• Ƀ/$

კიევში სუამ-ის სამიტი გაიხსნა

12 დეკემბერი 14:43, 2019 წელი | მედია ბიზნესისთვის - M2B

კიევში საქართველოს, უკრაინის, აზერბაიჯანისა და მოლდოვის ლიდერები შეიკრიბნენ, რომლებიც დემოკრატიისა და ეკონომიკური განვითარების ორგანიზაცია - სუამ-ის სამიტს დაესწრებიან.

ღონისძიების მთავარი თემა სუამ-ის ძირითადი პროექტების განხორციელებისას ვაჭრობისა და ტრანსპორტირების გასაადვილებლად, საჯარო და კერძო უწყებებს შორის პარტნიორობის საკითხი იქნება.


სამიტზე ქართულ დელეგაციას პრემიერ-მინისტრი გიორგი გახარია, აზერბაიჯანულ დელეგაციას ვიცე-პრემიერი ალი აჰმედოვი, ხოლო მოლდოვურ დელეგაციას პრემიერ-მინისტრი იონ კიკუ ხელმძღვანელობენ.


ქართულ დელეგაციაში დამატებით საგარეო საქმეთა მინისტრი დავით ზალკალიანი და პრემიერის მრჩეველი საერთაშორისო ურთიერთობათა საკითხებში, ირაკლი ჩიქოვანი შედიან.


სუამ-ის წევრი სახელმწიფოების მთავრობათა მეთაურების პლენარული სხდომის შემდეგ დაგეგმილია ლიდერების ერთობლივი განცხადებები, ასევე - რამდენიმე დოკუმენტზე ხელმოწერა.


საქართველოს მთავრობის ხელმძღვანელი უკრაინაში ორდღიან ვიზიტით დარჩება.


კიევის ბორისპოლის საერთაშორისო აეროპორტში დახვედრის ოფიციალური ცერემონია გაიმართა. შესრულდა საქართველოსა და უკრაინის სახელმწიფო ჰიმნები.


ვიზიტის ფარგლებში საქართველოს პრემიერ-მინისტრსა და უკრაინის პრეზიდენტ ვოლოდიმირ ზელენსკის შორის შეხვედრა გაიმართება. მთავრობის მეთაური ასევე შეხვდება უკრაინის პრემიერ-მინისტრ ალექსი გონჩარუკს და უმაღლესი რადას თავმჯდომარე დმიტრო რაზუმკოვს.


1997 წლის 10 ოქტომბერს, სტრასბურგში, ევროპის საბჭოს სამიტის მსვლელობისას, ოთხი ქვეყნის (საქართველო, უკრაინა, აზერბაიჯანი და მოლდოვა) მონაწილეობით დაფუძნდა სუამ-ის საკონსულტაციო ფორუმი.


2006 წლის 22-23 მაისს, კიევში გამართულ სუამ-ის მორიგ სამიტზე, სუამ-ის გაერთიანების ბაზაზე შეიქმნა ახალი ორგანიზაცია - დემოკრატიისა და ეკონომიკური განვითარების ორგანიზაცია - სუამ-ი. ახალი ორგანიზაციის შექმნა ოფიციალურად გაფორმდა სუამ-ის ქვეყნების სახელმწიფო მეთაურთა მიერ კიევის შესაბამისი დეკლარაციის, ორგანიზაციის წესდებისა და სხვა დამფუძნებელი დოკუმენტების ხელმოწერით.


სხვა სიახლეები