• Ƀ/$

ჩინეთიდან ევროპაში "შუა დერეფნის" გავლით საკონტეინერო გადაზიდვები 573%-ით გაიზარდა

21 მაისი 13:33 | ეკონომიკა

ეკონომიკის სამინისტროში ჩინეთ-საქართველოს შორის სატრანზიტო და სატრანსპორტო თანამშრომლობის საკითხები განიხილეს.

შეხვედრას ეკონომიკის სამინისტროს,  „საქართველოს რკინიგზისა“  და ჩინეთის სახალხო რესპუბლიკის დელეგაციის წარმომადგენლები, მათ შორის ქ. ლიენიუნგანგის მერი და ლიენიუნგანგის პორტის სამეთვალყურეო საბჭოს თავჯდომარე ესწრებოდნენ.


შეხვედრაზე მხარეებმა ისაუბრეს „შუა დერეფნის“ განვითარების კუთხით არსებულ მიღწევებზე და  ხაზი გაუსვეს  აღნიშნულ დერეფანში საკონტეინერო  გადაზიდვების მზარდ დინამიკას. შეხვედრის მონაწილეებმა ასევე განიხილეს არსებული გამოწვევები და მათი გადაჭრის გზები.


მხარეებმა განსაკუთრებული ყურადღება დაუთმეს „შუა დერეფანში“  სუბსიდიების გავრცელების საკითხს. კერძოდ, სტამბულის მიმართულების გარდა, ქართულმა მხარემ დააყენა ლიენიუნგანგიდან საქართველოს პორტების გავლით ევროპის მიმართულებით გადასაზიდ კონტეინერებზე სუბსიდიების დაწესების საკითხი. საუბარი ასევე შეეხო ლიენიუნგანგის პორტის გავლით სატრანზიტო გადაზიდვებზე  (იაპონია, კორეა) სუბსიდიების გამოყოფას.


ლიენიუნგანგის პორტის ხელმძღვანელობამ კიდევ ერთხელ გაუსვა ხაზი „შუა დერეფანს,“ როგორც ჩინეთისა და ევროპის დამაკავშირებელ მათთვის პრიორიტეტულ მარშრუტს. მათ გამოთქვეს სურვილი, რომ  უფრო აქტიურად ითანამშრომლონ ქართულ მხარესთან  ხსენებული დერეფნის განვითარებისა და ტვირთნაკადების გაზრდის მიზნით.


შეხვედრაზე საქართველოს მხარემ  ჩინეთის დელეგაციას ასევე მიაწოდა ინფორმაცია ტრანსპორტის სფეროში მიმდინარე მნიშვნელოვან ღონისძიებებზე, პროექტებზე და  სამომავლო გეგმებზე.  არსებული სტატისტიკით, „შუა დერეფნის“ გავლით უშუალოდ ჩინეთიდან ევროპაში საკონტეინერო (TEU) გადაზიდვები 2017 წელს 50%-ით, ხოლო 2018 წელს 573%-ით არის გაზრდილი.


მსგავს თემაზე:

ჩინეთი საქართველოს ე.წ. „შუა დერეფნის“ განვითარებაში დაეხმარება


ანაკლიის ღრმაწყლოვანი პორტი „შუა დერეფნის“ წევრი გახდა


მსოფლიოს სამმა უდიდესმა პორტმა 2016 წელს 2 მლრდ ტონაზე მეტი ტვირთი გადაამუშავა


ჩინეთში თავის ტვინის ოპერაცია 5G ინტერნეტით 3000 კმ-ს მანძილიდან ჩატარდა



სხვა სიახლეები