ევროკავშირი ავითარებს ციფრულ საფულეს, რომელიც საშუალებას მოგცემთ უარი თქვათ ქაღალდისა და პლასტმასის ყველა დოკუმენტზე, კერძოდ, პირადობის ან მართვის მოწმობაზე. ამის შესახებ ესტონეთის ეროვნული მაუწყებლობა ERR იტყობინება.ევროპარლამენტარები 2020 წლიდან განიხილავენ შესაბამისი რეგულაციის ახალ ვერსიას, რომელიც ცნობილია შემოკლებით როგორც eiDAS. ერთი კვირის წინ ევროკავშირმა დაასრულა მუშაობა ციფრული საფულის აპლიკაციაზე. ის ახლა ტესტირების რეჟიმშია.ციფრულმა საფულემ შეიძლება შეინახოს ყველა ნებართვისა და უფლების დამადასტურებელი საბუთი, მათ შორის მართვის მოწმობები და მედიკამენტების რეცეპტები.გარდა ამისა, ის საშუალებას მოგცემთ აირჩიოთ ვის და რა ინფორმაცია აჩვენოთ.„პლასტიკური დოკუმენტი იშვიათი გახდება. თუ ადამიანს ნამდვილად სჭირდება მოგზაურობისთვის ან სხვა მიზნისთვის, მაშინ მან ცალკე უნდა მიმართოს უწყებას“, - აცხადებს სახელმწიფო დეპარტამენტის საინფორმაციო სისტემის ექსპერტი მარკ ერლიხი.

მსოფლიო სავალუტო ფონდის ვარაუდით, მიმდინარე წელს გლობალური ეკონომიკა 3%-ზე ნაკლებით გაიზრდება, - ამის შესახებ საერთაშორისო საფინანსო ინსტიტუტის მმართველმა დირექტორმა, კრისტალინა გეორგიევამ „ჩინეთის განვითარების ფორუმზე“ სიტყვით გამოსვლისას განაცხადა.„ჩვენი ვარაუდით, 2023 წელი ასევე რთული იქნება, ხოლო გლობალური ზრდის მაჩვენებელი 3%-ზე დაბალ ნიშნულამდე შემცირდება, რასაც პანდემიისგან დანატოვარი ნაიარევები, უკრაინაში მიმდინარე ომი და მონეტარული პოლიტიკის გამკაცრების შედეგები განაპირობებს. მომავალი წლისთვის გაუმჯობესებული ხედვის მიუხედავად, გლობალური ზრდის მაჩვენებელი 3.8%-იან ისტორიულ საშუალოზე დაბალი იქნება”, - განაცხადა გეორგიევამ.მისივე თქმით, მსოფლიოში კვლავაც მაღალია გაურკვევლობის დონე, რასაც, უმეტესწილად, პოტენციური გეოპოლიტიკური და ეკონომიკური ფრაგმენტაცია განაპირობებს, რომელმაც, კრისტალინა გეორგიევას თქმით, შესაძლოა, მსოფლიო რამდენიმე ბლოკად დაყოს.

უკრაინა 2023 წელს 45 მილიონ ტონა მარცვლეულსა და პარკოსან კულტურებს ელოდება, ამის შესახებ უკრაინის პრემიერ-მინისტრმა დენის შმიგალმა მთავრობის სხდომაზე განაცხადა.მისი თქმით, უკრაინაში მეორე თესვის კამპანია საომარი მდგომარეობის პირობებში მიმდინარეობს და მის წარმატებით დასასრულებლად ფერმერებს მთავრობა ეხმარება.„უკრაინაში მეორე თესვის კამპანია მიმდინარეობს საომარი მდგომარეობის პირობებში. ჩვენ ვეხმარებით ჩვენს ფერმერებს, რომ თესვა  წარმატებით განახორციელონ. წინასწარი შეფასებით, 45 მილიონი ტონა მარცვლეული და პარკოსანი კულტურებს ველით. ხორბლის მოსავალი 16,6 მილიონი ტონა იქნება. “- განაცხადა მან მთავრობის სხდომაზე.პრემიერის თქმით, ასეთი მოსავლით უკრაინელების შიდა მოხმარება დაახლოებით 5 მილიონი ტონაა.„უკრაინა სრულად იქნება მარცვლეულითა და საკვებით უზრუნველყოფილი“, - აღნიშნა შმიგალმა.

საფრანგეთი საჯარო მოხელეებს ხელს შეუშლის, რომ სამსახურებრივ ტელეფონებზე ჩამოტვირთონ ყველა სახის მედია პლატფორმა, სათამაშო და ვიდეო სტრიმინგის აპლიკაცია, რასაც კიბერუსაფრთხოების და კონფიდენციალურობის დაცვით ხსნის. ამის შესახებ ინფორმაციას Politico ავრცელებს.გამოცემის ცნობით აკრძალვა, რომელიც დაუყოვნებლივ ამოქმედდება, მოიცავს TikTok-საც, მაგრამ არ შემოიფარგლება მხოლოდ ჩინეთის საკუთრებაში არსებული პლატფორმით.საფრანგეთის მთავრობის ეს ნაბიჯი მოჰყვა აკრძალვებს, რომელიც ევროპულმა ინსტიტუტებმა და ევროკავშირის სხვა ქვეყნებმა დააწესეს, როგორიცაა ნიდერლანდები. ბრიუსელისა და ჰააგისგან განსხვავებით, საფრანგეთის მთავრობა ასევე მიზნად ისახავს დასავლურ აპლიკაციებსა და ევროპულ და ამერიკულ პლატფორმებს.„ამ გასართობ აპლიკაციებს არ აქვს კიბერუსაფრთხოების საკმარისი დონე“, - თქვა საფრანგეთის ციფრულმა მინისტრმა ჟან-ნოელ ბარომ.„TikTok, ასევე CandyCrush ან Netflix ამ აკრძლვაში მოექცევა“, - ამბობს ჟან-ნოელ ბარო. მისი თქმით, გამონაკლისი შეიძლება იყოს „ინსტიტუციური კომუნიკაციების“ მიზნები.მარტის დასაწყისში, საფრანგეთის მთავრობის სპიკერმა ოლივიე ვერანმა განაცხადა, რომ მინისტრებს და პრეზიდენტ ემანუელ მაკრონს არ შეეძლოთ სოციალური მედიის აპლიკაციების ჩამოტვირთვა, როგორიცაა Instagram და TikTok, სამუშაო ტელეფონებზე. მან აღნიშნა, რომ მთავრობა მუშაობს საჯარო მოხელეებისთვის გამარტივებულ პოლიტიკაზე.ამ კვირის დასაწყისში, ეროვნული ასამბლეის მაღალჩინოსნებმა მტკიცედ მოუწოდეს კოლეგა დეპუტატებს, „შეზღუდონ“ ისეთი სოციალური მედიის აპლიკაციებისა და მესენჯერების გამოყენება, როგორიცაა Instagram, TikTok, Snap და Signal.

ჩინეთის პრეზიდენტმა სი ძინპინმა რუსული გაზის შესყიდვების მოცულობის გაზრდის წინადადებისგან თავი შეიკავა, - ამის შესახებ Bloomberg-ი  იუწყება.გამოცემის ცნობით, ჩინეთის ლიდერმა რუსეთის პრეზიდენტ ვლადიმერ პუტინს „გამოკვეთილი თანხმობა“ ან „მინიშნება“ გაზსადენ Power of Siberia-2-ის მშენებლობასა და ექსპლუატაციის პროგრესზე არ მისცა.სი ძინპინის მთავრობა შეშფოთებულია ენერგომომარაგების დივერსიფიკაციის გამო. ჩინეთს რუსეთის ენერგეტიკულ რესურსებზე დამოკიდებულების მხრივ ევროპის მსგავსი შეცდომის დაშვება არ სურს.ცნობისთვის, კრემლში რუსეთისა და ჩინეთის ლიდერების შეხვედრა გაიმართა, სადაც მხარეები ეკონომიკური თანამშროლობის განვითარებაზე შეთანხმდნენ. 

თურქეთმა რუსეთში სანქცირებული საქონლის ტრანზიტი შეწყვიტა. ამის შესახებ სტამბოლის შავი და ფერადი ლითონების ექსპორტიორთა ასოციაციის თავმჯდომარემ, ჩეთინ თექჩელიოღლუმ ისაუბრა.მისივე თქმით, თურქეთის მთავრობამ კომპანიებს სანქცირებული უცხოური საქონლის სია გადასცა და დაავალა, რომ 1-ელი მარტიდან მათი რუსეთში გაგზავნა აკრძალონ.დასავლეთის ქვეყნებმა მოსკოვს სანქციები მას შემდეგ დაუწესეს, რაც გასული წლის თებერვალში უკრაინაში შეიჭრა.თუმცა, თურქეთიდან და სხვა გლობალური სავაჭრო ცენტრებიდან მიწოდების არხები ღია დარჩა, რის გამოც ვაშინგტონმა გასულ თვეს ანკარა გააფრთხილა ქიმიკატების, მიკროჩიპების და სხვა საქონლის ექსპორტის შესახებ, რომელიც შეიძლება მოსკოვმა სამხედრო ოპერაციებისთვის გამოიყენოს. თექჩელიოღლუს თქმით, თურქეთის ახალმა შეზღუდვებმა რუსი იმპორტიორები აიძულა, რომ  ყაზახეთსა და სხვა ქვეყნებში ალტერნატიული მომწოდებლები მოეძიებინათ.

მსოფლიოს ერთ-ერთი ყველაზე სწრაფად მზარდი სოციალური ქსელი, ჩინური TikTok-ი ევროპაში სამ ახალ დატაცენტრს გახსნის, - ამის შესახებ მთავრობასთან ურთიერთობის და საჯარო პოლიტიკის მიმართულებით კომპანიის ვიცე-პრეზიდენტი, ტეო ბერტრამი წერს.ამ დრომდე, TikTok-ს ევროპაში ერთი დატაცენტრი ჰქონდა, რომელიც ირლანდიის დედაქალაქ დუბლინში მდებარეობდა, მაგრამ ამიერიდან, ამ სიას კიდევ ორი დატაცენტრი შეემატება - ერთი კვლავ დუბლინში განთავსდება, ხოლო მეორე ნორვეგიის მუნიციპალიტეტ ჰამარში.ჩინური კომპანიის მიერ ახალი დატაცენტრების გახსნა კომპანიის ევროპელი მომხმარებლების მონაცემების ევროპაში შენახვისა და დამუშავების გადაწყვეტილებას ეხება, რომელსაც კომპანიას ევროკავშირის მიერ მიღებული “მონაცემთა დაცვის ზოგადი რეგულაცია” ავალდებულებს. თუმცა, არც ის დამოკიდებულება უნდა დაგვავიწყდეს, რომელიც ევროპელ კანონმდებლებს ჩინური კომპანიის მიმართ აქვთ.კომპანიის ინფორმაციით, ევროპაში, TikTok-ს ყოველთვიურად აქტიური 150 მილიონი მომხმარებელი ჰყავს. 

შვეიცარიის უმსხვილესმა ბანკმა, UBS-მა გაკოტრების პირას მყოფი კონკურენტის, Credit Suisse-ის 3.2 მილიარდ დოლარად ყიდვის გადაწყვეტილება მიიღო.საფინანსო ორგანიზაციებს შორის მიმდინარე მოლაპარაკებებში აქტიურად იყვნენ ჩართულნი: ევროპის ცენტრალური ბანკი, აშშ-ის ფედერალური რეზერვი და შვეიცარიის ცენტრალური ბანკი, რათა მსხვილმასშტაბიანი გარიგება რაც შეიძლება მარე შემდგარიყო და მსოფლიოს თავიდან აერიდებინა შესაძლო ფინანსური კრიზისი.გარიგების პირობების თანახმად, Credit Suisse-ის ინვესტორები კომპანიის ყოველი 22.5 აქციის სანაცვლოდ UBS-ის 1 აქციას მიიღებენ. ბანკების შერწყმის შემდეგ კი, UBS-ის აქტივების მოცულობა 5 ტრილიონ დოლარს მიაღწევს, რაც მას შვეიცარიაში უპირობო მონოპოლად და მსოფლიოს ერთ-ერთ უმსხვილეს საფინანსო ორგანიზაციად აქცევს.გარდა Credit Suisse-ის პორტფელისა და აქტივებისა, UBS-მა შვეიცარიის ცენტრალური ბანკის მხრიდან 108 მილიარდი დოლარის შეღავათიანი სესხიც უნდა მიიღოს, თანხის ნაწილი კი ბანკის რესტრუქტურიზაციას და Credit Suisse-ის ვალდებულებების გადაფარვას უნდა მოხმარდეს.აღსანიშნავია, რომ პარასკევის მდგომარეობით, Credit Suisse-ის საბაზრო კაპიტალიზაცია 7.5 მილიარდ დოლარს აღწევდა, რაც იმას ნიშნავს, რომ ის საბაზრო ღირებულებაზე თითქმის ორჯერ უფრო იაფად გაიყიდა. შედარებისთვის, UBS-ის კაპიტალიზაცია 60 მილიარდ დოლარს აღწევს.

კრიპტოვალუტების საერთაშორისო ბირჟაზე აღმასვლის მკვეთრი ტენდენცია ფიქსირდება - ინდუსტრიის საერთო კაპიტალიზაცია 1.17 ტრილიონ დოლარს აღწევს, რაც 24 საათში თითქმის 2%-ით გაზრდილი მაჩვენებელია.ბიტკოინის ფასმა 28,500-დოლარიან ნიშნულს მიაღწია, რაც 2022 წლის ივლისის შემდეგ დაფიქსირებული უმაღლესი მაჩვენებელია. ერთ დღეში ბიტკოინი თითქმის 4%-ითაა გაძვირებული, ერთ კვირაში კი მატების მაჩვენებელი 25%-ს აღწევს. კრიპტოაქტივის საბაზრო კაპიტალიზაცია ამჟამად 542 მილიარდ დოლარს შეადგენს.რაც შეეხება რიგით მეორე უმსხვილეს კრიპტოაქტივს, ეთერიუმის ფასი 1,800 დოლარის ფარგლებში მერყეობს, მისი კაპიტალიზაცია კი დაახლოებით 220 მილიარდ დოლარს შეადგენს. ერთ კვირაში ეთერიუმის ფასი 10%-ითაა გაზრდილი.აღმასვლის ტენდენცია ფიქსირდება სხვა კრიპტოვალუტებთან მიმართებითაც, მაგალითად: BNB-ის ფასი 10%-ით გაიზარდა; Solana-ს ღირებულებამ 16%-ით მოიმატა; Polkadot-ის ფასი კი თითქმის 8%-ითაა გაზრდილი.კრიპტოაქტივების გაძვირება პირდაპირ კავშირშია ამერიკის შეერთებული შტატების ფედერალური რეზერვის სამომავლო გადაწყვეტილებასთან. მსხვილი ბანკების გაკოტრების ფონზე, არსებობს იმის რეალური შანსი, რომ FED-მა რეფინანსირების განაკვეთი დაგეგმილზე 25 საბაზო პუნქტით ნაკლებად გაზრდის. აგრეთვე არ არის გამორიცხული, რომ ფედერალური რეზერვი წლის ბოლომდე მონეტარული პოლიტიკის შემსუბუქების სტრატეგიაზეც გადაერთოს, რაც, ცხადია, დადებითად აისახება კრიპტოაქტივების ფასებზე.ზოგადად, რეფინანსირების განაკვეთსა და სარისკო აქტივების ფასებს შორის საპირისპირო მიმართებაა; რაც უფრო მკაცრია მონეტარული პოლიტიკა - მით უფრო მეტად უფასურდება სარისკო აქტივები და პირიქით.

შვეიცარიაში დაფუძნებულმა მულტინაციონალურმა საინვესტიციო ბანკმა UBS Group AG, შესაძლოა, Credit Suisse მთლიანად ან ნაწილობრივ შეიძინოს. ქვეყნის ორი უმსხვილესი კრედიტორის წარმომადგენლები ერთმანეთს შაბათ-კვირას შეხვდებიან, რაც, შესაძლოა, 2008 წლის ფინანსური კრიზისის შემდეგ ყველაზე შედეგიანი საბანკო კომბინაციით დასრულდეს.აღსანიშნავია, რომ UBS შვეიცარიაში უმსხვილესი საბანკო ინსტიტუციაა და ყველაზე მსხვილი კერძო ბანკია მსოფლიოში.მოლაპარაკებებს შვეიცარიის ეროვნული ბანკი და საფინანსო სექტორის ზედამხედველი ორგანო FINMA აწარმოებენ. მათი ინტერვენცია საჭირო მას შემდეგ გახდა, რაც Credit Suisse-სს 54 მილიარდი დოლარის დახმარების მიღება დასჭირდა ეროვნული ბანკისგან. თუმცა ამ დახმარებამ აქციების ფასების კლების დენტენიცია ვერ შეაჩერა და მას შემდეგ, რაც ყველაზე დიდმა ინვესტორმა განაცხადა, რომ ბანკში კაპიტალის ჩადებას წყვეტდა, კლიენტებმა აქტივების გამოტანა გააგრძელეს.ცნობისთვის, ბოლო წლებში შვეიცარიული კრედიტორების მაჩვენებლები მნიშვნელოვნად განსხვავდებოდა. ბოლო 3 წლის განმავლობაში, UBS-ის აქციები 120%-ით გაძვირდა და კაპიტალიზაციამ 56.6 მილიარდ დოლარს მიაღწია, Credit Suisse-ის აქციები კი პირიქით, 70%-ით გაუფასურდა და 8 მილიარდ დოლარამდე ჩამოვიდა. პოტენციური გარიგების მიზანი კი სწორედ ამ სიტუაციის გამოსწორებაა.

ზიმბაბვე რუსეთის ახალი სავაჭრო პარტნიორი ხდება.აფრიკული ქვეყნის მთავრობის წარმომადგენელი კრისტოფერ მუცვანგა აცხადებს, რომ ზიმბაბვე მზად არის, რუსეთს ხილი, ბოსტნეული, თხილი, ჩაი და ყავა და თამბაქო მიაწოდოს.  „რუსეთთან ვაჭრობის მნიშვნელოვანი სფეროა ხილი და ბოსტნეული. ჩვენ გვაქვს ბევრი ტროპიკული ხილი, ტკბილი ფორთოხალი, რომელიც შეგვიძლია მივაწოდოთ რუსეთს. ჩვენ გვაქვს მსოფლიოში საუკეთესო კლიმატი, სადაც შეგვიძლია, ვაწარმოოთ ნებისმიერი საკვები. გვაქვს ნაყოფიერი ნიადაგი და საკმარისი წყალმომარაგება, რაც მოგვცემს საშუალებას გავხდეთ მნიშვნელოვანი მოთამაშე ბოსტნეულისა და ხილის ბაზარზე.გარდა ამისა, გვაქვს თხილი, ჩაი და ყავა. ზიმბაბვეს ასევე აქვს განვითარებული თამბაქოს ინდუსტრია, ჩვენ ვართ ლიდერები მსოფლიოში, ჩვენი თამბაქო ძალიან პოპულარულია. ჩვენ შეგვიძლია ვიმუშაოთ რუსეთთან ერთად ამ სექტორში“, - განაცხადა მუცვანგამ.

თურქეთში მიწისძვრების ზარალი ამ დროისთვის დაახლოებით 80 მილიარდი დოლარია, დაზარალებულმა პროვინციებმა დაიწყეს 40%-ით ნაკლები პროდუქციის წარმოება ექსპორტისთვის. ამის შესახებ ოთხშაბათს თურქეთის სოფლის მეურნეობისა და სატყეო მეურნეობის მინისტრმა ვაჰიტ კირიშჩიმ განაცხადა.„ის რაც მოხდა, ჩვენთვის ძალიან მტკივნეული მოვლენა იყო. მიახლოებითი ზარალი 80 მილიარდი დოლარია. მხოლოდ მიწისძვრების შედეგად წყლის რესურსების ადმინისტრაციის ზარალი 22 მილიარდი ლირაა (1,15 მილიარდი დოლარი)“, - ციტირებს მინისტრის განცხადებას სააგენტო Demiroren-ი.კირისჩიმ აღნიშნა, რომ მხოლოდ წყლის რესურსების სამმართველოს ფინანსური ზარალი შეიძლება კიდევ უფრო გაიზარდოს, როდესაც დადგება დრო, როცა დაიწყება ტერიტორიების მორწყვა. „ჩვენ ჯერ არ ვიცით, სად არის ამ სისტემაში დაზიანება,“ - განმარტა მან.მიწისძვრა თურქეთის ექსპორტსაც შეეხო. კირისჩის თქმით, სტიქიას მოყოლილი პროვინციების წილი თურქეთის ექსპორტის მთლიან მოცულობაში დაახლოებით 15,5%-ია. მიწისძვრების შემდეგ ამ რეგიონებმა საექსპორტოდ 40%-ით ნაკლები პროდუქციის წარმოება დაიწყეს.თურქეთში გაეროს განვითარების პროგრამის სპიკერმა ლუიზ ვინტონმა განაცხადა, რომ თებერვალში მომხდარი მიწისძვრების შედეგად თურქეთისთვის მიყენებული ზარალი შესაძლოა 100 მილიარდ დოლარს გასცდეს. მანამდე მსოფლიო ბანკმა მიწისძვრებით თურქეთის ეკონომიკისთვის მიყენებული ზარალი 34,2 მილიარდ დოლარად შეაფასა.7,7 და 7,6 მაგნიტუდის მიწისძვრები თურქეთში 6 თებერვალს ცხრა საათის ინტერვალით, კაჰრამანმარას პროვინციაში მოხდა. ბიძგები, რასაც მოჰყვა ასობით ე.წ. „აფტერშოკი“, იგრძნობოდა რესპუბლიკის 11 პროვინციაში და მეზობელ ქვეყნებში, რომელთაგან ყველაზე მეტად სირია დაზარალდა. თურქეთში მსხვერპლთა რაოდენობამ 46 ათასს გადააჭარბა.