• Ƀ/$

„თიბისი კაპიტალის“ კვლევის მიხედვით 2023 წლამდე ელექტროენერგიაზე მოთხოვნა 16.1 მლრდ კვტ/სთ-მდე გაიზრდება

30 ივლისი 19:12 | ეკონომიკა

„თიბისი კაპიტალის“ მიერ საქართველოს ელექტროენერგიის სექტორის შესახებ კვლევის მიხედვით ელექტროენერგიაზე მოთხოვნის ზრდა ბოლო 6 წლის განმავლობაში აჭარბებს გამომუშავების ზრდას.

კვლევის პრეზენტაციას ეკონომიკის მინისტრის მოადგილე დავით თვალაბეიშვილიც დაესწრო.


კვლევაში გაანალიზებულია ელექტროენერგიის სექტორი 2019 წლის მდგომარეობით. პრეზენტაციას საქართველოს მთავრობის, ენერგეტიკული სექტორისა და თიბისის ბანკის კლიენტები დაესწრნენ.


„ენერგეტიკა საქართველოს ეკონომიკის განვითარების ერთერთი საფუძველია. ამდენად, მისი სწორად დაგეგმვა ძალიან მნიშვნელოვანია. აღნიშნული საშუალებას მოგვცემს, მომავალი 10-წლეულების განმავლობაში განვავითაროთ ჩვენი ენერგეტიკა და ეკონომიკა. კვლევის შედეგები დაგვეხმარება, დავხვეწოთ ჩვენი გეგმები და სტრატეგია,“ - განაცხადა მინისტრის მოადგილემ. კვლევის მიხედვით ელექტროენერგიაზე მოთხოვნის ზრდა ბოლო 6 წლის განმავლობაში აჭარბებს გამომუშავების ზრდას.


„დღეს საქართველოს ენერგეტიკა მნიშვნელოვანი გზაგასაყარის წინაშე დგას. ცვლილებები ბევრი მიმართულებით ხორციელდება. უახლოეს თვეებში ჩვენ გვექნება ახალი კანონი ენერგეტიკის შესახებ, რომელიც მნიშვნელოვნად შეცვლის სათამაშო მოედანს ენერგეტიკის სფეროში და ბაზარზე ახალ მოთამაშეებს შემოიყვანს. ჩვენი ამოცანაა, ბაზარზე გაიზარდოს კონკურენცია და გამჭვირვალობა აღნიშნულ სექტორში. ჩამოყალიბდება ელექტრონული ბირჟა, სადაც ივაჭრებენ ბაზრის მოთამაშეები - გენერაციის კომპანიები, ტრეიდერები, მომხმარებლები. ეს ყველაფერი განხორციელდება ეტაპობრივად, 2021 წლიდან ჩვენ ნაბიჯ-ნაბიჯ წავალთ ამ მიმართულებით,“ - განაცხადა ენერგეტიკის მინისტრის მოადგილემ.


დავით თვალაბეიშვილმა ასევე გაამახვილა ყურადღება სხვა კანონპროექტებზეც, რომლებიც მნიშვნელოვნად შეცვლიან საქართველოს ენერგეტიკულ სექტორს. ასეთ პროექტებს შორის მან დაასახელა კანონპროექტები „ენერგოეფექტურობის“ და „განახლებადი ენერგიის შესახებ“ და სხვ. „ჩვენ მხარში ვუდგავართ ისეთ პროექტებს, როგორიცაა ჰიდროელექტროსადგურები. ჩვენ ყველაფერს ვაკეთებთ, რათა მომავალი 10 წლის განმავლობაში ელექტროენერგიის იმპორტსა და გარე ფაქტორებზე არ ვიყოთ დამოკიდებული,“ - განაცხადა დავით თვალაბეიშვილმა.


თიბისი კაპიტალის მოლოდინით, მიმდინარე და დაგეგმილი ჰიდროსადგურების პროექტების დასრულების ფონზე, 2023 წლისათვის საქართველოში დადგმული სიმძლავრე 600 მგვტ-ით გაიზრდება, რაც დამატებით 2.3 ტვტ. სთ-ით გაზრდის ელ. ენერგიის გენერაციას. თბოსადგურების გამომუშავებასთან ერთად წლიური გენერაცია 14.8 ტვტ. სთ-მდე გაიზრდება.


კვლევიდან ჩანს, რომ 2023 წლისათვის მოსალოდნელი ეკონომიკური ზრდის ფონზე ელ. ენერგიის მოხმარება 28%-ით, 16.1 ტვტ. სთ-მდე გაიზრდება.


მსგავს თემაზე:

2030 წლამდე ელექტროენერგიის მოხმარება 67%-ით 21 მლრდ კვტ/სთ-მდე გაიზრდება


140 უშუქო სოფელს ელექტროენერგიის პრობლემა მოუგვარდება


გენერატორი Snow-Teng ელექტროენერგიას თოვლისგან გამოიმუშავებს


საამიროებში ახალმა მზის ელექტროსადგურმა 1 კვტ/სთ-ს ფასი 2.42 ცენტამდე შეამცირა


ნენსკრა ჰესი ელექტროენერგიის სამომხმარებლო ტარიფს ვერ გააძვირებს



სხვა სიახლეები