• Ƀ/$

ჯონ ბოლტონი: აშშ-ს პრეზიდენტი ჩინეთის მეთაურს 2020 წლის არჩევნებში დახმარებას სთხოვდა

18 ივნისი 13:08 | INTERNET დაიჯესტი

ეროვნული უსაფრთხოების ყოფილი მრჩეველი ჯონ ბოლტონი თავის ახალ წიგნში დონალდ ტრამპს არათანმიმდევრულ გადაწყვეტილებებში ადანაშაულებს. დიალოგი, რომელიც ამჯერად წიგნის გამოსვლამდე გასაჯაროვდა, ბოლტონის თქმით, ტრამპსა და სი ძინპინს შორის გასულ წელს გაიმართა.

მისი თქმით, ტრამპმა პირადად სთხოვა ჩინეთის ლიდერს, სი ძინპინს დახმარება 2020 წლის არჩევნებისთვის, - წერს CNN.

გარდა ამისა, ბოლტონი ამტკიცებს, რომ გასულ წელს სი ძინპინსა და ტრამპს შორის გამართულ შეხვედრაზე ტრამპი ჩინეთში მცხოვრები უიღურელი მუსულმანების წინააღმდეგ საკონცენტრაციო ბანაკების მშენებლობას დაეთანხმა და ჩინეთის ლიდერს მოუწოდა, საქმე გაეგრძელებინა.

დიდი ოცეულის სამიტზე კი, რომელიც ასევე გასულ წელს, ოსაკაში გაიმართა, ტრამპმა მოულოდნელად საუბარი მომავალ არჩევნებზე ჩამოაგდო. ბოლტონი წერს, რომ მაშინ ჩინეთის მეთაურს ტრამპმა განუცხადა, რომ ფერმერები მისი მთავარი ამომრჩევლები არიან. ამიტომაც ჩინეთმა ამერიკისგან სოიო და ხორბალი უნდა შეიძინოს, რაც ფერმერების კეთილგანწყობას გაზრდიდა. „სანაცვლოდ კი ჩინეთი აშშ-სგან ზოგიერთ პროდუქტზე გადასახადების მოხსნას მიიღებდა“, - წერს ბოლტონი.

ტრამპი ბრალდებას უარყოფს. როგორც მან „უოლ სტრიტ ჯორნალს“ განუცხადა:  „ჯონ ბოლტონს თეთრ სახლში ვერავინ იტანს“.

ჯონ ბოლტონის წიგნი - „ადგილი, სადაც ეს მოხდა - თეთრი სახლის მემუარები“ -  23 ივნისისს უნდა გამოჩნდეს მაღაზიებში.  როგორც გამომცემლობა Simon & Schuster წერს,  ეს ის წიგნია, „რომლის წაკითხვაც ტრამპს არ სურს,“ რადგან მასში მოყოლილია პრეზიდენტის არათანმიმდევრული გადაწყვეტილებებს შესახებ.

ჯონ ბოლტონი 2018 წლის აპრილიდან 2019 წლის სექტემბრამდე იკავებდა თეთრი სახლის ეროვნული უსაფრთხოების მრჩევლის თანამდებობას. მისი გათავისუფლების შესახებ პრეზიდენტმა ტვიტერზე დაწერა: „გუშინ ჯონ ბოლტონს შევატყობინე, რომ თეთრ სახლში მისი მომსახურება აღარ არის საჭირო. მე, ისევე, როგორც ადმინისტრაციის სხვა თანამშრომლებიც, მის შეხედულებების არ ვიზიარებდით და შესაბამისად, ჯონს სამსახურიდან გადადგომა ვთხოვე...“




სხვა სიახლეები