• Ƀ/$

რუსეთი სომხეთს გაზს 30%–ით უძვირებს?

31 ოქტომბერი 17:24 | ანალიტიკა

რუსეთის განზრახვამ გაზარდოს მის მიერ სომხეთში ექსპორტირებული ბუნებრივი აირის ფასი, სომხური საზოგადოების შეშფოთება გამოიწვია. ამის შესახებ სომხური მედია წერს.

ოფიციალური მოსკოვი მრავალი წლის მანძილზე ხელსაყრელი პირობებით აწვდიდა  გაზს ერევანს. იმის მიუხედავად, რომ რუსული ბუნებრივი აირის საშუალო ფასი ათას კუბომეტრზე $235 არის, სომხეთი იგივე მოცულობის რესურსს $150-ად იღებდა. იანვრიდან რუსეთმა ათასი კუბომეტრის ფასი $165-მდე გაზარდა და ახლა კიდევ 30%-ით აპირებს ფასის მომატებას.

„გაზის ტარიფების ზრდა უარყოფითად იმოქმედებს არამხოლოდ მოსახლეობის კეთილდღეობის დონეზე, არამედ ზოგადად ეკონომიკის განვითრებაზე“ - წერს სომხური გაზეთი „ჟამანაკი“.

გამოცემა „ჩორორდ იშხანუციუნი“ (მეოთხე ხელისუფლება) სარკაზმით აღნიშნავს ზემოხსენებულ ამბავს: „სომხეთის საუკეთესო მოკავშირე რუსეთი ახალ სიურპრიზს გვიმზადებს, რომელსაც ჩვენმა ხელისუფლებამ არამხოლოდ ცენტრალური გამანაწილებელი ელექტროსისტემა და ჩვენი საწარმოები გადასცა იაფად, არამედ ფაქტობრივად განუსაზღვრელი ვადით და სრულიად უსასყიდლოდ გადასცა მიწა რუსულ ბაზებს, რომლის კომუნალური გადასახადები ჩვენი რიგითი გადამხდელების ჯიბიდან ფინანსდება“.

„სომხურ-რუსული ურთიერთობები, რომელიც სტრატეგიული მოკავშირეობის სიბრტყეშია, შესაძლოა გავლენა ექონია მიწოდებული გაზის ტარიფზე, თუმცა როგორც ჩანს ამ მიმართულებით რუსებს სხვა გეგმები აქვთ. სომხეთს არ გაუმართლა სტრატეგიულ მოკავშირესთან ურთიერთობებში, რადგან ეს ურთიერთობა არის რეალურად ვასალური“, - აღნიშნავს გამოცემა.

ბუნებრივი აირის ფასის საკითხის გადასაჭრელად, პრემიერ-მინისტრი ნიკოლ ფაშინიანი ოქტომბერში მოსკოვში ჩავიდა, სადაც დმიტრი მედვედევთან გამართა შეხვედრა, მაგრამ, როგორც ჩანს, მოსკოვი მაინც არ აპირებს შეცვალოს საკუთარი გეგმები გაზის მიწოდებასთან დაკავშირებით.

სომეხ ეკონომისტ ედუარდ აგაჯანოვს საკუთარი მოსაზრება გააჩნია ამ თემაზე: „ადრე თუ გვიან რუსეთი ნამდვილად გაზრდის მიწოდებული გაზის ფასს და ამიტომ სომხეთმა საქართველოსგან უნდა აიღოს მაგალითი, გააჩნდეს ბუნებრივი აირის ალტერნატიული წყარო, ამ შემთხვევაში ირანიდან იმპორტირებული, ან გახდეს ირანული გაზის სატრანზიტო ქვეყანა. მხოლოდ ტრანზიტიდან ათობით მილიონი დოლარის მოგება გვექნება. ეს კი თავის მხრივ შეამსუბუქებს ძვირადღირებულ გაზს. წინააღმდეგ შემთხვევაში სომხეთში მოსალოდნელია ელექტროენერგიის, საკვების, ტანსაცმლის, ტრანსპორტის ფასების ორმაგი ზრდა. მრავალი საწარმო შეიძლება დაიხუროს, ხოლო დაბალი გადახდისუნარიანობის მქონე მოსახლეობა კიდევ უფრო გაღატაკდება სა საბოლოო ჯამში ქვეყნის ეკონომიკა ჩამოშლის საფრთხის წინაშე დადგება“.

გაზეთი „ჰრაპარაკ“ წერს: „ეს არ არის მოსკოვის ერთჯერადი „ღალატი“. სიმართლე ისაა, რომ რუსები მუდმივად ღალატობენ. ისინი ყოველთვის საკუთარი ინტერესებით ხელძღვანელობენ. ამის საპასუხოდ ჩვენ ყოველთვის გვჯერა, რომ ძმური სახელმწიფოები ვართ, მაგრამ სხვა რეალობას ვიღებთ. ამის მიზეზი არა რუსეთი, არამედ სომხეთია. სანამ არ დავრწმუნდებით, რომ ნორმალური ურთიერთობების ჩამოყალიბება სხვა მეზობელ სახელმწიფოებთანაც საჭიროა, მანამდე გაგრძელდება მსგავსი მონური დამოკიდებულება. მარტივად რომ ვთქვათ, დღეს სომხეთის დამოუკიდებლობა კითხვის ნიშნის ქვეშ დგას. რუსეთის გავლენით, სომხეთი ვეღარ იღებს დამოუკიდებელ პოლიტიკურ გადაწყვეტილებებს და არ გააჩნია საკუთარი ეკონომიკური შესაძლებლობები“.

სომხეთი ბუნებრივი გაზით ერთადერთი წყაროდან, რუსეთიდან მარაგდება. სომხეთისთვის სასიცოცხლლო მნიშვნელობის გაზსადენი რუსეთის ფედერაციიდან საქართველოს ტერიტორიაზე გადის.


სხვა სიახლეები