• Ƀ/$

"ოცნების ქალაქში" საცხოვრებელი კორპუსის მშენებლობის შესყიდვა დღეს გამოცხადდა

11 ნოემბერი 15:30 | ეკონომიკა

ბათუმში „ოცნების ქალაქში“ თვითნებურად შესახლებული ოჯახებისთვის საცხოვრებელი კორპუსების მშენებლობა ახლო მომავალში დაიწყება.

ამის შესახებ აჭარის მთავრობის თავმჯდომარემ თორნიკე რიჟვაძემ დღეს სპეციალურ ბრიფინგზე განაცხადა. მისივე თქმით, სახელმწიფო შესყიდვა მშენებლობასთან დაკავშირებით დღეს გამოცხადდება.


"ეს იყო ყველაზე დიდი სოციალური გამოწვევა, რომელიც წლების განმავლობაში აწუხებდა როგორც მოქალაქეებს, ასევე მთლიანად რეგიონს. გადაწყვეტილების მიღებიდან დღემდე მთელი რიგი მნიშვნელოვანი ღონისძიებები გატარდა, უკვე დასრულდა პროექტირება და დღესვე უკვე გამოვაცხადებთ სახელმწიფო შესყიდვას და გადავალთ მშენებლობის ეტაპზე. პირველ ეტაპზე გათვალისწინებულია 580 ბინით უზრუნველყოფა და ხაზგასმით მინდა აღვნიშნო, რომ ჩვენი ხელისუფლების პირობებში არც ერთი ადამიანი არ იქნება მეორეხარისხოვანი და მით უმეტეს, როცა საქმე ეხება 1000-ზე მეტ ბავშვს და მათ ოჯახებს", - განაცხადა თორნიკე რიჟვაძემ.


აჭარის მთავრობის თავმკდომარემ მადლობა გადაუხადა ცენტრალურ მთავრობას და მმართველი პარტიის ლიდერს განსაკუთრებული მხარდაჭერისთვის.


აჭარის ფინანსთა და ეკონომიკის მინისტრის ჯაბა ფუტკარაძის განცხადებით წელს ბიუჯეტში გათვალისწინებულია 3,75 მლნ ლარი, მომავალი წლის ბიუჯეტის პროექტში კი 16 მლნ ლარი. მომზადებულია მშენებლობის პროექტიც, რომელსაც გავლილი აქვს ოთხი ექსპერტიზა. სატენდერო თანხა კი აღემატება 41 მილიონ ლარს და პროექტის ფარგლებში განხორციელდება 54 ათასი კვადრატული მეტრი ფართის მშენებლობა.


სამშენებლო პროცესი ტენდერში გამარჯვებულ კომპანიასთან ხელშეკრულების გაფორმებიდან 18 თვეში უნდა დასრულდეს.


რაც შეეხება კრიტერიუმებს, თუ ვინ მიიღებს ბინებს, რიჟვძის განცხადებით, პროცესი იქნება საჯარო და მასში ჩართული იქნება, როგორც ადგილობრივი მესამე სექტორი, ასევე გაეროს ბავშვთა ფონდი (UNICEF).


სხვა სიახლეები