე პერიოდში 11.6 დოლარი. აღნიშნული მონაცემები აჩვენებს, რომ საიმპორტო ფასი 2.6%-ით შემცირდა.„ბიზნესპრენსნიუსი“ დაინტერესდა, რა ღირს სუპერმარკეტებში იმპორტირებული ლურჯი მოცვი. სხვადასხვა სუპერმარკეტში 1კგ-ს ფასი ძირითადად 80 ლარის ფარგლებში მერყეობს. მონაცემები აჩვენებს, რომ მარკეტებში 1 კგ იმპორტული ლურჯი მოცვი 164%-იანი ფასნამატით იყიდება.

ძმები ფხაკაძეების კომპანია იპოდრომის მიმდებარედ 7 ცათამბჯენის მშენებლობას გეგმავს, რომელთა მაქსიმალური სართულიანობა 79 იქნება. ბიძინა ივანიშვილის მიერ დაფუძნებულმა „ქართუ ფონდმა” იპოდრომთან, თამარაშვილის ქუჩაზე არსებული 80 145 მ²-ის უძრავი ქონების გაყიდვის გარიგება გასული წლის ბოლოს „ცენტრალ პარკ ავენიუსთან“ გააფორმა, რომელიც ბიზნესმენ ფხაკაძეების კომპანიაა.„ცენტრალ პარკ ავენიუსმა“ მუნიციპალური სერვისების განვითარების სააგენტოს, განაშენიანების რეგულირების გეგმის გეგმარებითი დავალების განხილვის შესახებ 12 აპრილს მიმართა და პასუხს სავარაუდოდ ორ კვირაში მიიღებს.როგორც პროექტიდან ირკვევა, კომპანია მრავალფუნქციური და მრავალბინიანი კომპლექსის მშენებლობას გეგმავს. საპროექტო ტერიტორია იყოფა 2 ნაწილად, პირველ მიწის ნაკვეთზე განთავსდება სავაჭრო, საოფისე და საცხოვრებელი შენობები, რომელთა მაქსიმალური სიმაღლე 25 სართული იქნება, ხოლო მეორეზე ნაკვეთი უმეტესად განვითარდება სავაჭრო, დასასვენებელი, გასართობი, სპორტული და საცხოვრებელი ფუნქციებით, სადაც შენობების მაქსიმალური სიმაღლე 79 სართული იქნება.„წარმოდგენილი საპროექტო წინადადება, კარგი მაგალითია საჯარო და კერძო ინტერესების ბალანსის. ასევე დაგეგმილი, სავაჭრო, საოფისე, კომერციული, სპორტული და გასართობი ცენტრები ქმნის ახალ მომსახურების ცენტრებს და სამუშაო ადგილებს, ხელს უწყობს, როგორც ადგილობრივი ისე საერთაშორისო ინვესტიციების მოზიდვასა და ეკონომიკურ ზრდას.ამასთანავე, უნდა აღინიშნოს რომ წარმოდგენილი განაშენიანება ცენტრალურ პარკთან ხელს შეუწყობს სამეზობლო კომუნის ჩამოყალიბება-გაძლიერებას.შენობის კონცეფცია მორგებულია, როგორც ფეხმავლის, ისე ავტომობილის კომფორტულ გადაადგილებაზე. დაგეგმილია კანონით მოთხოვნილი პარკირების რაოდენობაზე ორჯერ მეტი, 5 500 ავტოსადგომის მოწყობა, რომელიც მოემსახურება როგორც ადგილობრივ მცხოვრებელს, ისე მოსულ სტუმარს. საპროექტო გადაწყვეტით ტერიტორია იყოფა 2 ნაწილად, N1 მიწის ნაკვეთზე განთავსდება სავაჭრო, საოფისე და საცხოვრებელი შენობები, ხოლო N2 ნაკვეთი უმეტესად განვითარდება სავაჭრო, დასასვენებელი, გასართობი, სპორტული და საცხოვრებელი ფუნქციებით“, - ნათქვამია განმარტებით ბარათში.შპს „ცენტრალ პარკ ავენიუ“ 2023 წლის 22 სექტემბერს არის დაფუძნებული, კომპანიის დირექტორია ვასილ ფხაკაძე. ბიზნესრეესტრის თანახმად, „ცენტრალ პარკ ავენიუს“ მესაკუთრეა შპს „იდეა“, რომელიც სოსო ფხაკაძის, ლევან ფხაკაძისა და ვასილ ფხაკაძის საერთო კომპანიაა.ცნობისთვის, 2023 წლის აგვისტოში ამ უძრავი ქონებაზე საკუთრების უფლების წინასწარი რეგისტრაცია განახორციელა ყოფილი დეპუტატის, მარიკა ვერულაშვილის კომპანია „ნეო სითი დეველოპმენტმა“, თუმცა 2023 წლის 16 ოქტომბერს გარიგება შებრუნდა და ქონების მესაკუთრედ კვლავ „ქართუ ფონდი“ დარეგისტრირდა, აქედან ორ კვირაში კი ტერიტორიას ახალი მყიდველი გამოუჩნდა.

ბელარუსის რესპუბლიკის სტანდარტიზაციის სახელმწიფო კომიტეტმა აკრძალა ცნობილი თურქული ბრენდის ზოგიერთი საბავშვო ტანსაცმლის გაყიდვა. ის სახიფათო პროდუქტების რეესტრში იქნა შეტანილი - ამის შესახებ იუწყება БЕЛТА იუწყება. „გოსსტანდარტმა“გამოავლინა დარღვევები LC Waikiki-ის ბრენდის ბავშვთა ტანსაცმელში. კერძოდ, უსაფრთხოების მაჩვენებლები დაირღვა კომპლექტების - ქუდების, ბოდეების, ახალშობილთა სპეცტანსაცმლის, ასევე რამდენიმე ტიპის პერანგის წარმოებაში სკოლამდელი და სკოლის მოსწავლეებისთვის.უწყების განმარტებით ახალშობილთა ტანსაცმელში დამაკავშირებელი ნაკერები გაკეთებული იყო არასწორ (შიდა) მხარეს (უნდა იყოს გარე ზედაპირზე), სკოლამდელი ასაკისა და სკოლის მოსწავლეებისთვის შექმნილ სამოსში კი ჰიგიროსკოპიულობისა და ჰაერის გამტარიანობის მაჩვენებლები არ იყო დაცული.გარდა ამისა, ამ ბრენდის სასკოლო ჩანთები სახიფათო პროდუქტების სიაში მოხვდა. მათ აკლდათ ამრეკლავი ელემენტები წინა, გვერდითი ზედაპირებსა და ზედა ნაწილზე.პროდუქციის გაყიდვა ბელარუსში 18 აპრილიდან აიკრძალება. 

საქართველოს ბანკი, ბიზნესების გაძლიერებასა და ხელშეწყობას აქტიურ რეჟიმში განაგრძობს. ამჯერად, ბანკის ფინანსური მხარდაჭერით, ოტო მოტორსი წეროვანში სასაწყობე სივრცეს აშენებს.პროექტის ჯამური ღირებულება 10 მილიონი ლარია, საქართველოს ბანკის მიერ განხორციელებული ინვესტიცია 7 მილიონ  ლარს შეადგენს.ოტო მოტორსი 2008 წლიდან ოპერირებს და ის საავტომობილო პროდუქციის იმპორტს 20-ზე მეტი ქვეყნიდან ახდენს. კომპანია ქართულ ბაზარზე 100-ზე მეტი საერთაშორისო ბრენდით არის წარმოდგენილი და სრულად ფარავს ავტომობილის მოვლა-შეკეთებისთვის საჭირო ნებისმიერ მოთხოვნას, იქნება ეს ნაწილი თუ დანადგარები, რაც ხელს უწყობს ბაზარზე არსებული სხვადასხვა სეგმენტური საჭიროების დაკმაყოფილებას.აღნიშნული პროექტი წეროვანში, 9,000 კვ.მ მიწის ფართობზე, 8000 კვ.მ სასაწყობე სივრცის აშენებას და მოწყობას გულისხმობს, რომელიც სასაწყობო სივრცესა და სხვადასხვა პროდუქციის შოურუმს გააერთიანებს. ის ულტრათანამედროვე ინვენტარით იქნება აღჭურვილი. ამჟამად ოტო მოტორსსა და მის შვილობილ კომპანიებში 200-ზე მეტი ადამიანი არის დასაქმებული. 2024 წლის ბოლომდე კომპანია ამ რიცხვის გაორმაგებას გეგმავს.„ოტო მოტორსი წლებია ბაზარზე წარმატებულად ოპერირებს. ამ წლების განმავლობაში განვითარებული სადისტრიბუციო ქსელი კი დღეს უკვე მთელ საქართველოს ფარავს. ჩვენ მუდმივად ვცდილობთ განვითარდეთ და ჩვენს მომხმარებლებს სიახლეები შევთავაზოთ. ჩვენი პარტნიორი საქართველოს ბანკის ხელშეწყობით, წეროვანში 9000 კვადრატულ მეტრზე სასაწყობე სივრცის აშენება უკვე დაწყებულია და წლის ბოლომდე დასრულებას ვგეგმავთ. შენობა აღჭურვილი იქნება ულტრათანამედროვე ინვენტარით და ის შშმ პირებისთვის სრულად იქნება ადაპტირებული.  პროექტის მიზანია, ცენტრალიზებული გახადოს ოტო მოტორსის საბითუმო გაყიდვები და მასთან დაკავშირებული ნებისმიერი ბიზნესოპერაცია, რაც საშუალებას მოგვცემს, ბაზარზე ზრდის უწყვეტი ტემპი შევინარჩუნოთ. გარდა ამისა, მიმდინარე წელს არაერთ სიახლე იგეგმება, მათ შორის, რამდენიმე ახალი ფილიალის გახსნა. ჩვენთვის განსაკუთრებით საამაყოა, რომ უახლოეს მომავალში, ოტო მოტორსი  ერთ-ერთი ცნობილი სპეცტექნიკის მწარმოებელი ბრენდის წარმომადგენელი გახდება საქართველოში. მნიშვნელოვანი სიახლეები გვექნება მომხმარებელთა ლოიალურობის მიმართულებითაც და ბაზარზე ახალ პროდუქტს წარვადგენთ, რომლის მიზანი  მომხმარებლებისთვის ხარისხიანი მომსახურების მიწოდება და ავტომობილის მოვლა-შეკეთების ხარჯების დაზოგვა იქნება“, - განაცხადა თამუნა ბაქრაძემ, ოტო მოტორსის საოპერაციო დირექტორმა.„საქართველოს ბანკისთვის ბიზნესის ხელშეწყობა და განვითარება წლებია უცვლელი პრიორიტეტია და მიგვაჩნია, რომ ჩვენს პარტნიორ ბიზნესებთან ერთად, საქართველოს ეკონომიკისთვის ერთ - ერთ მნიშვნელოვან კონტრიბუტორებს წარმოვადგენთ. მოხარულები ვართ, რომ ჩვენი მხარდაჭერით, ოტო მოტორსი კიდევ უფრო მეტად ფართოვდება და ახალ სასაწყობე სივრცეს აშენებს. ეს კომპანიას ბაზარზე კონკურენტული უპირატესობის მოპოვების შესაძლებლობას მისცემს. მსგავსი პროექტების განხორციელება, განსაკუთრებით რეგიონებში,ძალიან მნიშვნელოვანია, რადგან დამატებით სამუშაო ადგილები იქმნება. კომპანია სამომავლოდ რამდენიმე ახალი ფილიალის გახსნას და ახალი ბრენდების შემოყვანას გეგმავს. გვინდა წარმატებები ვუსურვოთ გუნდს, ჩვენ კი არ ვჩერდებით დააქტიურ რეჟიმში განვაგრძობთ ბიზნესის მხარდაჭერას და გაძლიერებას“, - განაცხადა საქართველოს ბანკის კორპორაციული გაყიდვების სექტორის უფროსმა, გიორგი წეროძემ 

საქართველოში ზღვის ფსკერზე ღვინის დაძველების პროცესი 2020 წლიდან დაიწყო. აღნიშნულ პროექტს სათავეში "საქართველოს წყალქვეშა ცურვის ასოციაციის" თავმჯდომარე დავით ნიკოლეიშვილი მეგობართან ერთად ჩაუდგა.როგორც მან „ბიზნესპრესნიუსთან“ ისაუბრა, ძირითადი პრობლემა მათთვის ტერიტორიის არქონაა და ეს პრობლემა ჯერ ისევ ვერ მოაგვარეს, რადგან ტურიზმის დეპარტამენტისგან ან ეკონომიკის სამინისტროსგან შესაბამისი რეაგირება, მათი ბევრი მცდელობის მიუხედავად, არ აქვთ.დავით ნიკოლეიშვილის თქმით, სამი ლოკაცია აქვს შერჩეული, რომელმაც უკვე უძლიერეს შტორმსაც კი გაუძლო, მაგრამ ფსკერზე ბევრი ბოთლის ჩატანას ვერ რისკავს, რადგან ზარალის ალბათობა დიდია. „ერთ-ერთმა კომპანიამ 5 000 ბოთლის დაძველება მთხოვა, მაგრამ ეს საკმაოდ დიდი რაოდენობაა, მაგრამ როდესაც ტერიტორია არ მაქვს და შესაბამისად, შემოსაზღვრულიც არ მაქვს ადგილი, ვერ გავრისკავ, რადგან ზარალის რისკი მაღალია“, - განაცხადა დავით ნიკოლეიშვილმა.„ამ ეტაპზე მარტო ვმუშაობთ ამ პროექტზე, ბოლო დროს „ხარება“ ჩაერთო, 140 ბოთლი გამომიყო დასაძველებლად. ასევე რუმინეთის საზღვაო ინსტიტუტმა შემომთავაზა მათთან გადასვლა ან ფრანშიზის მიყიდვა, რაც მე არ შემიძლია, რადგან ეს კიდევ სხვა წესებს მოითხოვს, ბიზნესი უნდა მქონდეს, გაყიდვები უნდა მქონდეს აქტიურად, რაც ჯერ მე არ მაქვს.რამდენიმე ბოთლი გავგზავნე რუსეთში, ყაზახეთში, ბრიტანეთში, საიდანაც დიდი დაინტერესება წამოვიდა, მაგრამ მე ამდენი ღვინო არ მაქვს, ჩემი ღვინო არ მაქვს, უნდა ავიღო კერძო მწარმოებლებისგან, ამასთან, დარწმუნებული უნდა ვიყო, რომ ღვინო კარგია, რადგან ყველანაირს იქ ვერ ჩავდებ“ - აცხადებს ნიკოლეიშვილი.რაც შეეხება ზღვის ფსკერზე დაძველებული ღვინის ფასს, პროექტის ავტორის თქმით, 4 თვის დაძველებით ღვინის ფასი 100-150 ლარია, თუმცა ამ ეტაპზე გაყიდვების მხრივ დიდი შედეგები ჯერ არ აქვთ. დავით ნიკოლეიშვილის თქმით, აუქციონზე 1-ლიტრიანი „რქაწითელი“ 500 ლარადაც გაუყიდია. ინტერესს ძირითადად უცხოელები გამოხატავენ.„ხარებას“ ღვინოები, რომლებიც ჯერ ისევ ფსკერზეა და 1-წლიანი დაძველება ზაფხულში შეუსრულდებათ, დიდი ალბათობით, მათსავე მარნებსა და მაღაზიებში გაიყიდება“ - აცხადებს დავით ნიკოლეიშვილი.