• Ƀ/$

საქართველოში გატარებული რეფორმები მსოფლიო ბანკმა დადებითად შეაფასა

2 ივლისი 16:15 | ეკონომიკა

„ძალიან შთამბეჭდავია იმ რეფორმების პროგრამა, რომელსაც საქართველო ბოლო რამდენიმე წლის განმავლობაში ახორციელებს,“ -  განაცხადა მსოფლიო ბანკის ახალმა რეგიონულმა დირექტორმა სებასტიან მოლინესმა ივანე მაჭავარიანთან შეხვედრაზე.

ივანე მაჭავარიანმა სტუმარს ახალ პოზიციაზე მუშაობის დაწყება მიულოცა და მადლობა გადაუხადა მსოფლიო ბანკს ეფექტიანი და პროდუქტიული თანამშრომლობისთვის.


ყურადღება გამახვილდა ინფრასტრუქტურის მიმართულებით მსოფლიო ბანკის დაფინანსებით მიმდინარე პროექტებზე, ასევე, განიხილეს ადამიანური კაპიტალის განვითარებისა და განათლების კუთხით საქართველოს მთავრობის მიერ დაგეგმილი რეფორმები.


აღინიშნა, რომ რამდენიმე დღის წინ 90 მილიონი ევროს ოდენობის ხელმოწერილი ხელშეკრულება „ინოვაციების, ინკლუზიური განათლებისა და ხარისხის“ პროექტის განსახორციელებლად ხელს შეუწყობს რეფორმის წარმატებით განხორციელებას.  აღნიშნული პროექტი სრულ შესაბამისობაში მოდის მსოფლიო ბანკის საქართველოსთან თანამშრომლობის 2019-2022 წლების სტრატეგიასთან და დაეხმარება საქართველოს მთავრობას 2018– 2023 წლების განათლების რეფორმის განხორციელებაში.


შეხვედრაზე პოზიტიურად შეფასდა რეფორმების პროცესში საქართველოს მიერ მიღწეული პროგრესი და გამოითქვა იმედი, რომ თანამშრომლობა მსოფლიო ბანკსა და საქართველოს მთავრობას შორის სამომავლოდ კიდევ უფრო გაღრმავდება.


მსოფლიო ბანკი საქართველოში მიმდინარე რეფორმების აქტიური მხარდამჭერია. 25-წლიანი თანამშრომლობის განმავლობაში,მსოფლიო ბანკის ჯგუფმა ქვეყანაში, დაახლოებით, 4.3 მლრდ აშშ დოლარის მოცულობის ინვესტიცია განახორციელა.


მსგავს თემაზე:

მსოფლიო ბანკი საქართველოს განათლების სისტემისთვის 90 მილიონ ევროს გამოყოფს


მსოფლიო ბანკი: „წყლის ენერგია უფრო სუფთა და უფრო იაფია“



სხვა სიახლეები