საქართველოს ეროვნულმა ბანკმა ვალუტის ახალი კურსი დაადგინა. 1-ელი მაისის ვაჭრობის შედეგად აშშ დოლარი გაუფასურდა და 2.6788 ლარი გახდა. კურსი, რომელიც დღეს მოქმედებდა, 2.6849 ლარი იყო.გაუფასურდა ევრო, რომლის კურსი 2.8583 ლარია. დღეს მოქმედი კურსი 2.8804 ლარს შეადგენს.თურქული ლირა გაუფასურდა, რომლის ღირებულებაც 0.0825 ლარია.დღევანდელი ვაჭრობის შედეგად მიღებული კურსი 2 მაისს შევა ძალაში. 

ნიუ-იორკის სასამართლოს მოსამართლემ, ხუან მერჩანმა თეთრი სახლის ყოფილი ლიდერი დონალდ ტრამპი 9000 დოლარით დააჯარიმა. აღნიშნულის შესახებ reuters-ი იტყობინება.მოსამართლის განცხადებით, ტრამპმა საქმის შესახებ საჯარო კომენტარების გაკეთების შეზღუდვა დაარღვია.მოსამართლემ თქვა, რომ ჯარიმის რაოდენობა, შესაძლოა, არ იყოს საკმარისი შემაკავებელი ფაქტორი, თუმცა მას  უფლებამოსილება არ აქვს, უფრო მკაცრი სანქცია დააწესოს.აღსანიშნავია, რომ მოსამართლე ხუან მერჩანი პორნოვარსკვლავისთვის დუმილის სანაცვლოდ ფულის გადახდის საქმეზე სასამართლო პროცესს უძღვება.„მოპასუხე გაფრთხილებულია, რომ სასამართლო არ მოითმენს მისი კანონიერი ბრძანებების განზრახ დარღვევას და რომ საჭიროების შემთხვევაში დააწესებს პატიმრობას“, - აცხადებს მოსამართლე.მოსამართლემ დააჯარიმა ტრამპი თითოეული ცხრა ონლაინ განცხადებისთვის, რომელიც, მისი თქმით, არღვევდა მის ბრძანებას, არ გაეკრიტიკებინათ მოწმეები ან სასამართლო პროცესის სხვა მონაწილეები.პროკურატურამ შესაძლო დარღვევად 10 პოსტი დაასახელა.

ჩეხეთის ეკონომიკა და ფინანსური სისტემა ევროზე უნდა გადავიდეს, რომ ევროკავშირის წამყვან ქვეყნებს შეესაბამებოდეს. ამის შესახებ ქვეყნის პრეზიდენტ პეტერ პაველმა განაცხადა კონფერენციაზე, რომელიც ჩეხეთის რესპუბლიკის ევროკავშირში გაწევრიანების 20 წლის იუბილეს მიეძღვნა.ინფორმაციას გამოცემა, Idnes ავრცელებს.„თუ ჩვენ გვინდა, ევროპის პირველ ლიგაში ვითამაშოთ, მაშინ ლოგიკურად უნდა დადგეს ევროს მიღების საკითხი. იმ ქვეყნების გამოცდილება, რომლებშიც ევროში გადახდა უკვე მიმდინარეობს, ადასტურებს, რომ უკმაყოფილოა მხოლოდ ის, ვისაც ეს ვალუტა არ აქვს“, - აცხადებს პაველი. პრეზიდენტმა ქვეყნის ევროზე გადასვლის შესახებ საახალწლო გამოსვლის დროსაც ისაუბრა, თუმცა, ბოლო მოწოდებისგან განსხვავებით, მაშინ პეტერ პაველი ეროვნული დისკუსიის გამართვის ინიციატივით გამოვიდა, რამაც საზოგადოებაში მწვავე დებატები გამოიწვია.ცნობისთვის: ევროზე გადასვლის უპირატესობების განხილვა 2023 წლის ოქტომბერში შვედეთმა მას შემდეგ დაიწყო, რაც ეროვნულმა ვალუტა კრონმა გასული წლიდან უპრეცედენტო ვარდნა განიცადა.ევრო ევროკავშირის 27 ქვეყნიდან 20-ში გამოიყენება.

გარემოს ეროვნული სააგენტო ამინდის გაუარესების შესახებ მოსახლეობას აფრთხილებს. „2 მაისის დღის მეორე ნახევრიდან 6 მაისამდე საქართველოში მოსალოდნელია დროგამოშვებით წვიმა, ზოგან ძლიერი, შესაძლებელია ელჭექი, სეტყვა, ელჭექის დროს ქარის ხანმოკლე გაძლიერება.მოსალოდნელმა ძლიერმა ნალექებმა საქართველოს მდინარეებზე შესაძლებელია წყლის დონეების მნიშვნელოვანი მატება, პატარა მდინარეებზე წყალმოვარდნები, ხოლო მთიან ზონებში მეწყრულ-ღვარცოფული პროცესების ჩასახვა-გააქტიურება გამოიწვიოს“, - აღნიშნულია სააგენტოს მიერ გავრცელებულ ინფორმაციაში.

რეკორდული შედეგის დაფიქსირების შემდეგ, ბიტკოინის, ეთერიუმის და სხვა კრიპტოაქტივების ფასები მკვეთრად დაეცა.ამჟამად ინდუსტრიის საერთო კაპიტალიზაცია 2 ტრილიონ 120 მილიარდ დოლარს შეადგენს, რაც ერთ დღეში 9%-ით შემცირებული მაჩვენებელია.თითქმის 15%-ით დაეცა ბიტკოინის ღირებულება ის ამჟამად 56,800 დოლარად ივაჭრება, მისი საბაზრო კაპიტალიზაცია კი $1.1 ტრილიონის ფარგლებშია.რაც შეეხება ეთერიუმს, რიგით მეორე უმსხვილესი კრიპტოაქტივის ფასი 2,800 დოლარს შეადგენს, რაც 13%-ით შემცირებული მაჩვენებელია, მისი კაპიტალიზაცია კი $345 მილიარდს შეადგენს.კრიპტოაქტივების ფასების შემცირება პირდაპირ კავშირშია ახლო აღმოსავლეთის რეგიონში კონფლიქტის ესკალაციასთან და ისრაელის წინააღმდეგ ირანის მიერ განხორციელებულ თავდასხმასთან, რაც რეგიონში გეოპოლიტიკური დაპირისპირების რისკებს მნიშვნელოვნად ზრდის.ასევე გასათვალისწინებელია FED-ისა და ECB-ის მხრიდან მკაცრი მონეტარული პოლიტიკის გახანგრძლივების რისკი, რასაც ინვესტორები განსაკუთრებით ნეგატიურად იღებენ.

ამერიკის შეერთებული შტატების სასამართლოს გადაწყვეტილებით, მსოფლიოს უმსხვილესი კრიპტობირჟის, Binance-ის დამფუძნებელს, ჩანგპენგ ჟაოს 4 თვით თავისუფლების აღკვეთა მიესაჯა.სასამართლოს განმარტებით, ჟაოს ბრალად ედება საერთაშორისო სანქციების დარღვევა, ფულის გათეთრება და გადასახადებისგან თავის არიდება.უნდა აღინიშნოს, რომ აშშ-ის იუსტიციის დეპარტამენტი ჟაოს 3 წლით დაპატიმრებას ითხოვდა. პროკურატურის მტკიცებით, ჩანგპენგ ჟაო სამაგალითოდ უნდა დაისაჯოს და მას თავისუფლების აღკვეთა ხანგრძლივი ვადით უნდა მიესაჯოს, რათა ეს სხვა თაღლითებისთვის იმის მკაფიო მაგალითად იქცეს, რომ მხოლოდ ჯარიმის გადახდით ისინი მართლმსაჯულებას თავს ვერ აარიდებენ.ჟაოს დაცვის მხარე აღნიშნავს, რომ Binance-მა უპრეცედენტო მოცულობის ჯარიმის გადახდაზე განაცხადა თანხმობა, რაც იმაზე მიუთითებს, რომ ჟაო თავის დანაშაულზე პასუხისმგებლობას იღებს და შესაბამისად პასუხისგებისთვის მზადაც არის.შეგახსენებთ, რომ გასულ წელს აშშ-ის ფედერალურმა სასამართლომ Binance-ს 4 მილიარდ 300 მილიონი დოლარის მოცულობის ჯარიმის გადახდა დააკისრა. კომპანიის დამფუძნებელს, ჩანგპენგ ჟაოს კი აღმასრულებელი დირექტორის თანამდებობის დატოვა მოუწია.ამერიკის შეერთებული შტატების იუსტიციის დეპარტამენტის განცხადებით, Binance-ს ბრალად ედება: ფულის გათეთრება, არალეგალური ტრანზაქციების გატარება, საერთაშორისო სანქციების დარღვევა და ულიცენზიოდ ოპერირება. ბრალდებები საკმაოდ მძიმეა და კომპანიის ხელმძღვანელობა საკუთარ დანაშაულსაც აღიარებს, თუმცა მნიშვნელოვანია, რომ Binance-ს ბაზრის მანიპულირებაში, თაღლითობასა და მომხმარებლების აქტივების მიტაცებაში ბრალი არ უმტკიცდება, რაც იმას ნიშნავს, რომ კრიპტობირჟის საქმიანობით კლიენტებს ზარალი არ მიუღიათ.უნდა აღინიშნოს, რომ Binance-ი გლობალურ კრიპტობაზრის თითქმის 80%-ს აკონტროლებს და მას ინდუსტრიაზე კოლოსალური გავლენა აქვს.