• Ƀ/$

ინფლაციამ მიზნობრივ მაჩვენებელს გადააჭარბა

2 აგვისტო 11:40 | ფინანსები

ინფლაციის წლიურმა განაკვეთმა 2018 წლის ივლისსი 4.6%-ს მიაღწია, რაც ეროვნული ბანკის მიერ განსაზღვრულ მიზნობრივ მაჩვენებელს 1.6%-ით აღემატება.

3%-იან ზღვარს ინფლაციამ თამბაქოს ფასების გამორიცხვითაც გადააჭარბა და 3.9% შეადგინა.


წლიური ინფლაციის ფორმირებაზე ძირითადი გავლენა იქონია ფასების ცვლილებამ შემდეგ ჯგუფებზე:


სურსათი და უალკოჰოლო სასმელები: ჯგუფში ფასები გაიზარდა 7.9 პროცენტით, რაც წლიურ ინფლაციაზე 2.33 პროცენტული პუნქტით აისახა. ფასები მომატებულია შემდეგ ქვეჯგუფებზე: თევზეული (15.0 პროცენტი), ბოსტნეული და ბაღჩეული (15.0 პროცენტი), პური და პურპროდუქტები (12.2 პროცენტი), შაქარი, ჯემი და სხვა ტკბილეული (9.2 პროცენტი), ხორცი და ხორცის პროდუქტები (6.9 პროცენტი), რძე, ყველი და კვერცხი (6.5 პროცენტი), ასევე მინერალური და წყაროს წყალი (4.2 პროცენტი). ამასთან, ფასები შემცირდა ხილსა და ყურძენზე (-0.9 პროცენტი);


ალკოჰოლური სასმელები, თამბაქო: ფასები გაიზარდა 13.7 პროცენტით, რაც 0.92 პროცენტული პუნქტით აისახა წლიური ინფლაციის მთლიან მაჩვენებელზე. ფასები მომატებულია თამბაქოს ნაწარმზე (29.1 პროცენტი);


ტრანსპორტი: ჯგუფში დაფიქსირდა ფასების 3.9 პროცენტიანი მატება, რაც 0.48 პროცენტული პუნქტით აისახა ინფლაციის მთლიან მაჩვენებელზე. ჯგუფში ფასები გაიზარდა სატრანსპორტო საშუალებების შეძენაზე (6.8 პროცენტი), პირადი სატრანსპორტო საშუალებების ექსპლუატაციაზე (4.1 პროცენტი) და სატრანსპორტო მომსახურებაზე (2.7 პროცენტი);


დასვენება, გართობა და კულტურა: ფასები გაზრდილია 5.6 პროცენტით, შესაბამისად, ჯგუფის წვლილმა წლიურ ინდექსში 0.32 პროცენტული პუნქტი შეადგინა. ფასები გაიზარდა გასართობ და კულტურულ მომსახურებაზე (6.5 პროცენტი);


ჯანმრთელობის დაცვა: ფასები მომატებულია 3.5 პროცენტით, რაც 0.29 პროცენტული პუნქტით აისახა მთლიანი ინდექსის ზრდაში. ფასები გაიზარდა ქვეჯგუფებზე: სამედიცინო პროდუქცია, აპარატურა და მოწყობილობა (4.9 პროცენტი), ამბულატორიული სამედიცინო მომსახურება (3.4 პროცენტი) და საავადმყოფოების მომსახურება (1.7 პროცენტი).



იმის გათვალისწინებით, რომ ინფლაცია დაგეგმილ მაჩვენებელს უკვე მეხუთე თვეა რაც აჭარბებს 3%-იან ზღვარს 12 თვიანი გასაშუალებული მონაცემიც გადაცდა და 3.1%-ს მიაღწია.


მსგავს თემაზე:

რა აუფასურებს ლარს? ნამდვილი და ცრუ მიზეზები


ვინ რამდენით აზარალა ლარის ვარდნამ? პროდუქციის ნაწილზე ფასები გაორმაგდა



სხვა სიახლეები