• Ƀ/$

უძლიერესი სამხედრო საზღვაო ფლოტების რეიტინგი გამოქვეყნდა

12 დეკემბერი 13:37, 2019 წელი | მედია ბიზნესისთვის - M2B

ამერიკულმა ჟურნალმა The National Interest მსოფლიოში უმსხვილესი სამხედრო საზღვაო ფლოტების მქონე ქვეყნები დაასახელა. ხუთეულში აშშ და რუსეთი მოხვდნენ.

პირველი ადგილი, პუბლიკაციის ავტორების აზრით, ამერიკულ ფლოტს უკავია, რომლის შემადგენლობაში ყველაზე მეტი გემია და ყველაზე დიდი პასუხისმგებლობის ზონა უკავია მსოფლიოში. „არც ერთ სხვა ფლოტს არ აქვს ასეთი გლობალური დაფარვის ზონა, როგორც აშშ–ის სამხედრო ფლოტს აქვს. ამერიკული სამხედრო გემები რეგულარულად მუშაობენ წყნარ, ატლანტის და ინდოეთის ოკეანეებში, ასევე ხმელთაშუა ზღვაში და სპარსეთის ყურეში“, – ნათქვამია სტატიაში.


მასალაში დაზუსტებულია, რომ ამერიკული ფლოტი 288 ხომალდს მოიცავს, რომელთაგან 10 ავიამზიდია, 62 ნაღმოსანი და 17 ფრეგატი.


მეორე ადგილზე ჩინეთის სამხედრო საზღვაო ფლოტი დასახელდა, რომელმაც ბოლო 25 წლის განმავლობაში კოლოსალურ წარმატებას მიაღწია და დღეს ფლობს: 25 ნაღმოსანს, 42 ფრეგატს, 3 სადესანტო ხომალდს და სხვ.


The National Interest–ის აზრით, რუსეთი რეიტინგში მესამეა, რომლის საზღვაო შეიარაღების უდიდესი ნაწილი საბჭოთა დროინდელია, თუმცა რეგულარულად მიმდინარეობს არსენალის განახლება. ჟურნალისტების დაანგარიშებით, რუსეთის ფლოტში შედის 79 დიდი ხომალდი, მათ შორის 13 ნაღმოსანი, 5 კრეისერი და 52 წყალქვეშა ხომალდი. თითქმის ყვველა მათგანი ცივი ომის პერიოდშია აგებული.


მეოთხე ადგილზე ბრიტანეთის სამეფო ფლოტი გავიდა 19 ფრეგატითა და ნახმოსნებით, 3 დიდი ხომალდით, 7 მოიერიშე ატომური წყალქვეშა გემით და ბალისტიკური რაკეტებით აღჭურვილი 4 წყალქვეშა გემით.


რეიტინგის პირველ ხუთეულს იაპონია კრავს, რომლის სამხედრო ფლოტი 114 ხომალდს ითვლის. მიჩნეულია, რომ იაპონიის წყალქვეშა სამხედრო ფლოტი, რომელიც 16 ხომალდს ითვლის, ერთ–ერთი საუკეთესოა მსოფლიოში.


სხვა სიახლეები