ორშაბათიდან თბილისის საბავშვო ბაღების მენიუში რძე და რძის შემცველი პროდუქტი დაბრუნდება,- ამის შესახებ კახა კალაძის მოადგილემ, კახა აბულაძემ საზოგადოებრივი მაუწყებლის ეთერში  განაცხადა.მისი თქმით, სამედიცინო პროტოკოლით,  ნოროვირუსის მიმდინარეობის დროს რძის პროდუქტისა და  შემწვარი საკვების მიღება რეკომენდებული არ არის, თბილისის მერიამ კი სწორედ ამ მითითებით იმოქმედა.,,ცვლილებები მხოლოდ კვების მიმართულებით არ ყოფილა. საგანგებო რეჟიმი გულისხმობს, მათ შორის, სანიტარული და ჰიგიენური მიმართულების სხვა რეჟიმს, რომელიდ ადაპტირებულია ბაღებში ვირუსული პერიოდისას.რაც შეეხება კონკრეტულად რძის პროდუქტს, იქ მხოლოდ რძის პროდუქტზე არ არის საუბარი, დაავადებათა კონტროლის ეროვნულმა ცენტრმა გაავრცელა ეს თავის განცხადებაშიც და ჩვენ ამ რეკომენდაციებს დავეყრდენით - დაავადების მიმდინარეობისას მნიშვნელოვანია, რომ დაავადებულის მხრიდან არ მოხდეს რძის პროდუქტის მიღება, ცხიმის შემცველი პროდუქტის მიღება, ასევე, შემწვარი და სხვა ტიპის პროდუქტების მიღება.ეს დაავადებას კიდევ უფრო ამწვავებს. ეს რეკომენდაცია 3-4 დღით მოგვეცა. ეს პერიოდი უკვე გადის და ორშაბათიდან ჩვეული მენიუ დაუბრუნდება საბავშვო ბაღებს, თავისი კალორაჟით",- აღნიშნა აბულაძემ.

სკოლების მშენებლობისა და რეაბილიტაციის პროცესთან დაკავშირებით უწყებათაშორისი კომისიის მორიგი სხდომა გაიმართა, რომელსაც საქართველოს განათლების, მეცნიერებისა და ახალგაზრდობის მინისტრი გივი მიქანაძე და რეგიონული განვითარებისა და ინფრასტრუქტურის მინისტრი რევაზ სოხაძე ხელმძღვანელობდნენ.ამის შესახებ ინფორმაციას განათლების სამინისტრო ავრცელებს.„კომისიის წევრებმა განიხილეს იმ სკოლების საკითხი, რომელთა შენობების მდგომარეობის შესახებ დასკვნები სსიპ ლევან სამხარაულის სახელობის სასამართლო ექსპერტიზის ეროვნულმა ბიურომ მიმდინარე წლის სექტემბერში მიიღო. აღინიშნა, რომ სამინისტრო თითოეულ ასეთ სკოლასთან მიმართებით, შენობის მდგომარეობის დამაზუსტებელი შეფასების მოთხოვნით, მიმართავს ექსპერტიზას და მიღებული რეკომენდაციების საფუძველზე მიიღებს გადაწყვეტილებებს.განსაკუთრებული ყურადღება გამახვილდა თბილისის 21-ე და მისაქციელის საჯარო სკოლებზე.21-ე სკოლასთან დაკავშირებით, ექსპერტიზის დასკვნის დამაზუსტებელი შეფასების მიხედვით, შენობაში აუცილებელია კონკრეტული სარეაბილიტაციო სამუშაოების ჩატარება. რამდენიმეკვირიანი სამუშაოების შესრულების შემდეგ, შესაძლებელი იქნება 2026-2027 სასწავლო წლის დასრულება იმავე შენობაში. სასწავლო პროცესის გაგრძელების პარალელურად, სკოლაში განხორციელდება არსებული მდგომარეობის მუდმივი მონიტორინგი.რეგიონული განვითარებისა და ინფრასტრუქტურის სამინისტრო და მუნიციპალური განვითარების ფონდი უახლოეს დღეებში დაიწყებენ აღნიშნულ სამუშაოებს, რომლებიც ექსპერტების ზედამხედველობით განხორციელდება“,- ნათქვამია ინფორმაციაში.რაც შეეხება მისაქციელის საჯარო სკოლას, ექსპერტიზის მიერ შენობის მდგომარეობის დამაზუსტებელი შეფასების თანახმად, კომისიამ მიიღო გადაწყვეტილება, რომლის თანახმად, არსებული დაზიანებების პირობებში სასწავლო პროცესი ვერ გაგრძელდება. შესაბამისად, მისაქციელში მუნიციპალური განვითარების ფონდი ახალი სკოლის მშენებლობას დაიწყებს.„შენობის მდგომარეობის დამაზუსტებელმა შეფასებამ აჩვენა, რომ 21-ე საჯარო სკოლაში, უსაფრთხოების დაცვის თვალსაზრისით, კონკრეტული სარეაბილიტაციო სამუშაოები აუცილებლად არის ჩასატარებელი, რასაც რამდენიმე კვირა დასჭირდება. ამის შემდეგ მოსწავლეები სკოლაში დაბრუნდებიან, სადაც სწავლა-სწავლების პროცესი მიმდინარე სასწავლო წლის ბოლომდე, შენობის მდგომარეობის უწყვეტი მონიტორინგის პირობებში, გაგრძელდება. ზაფხულიდან კი სკოლაში სრულმასშტაბიანი სარეკონსტრუქციო სამუშაოები განხორციელდება, რა დროსაც სასწავლო პროცესი ალტერნატიულ შენობაში გაგრძელდება.რაც შეეხება მისაქციელის საჯარო სკოლას, შენობის დაზიანების კატეგორიიდან გამომდინარე, არსებულ შენობაში სასწავლო პროცესის გაგრძელება შეუძლებელია. განათლების სამინისტრომ მოსწავლეებს სწავლის ალტერნატიულ სკოლაში გაგრძელება შესთავაზა. პარალელურად, მუნიციპალური განვითარების ფონდი მისაქციელში ახალი სკოლის მშენებლობას განახორციელებს,“ - განაცხადა გივი მიქანაძემ.შეგახსენებთ, რამდენიმე დღის განმავლობაში 21-ეს სკოლასთან აქცია იმართებოდა.ამ დრომდე, როგორც განათლების სამინისტროს წარმომადგენლები აცხადებდნენ, ჩატარებულმა ექსპერტიზამ აჩვენა, რომ 21-ე საჯარო სკოლის ისტორიული შენობა ავარიულ მდგომარეობაშია და რეაბილიტაციას არ ექვემდებარება, რის გამოც მიიღეს მისი დემონტაჟისა და იმავე ადგილზე ახალი სკოლის აშენების გადაწყვეტილება.სასკოლო საზოგადოებას თავიდანვე მიაჩნდა, რომ ექსპერტიზის დასკვნა ზედაპირული იყო და შენობის გამაგრება შესაძლებელია. მათ ასევე აწუხებდათ ის გარემოება, რომ დემონტაჟისა და მშენებლობის პროცესი წლები გაგრძელდება, რაც სასწავლო პროცესსა და გერმანული ენის გაძლიერებულ პროგრამას საფრთხეს შეუქმნის. ასევე მოსწავლეების სხვადასხვა სკოლაში გადანაწილების გეგმამ მშობლების უკმაყოფილება გამოიწვია ინფრასტრუქტურული გაუმართაობის, ტრანსპორტირებისა და ინკლუზიური სწავლების პირობების არარსებობის გამო.აღსანიშნავია კიდევ ერთი საკითხი, რომ დასკვნა ექსპერტიზის ბიუროს მიერ გაცემულია 10 სექტემბერს. 15 სექტემბერს კი, სკოლაში სწავლა საზეიმოდ დაიწყო და მხოლოდ 17 სექტემბერს საღამოს შეატყობინეს მოსწავლეებს რომ სასწავლო პროცესი 18 სექტემბრიდან აღარ განახლდებოდა. რატომ არ იცოდნენ შენობის ავარიულობის შესახებ ორი დღის ადრე, როცა სწავლა დაიწყო და რატომ არ მოხდა შესაბამისი რეაგირება მთელი ზაფხულის განმავლობაში? ამ კითხვის პასუხად, განათლების მინისტრმა გივი მიქანაძემ აღნიშნა, რომ დოკუმენტი სამინისტროში მხოლოდ 17 სექტემბერს, დღის მეორე ნახევარში მიიღეს და მყისიერი რეაგირება მოახდინეს.

საქართველოში საარსებო შემწეობის მიმღებთა რაოდენობა ისევ მცირდება. სოციალური მომსახურების სააგენტოს მონაცემებით, მხოლოდ ერთ თვეში საარსებო შემწეობა 6 546 ადამიანს შეუწყდა, იანვრიდან აგვისტოს ჩათვლით კი ბაზიდან ჯამში 139 870 ადამიანის ამოღება მოხდა.კერძოდ, 2026 წლის ივლისში საარსებო შემწეობის მიმღებთა რაოდენობა 576 902-ს შეადგენდა, ეს მაჩვენებელი აგვისტოში 570 356-ს გაუტოლდა. 2026 წლის იანვარში სახელმწიფოსგან ფინანსურ დახმარებას 710 226 სოციალურად დაუცველი იღებდა.უფრო კონკრეტულად, „ბიზნესპრესნიუსი“ გთავაზობთ სოციალური დახმარების მიმღებთა რაოდენობას მიმდინარე წლის იანვარ-აგვისტოს პერიოდში: იანვარი - 710 226 ადამიანი; თებერვალი - 709 458 ადამიანი; მარტი - 667 793 ადამიანი; აპრილი - 645 920 ადამიანი; მაისი - 605 033 ადამიანი; ივნისი - 584 137 ადამიანი; ივლისი - 576 902 ადამიანი; აგვისტო - 570 356 ადამიანი. შეგახსენებთ, სოციალურად დაუცველი ოჯახების მონაცემთა ბაზაში რეგისტრირებული ადამიანების ე.წ. გაბერილ რაოდენობასთან დაკავშირებით თავდაპირველად განცხადება პრემიერმა ირაკლი კობახიძემ 2025 წლის 26 ნოემბერს გააკეთა. მაშინ პრემიერმა თქვა, რომ „ამჟამად სოციალურ დახმარებას იმაზე მეტი ადამიანი იღებს საქართველოში, ვიდრე ღარიბია და ამიტომ, ეს მაჩვენებელი გადასახედია.“ხელისუფლებამ საარსებო შემწეობის მიმღები ოჯახების გადამოწმება და კრიტერიუმების შეცვლა მიმდინარე წლის დასაწყისში დააანონსა. როგორც მაშინ ჯანდაცვის მინისტრმა მიხეილ სარჯველაძემ განაცხადა, ამის მიზეზია ის, რომ ბაზაში დარჩნენ ის ადამიანები, ვისაც რეალურად ეკუთვნით სახელმწიფოს ფინანსური დახმარება.მოგვიანებით კი მთავრობამ სოციალურად დაუცველი ოჯახების მონაცემთა ბაზაში რეგისტრაციის წესები შეცვალა. მთავრობის ახალი დადგენილებით, სისტემაში გაჩნდა მკაცრი ფინანსური ზღვარი, რომელიც მაღალი შემოსავლის მქონე პირებს დახმარების მიღების შესაძლებლობას ავტომატურად უწყვეტს.BPN

2026 წლის აგვისტოში თბილისში საცხოვრებელი უძრავი ქონების ბაზარზე უცხოელი მყიდველების აქტივობა მცირედით გაიზარდა. მათი წილი მთლიან ტრანზაქციებში 14%-მდე გაიზარდა, მაშინ როდესაც ივლისში ეს მაჩვენებელი 12% იყო.Colliers-ის კვლევის მიხედვით, უცხოელი მყიდველების წილის ზრდის მიუხედავად, როგორც ძველი, ისე ახალი პროექტების შემთხვევაში, უძრავ ქონებას ძირითადად საქართველოს მოქალაქეები ყიდულობენ.აგვისტოში თბილისში სულ 3 388 საცხოვრებელი ბინა გაიყიდა, რაც 2025 წლის აგვისტოს მაჩვენებელს 18.9%-ით აღემატება. ამასთან, ბაზრის მოცულობა წლიურად 35.2%-ით გაიზარდა და 297 მილიონი აშშ დოლარი შეადგინა.გაყიდვების ზრდის ყველაზე მაღალი ტემპი ახალაშენებულ პროექტებში დაფიქსირდა და 23.7% შეადგინა. Colliers-ის შეფასებით, აღნიშნულ ზრდაში მნიშვნელოვანი წვლილი სამგორისა და დიდი დიღმის რაიონებს მიუძღვის.ამავე პერიოდში, გაიზარდა საცხოვრებელი უძრავი ქონების ფასებიც. 2025 წლის აგვისტოსთან შედარებით, ახალაშენებული ბინების საშუალო შეწონილი გასაყიდი ფასი ქალაქის ცენტრში 16.7%-ით, ფართო ცენტრში 16%-ით, ხოლო გარეუბნებში 10.4%-ით გაიზარდა.ბათუმში უცხოელი მყიდველები უმრავლესობაში არიანთბილისისგან განსხვავებით, ბათუმის საცხოვრებელი უძრავი ქონების ბაზარზე აგვისტოში უცხოელი მყიდველების წილმა ქართველების მაჩვენებელს გადააჭარბა.Colliers-ის მონაცემებით, უცხოელების წილმა ძველ და ახალ პროექტებში 52% შეადგინა. ივლისში ეს მაჩვენებელი 48% იყო, საქართველოს მოქალაქეების წილი კი 50%-ს შეადგენდა.აგვისტოში ბათუმში საცხოვრებელი უძრავი ქონების 1 235 ტრანზაქცია დარეგისტრირდა, რაც გასული წლის იმავე თვესთან შედარებით 4.3%-ით ნაკლებია. მიუხედავად ტრანზაქციების შემცირებისა, ბაზრის მოცულობა 2.9%-ით გაიზარდა და 81 მილიონ აშშ დოლარს მიაღწია.

ე.წ. დეზერტირების ბაზრის ტერიტორიაზე მოვაჭრეებმა დღეს გზა გადაკეტეს. თვითდასაქმებულების პროტესტი ბაზრის ადმინისტრაციის მოთხოვნას მოჰყვა, რომლის მიხედვითაც მათ ტერიტორიის დატოვება და მუშაობის შეწყვეტა მოუწევთ. არსებული ინფორმაციით, მოვაჭრეებს უთხრეს, რომ 1-ელი ოქტომბრიდან ბაზრის ტერიტორიაზე ვეღარ იმუშავებენ.მოვაჭრეები ტერიტორიის დატოვებას არ აპირებენ და აცხადებენ, რომ სამუშაო ადგილების შენარჩუნება სურთ. მათი თქმით, ისინი სავაჭრო ადგილებში იჯარას იხდიან და ადმინისტრაციისგან კონკრეტულ განმარტებას ითხოვენ, რა ბედი ელის მათ საქმიანობას.მოვაჭრეების უკმაყოფილება ტერიტორიის სარეაბილიტაციო სამუშაოების დაწყების საკითხიც უკავშირდება. გავრცელებული ინფორმაციით, სექტემბრის შუა რიცხვებში დაზიანებული მილის გამო ბაზრის ნაწილი საკანალიზაციო წყლით დაიტბორა და ადგილზე სარეაბილიტაციო სამუშაოები დაიწყო.ამასთან, ბაზრის ტერიტორიაზე ახალი სავაჭრო ცენტრის მშენებლობაა დაგეგმილი, რის გამოც ტერიტორიის მომავალი წლებია განხილვის თემაა.ტერიტორიაზე ორსართულიანი სავაჭრო ცენტრის მოწყობა იგეგმება და პროექტზე მშენებლობის ნებართვა გაცემულია. მოვაჭრეები შიშობენ, რომ არსებული სავაჭრო ადგილების გაუქმების შემდეგ ახალ კომპლექსში მუშაობის გაგრძელებას ვეღარ შეძლებენ და შემოსავლის გარეშე დარჩებიან. სწორედ ამიტომ ისინი ითხოვენ, არსებული სავაჭრო სივრცე შეინარჩუნონ და სამუშაო ადგილებიდან არ გაიყვანონ.„მოვითხოვთ, მოვიდნენ მერიის წარმომადგენლები და გაგვცენ კონკრეტული პასუხები... მივმართავთ ბატონ კალაძეს, კობახიძეს, ბატონ ბიძინა ივანიშვილს, რომ ეს ერთი ბაზარი, კი კერძოდ გაყიდეს და ვიღაცას ჩაუგდეს ხელში, მაგრამ ხალხისთვისაც უნდა იყოს. არ ვითხოვთ არანაირ დახმარებას, ფულს... რა ხდება ვერ გავიგეთ, არც ადმინისტრაცია გვცემს პასუხს, არც მერია. ვიცით, რომ მოლის აშენება უნდათ, გადაგვითხარეს ადგილი“, - თქვა დღეს ერთ-ერთმა თვითდასაქმებულმა მოვაჭრემ.

ბოლო პერიოდში საქართველოში ე.წ. თაღლითურმა ფინანსურმა პირამიდამ ისეთ მასშტაბს მიაღწია, რომ ეროვნულ ბანკს საგანგებო განცხადების გაკეთებამ მოუწია, რათა მოსახლეობა ამ თაღლითურ სქემებში არ გაებას. როგორც აღმოჩნდა, პრობლემა არ არის ახალი და ამიტომაც გაჩნდა კითხვა, რა მასშტაბს მიაღწია, პრევენციისთვის საჭირო ზომები ტარდება თუ არა და საერთოდ, რისი გაკეთებაა აუცილებელი, ამ საკითხებზე ვესაუბრებით ალექს სუდაძეს, კრიპტოვალუტების სერტიფიცირებულ ექსპერტს.- ფინანსური პირამიდები ახალი მოვლენა არ არის, ის უკვე ასი წელია არსებობს და განსაკუთრებით მაშინ აქტიურდება, როცა ქვეყანაში დიდი კრიზისია. მაგალითად, მეორე მსოფლიო ომის პერიოდში მძიმე ეკონომიკური ფონის გამო ეს სქემები ევროპასა და ამერიკაში ძალიან აქტუალური გახდა.როდესაც მოსახლეობას ეკონომიკურად უჭირს და დასაქმების პრობლემაა, სწორედ მაშინ იჩენს თავს მსგავსი თაღლითური სქემები. ამ დროს სამსახურდაკარგულ ადამიანებს, რომლებსაც მცირე დანაზოგი აქვთ და მომდევნო თვეში ვალები აქვთ გასასტუმრებელი, გამოსავლის პოვნა უჭირთ. ამიტომ ისინი მარტივად თანხმდებიან უეცრად გამოჩენილ "შემოსავლიან" შეთავაზებებს.სწორედ მოსახლეობის ამ მოწყვლადი მდგომარეობით სარგებლობენ ქსელური მარკეტინგის წარმომადგენლები თუ ფინანსური პირამიდის სპეციალისტები. ეს პირები ქვეყანაში შემთხვევით არ შემოდიან. თავდაპირველად რამდენიმე მათგანი წინასწარ, საფუძვლიანად სწავლობს არსებულ ფონს, იწყებენ ბაზრის კვლევას - აანალიზებენ ქვეყნის მოსახლეობასა და პოტენციურ მსხვერპლთა რაოდენობას. მაგალითად, თუ საქართველოს მოსახლეობა 4 მილიონია, გამოთვლიან, რომ აქედან თაღლითურ სქემაში პირობითად 250 000 კაცის ჩართვაა შესაძლებელი. ამის შემდეგ ფასდება "საშუალო ჩეკი" - რა თანხის მიღებას შეძლებენ თითოეული პირისგან, იქნება ეს 100, 1000 თუ 1500 დოლარი.საქართველოში ჩვენი მოსახლეობის ძირითადი ნაწილი თბილისსა და ბათუმშია თავმოყრილი, მაგრამ ფინანსური პირამიდების ორგანიზატორებმა გადაწყვიტეს, რომ აქტიურად გავიდნენ რეგიონებშიც. ბოლო, "ტი-ეს-ქიუს" (TSQ) სქემაში აქტიურად იყო ჩართული საქართველოს სხვადასხვა რეგიონი. სიტუაცია იქამდეც კი მივიდა, რომ ხალხი ფულის საშოვნელად ძროხებს აგირავებდა.- მაინცდამაინც რეგიონები რატომ, ეს ინფორმაციის ნაკლებობას უკავშირდება?- ფინანსური პირამიდების ორგანიზატორები მასობრივად დარტყმისთვის მიზანმიმართულად იყენებენ ე.წ. რეგიონულ ეფექტსა და ნათესაურ კავშირებს. როდესაც რაიონში მცხოვრები ნაცნობი მოულოდნელად მდიდრდება და ახალ მანქანას ყიდულობს, ეს ინფორმაცია სწრაფად ვრცელდება და დედაქალაქის მოსახლეობაზეც უძლიერესად მოქმედებს. უხერხულობისა და შელახული ეგოს გამო, მძიმე შრომაში ჩაბმული, 1500-ლარიანი ხელფასის მქონე მოქალაქეებიც კი მარტივად ებმებიან მახეში.მსხვერპლის მოსაზიდად თაღლითები ასევე აქტიურად იყენებენ ხელოვნურ ინტელექტს და ცნობილი ადამიანების მონაწილეობით ყალბ ვიდეოებს ქმნიან, რის ამოცნობაც ხალხს უჭირს.სქემაში ჩართული ადამიანი მოგვიანებით თავისიანებსაც ითრევს, რასაც ორი მიზეზი აქვს: სხვების ხარჯზე ფულის დაბრუნების სურვილი და ფსიქოლოგიური ფაქტორი, რომ მარტო თვითონ არ აღმოჩნდეს სულელის როლში.რეალურად, წლების განმავლობაში პირამიდების მუშაობის მთავარი პრინციპი უცვლელია და მხოლოდ მათი სახელები იცვლება. ერთადერთი სიახლე ტექნოლოგიების განვითარება და სქემაში კრიპტოვალუტის დამატებაა, რომელსაც მხოლოდ ქვეყნიდან ფულის გასატანად იყენებენ.ვინაიდან რეგიონებში კრიპტოვალუტას ნაკლებად იცნობენ, თაღლითები P2P (პეოპლე ტო პეოპლე) ვაჭრობაში რთავენ ე.წ. დროპერებს. ამ როლს ძირითადად ფინანსურ რისკებში გაუთვითცნობიერებელი სტუდენტები ან ექსპატები (ანუ ექსპატრიანტი - სხვა ქვეყანაში საკუთარი ნებით მომუშავე ან დროებით მცხოვრები პირი) ასრულებენ. მცირე საკომისიოს სანაცვლოდ ისინი საკუთარ ანგარიშებზე დაზარალებულებისგან თანხას იღებენ, ყიდულობენ კრიპტოვალუტას და თაღლითებს უგზავნიან. ბანკი მხოლოდ ადგილობრივ ჩარიცხვას ხედავს, კრიპტოს შემდგომი მისამართი კი მისთვის უხილავია. შესაბამისად, როცა მოტყუებული მსხვერპლი ჩივის, გამოძიება პირველ რიგში სწორედ ამ უნებლიე მონაწილე "დროპერებთან" მიდის.ზოგადად, კრიპტოვალუტის გამოყენება თაღლითებს საშუალებას აძლევს მითვისებული ფული მომენტალურად, მსოფლიოს ნებისმიერ წერტილში გადაიტანონ.კრიპტოსაფულეს გეოგრაფია არ გააჩნია, რაც ფულის კვალის პოვნას ართულებს. სანამ ადგილობრივი გამოძიება ტრანზაქციებს მიაკვლევს და საქმეში საერთაშორისო სამძებრო სამსახურებს ჩართავს, ფასდაუდებელი დრო იკარგება და პროცესი ხშირად 2-3 წელიწადს ჭიანურდება.- რატომ ვერ ხერხდება ან პრევენცია, ან ადეკვატური რეაგირება?- სამწუხაროდ, მოსახლეობას უჭირს გააზრება, რომ შეუძლებელია 100 ან 400 ლარით საქმის დაწყება და მოკლე დროში 10.000 ლარის მოგება. ეს არარეალურია. მსგავსი სქემები წლებია არსებობს, თუმცა დღეს ტექნოლოგიების განვითარებამ ისინი უფრო დამაჯერებელი გახადა. მაგალითად, ხელოვნური ინტელექტით (AI) შექმნილი და გახმოვანებული ყალბი ვიდეოები ძალიან რეალისტურად გამოიყურება. პარალელურად კი, კრიპტოვალუტა თაღლითებს თანხების სწრაფად გატანის საშუალებას აძლევს.კომერციულმა ბანკმა შეიძლება შეამჩნიოს საეჭვო ტრანზაქციები, მაგალითად, თუ პირს სხვადასხვა ქალაქიდან პერიოდულად ერიცხება თანხები. ასეთ დროს ბანკს მონიტორინგის მექანიზმები აქვს და საგამოძიებო სამსახურის ჩარევის შემთხვევაში ანგარიში შეიძლება დაიბლოკოს. კრიპტოვალუტის შემთხვევაში კი ანგარიშს ვერავინ გაყინავს, სანამ საგამოძიებო უწყება მას ოფიციალურად არ მონიშნავს თაღლითურად. როგორც კი კრიპტობირჟა ხედავს, რომ მისამართი მარკირებულია, ის ყინავს ამ ანგარიშზე არსებულ თანხებს, რაც გამოძიებას საქმეს უადვილებს. თუმცა ბირჟა ვერასდროს მიხვდება, კონკრეტული ტრანზაქცია საქართველოს თაღლითური სქემიდან მომდინარეობს თუ, მაგალითად, ვიეტნამის კორუფციული გარიგებიდან, რადგან კრიპტომისამართებს გეოგრაფია არ უწერია. შესაბამისად, ფული "სუფთად" ითვლება მანამ, სანამ მომჩივანი არ გამოჩნდება. საგამოძიებო სამსახური მისამართების მარკირებას მხოლოდ საჩივრის საფუძველზე იწყებს. პრობლემა კი ისაა, რომ მოტყუებული ადამიანები ხშირად დუმილს ამჯობინებენ. ისიც უნდა ვთქვათ, რომ დაზარალებულები ხშირად ვერ აცნობიერებენ კოლექტიური სარჩელის ძალას. როდესაც მხოლოდ ერთი პირი ჩივის, გამოძიებისთვის რთულია თაღლითობის დამტკიცება. მართალია, ადამიანმა თანხა მოტყუებით გადარიცხა, მაგრამ ფაქტის იურიდიულად დასაბუთება და თაღლითობის მუხლის მისადაგება რთულია. ერთ ინდივიდზე შეიძლება იფიქრონ, რომ უბრალოდ პირადი, ნეგატიური განწყობის გამო ჩივის, მაგრამ, როცა საჩივარს 100 ან 200 კაცი ერთობლივად აწერს ხელს, საქმე იცვლება. 100 კაცი ერთსა და იმავე ისტორიას ვერ მოიგონებს. ასეთ დროს თაღლითობის ფაქტი აშკარა ხდება და ბრალის წაყენებაც გაცილებით მარტივია.- კონკრეტულად საქართველოზე რომ გავაკეთოთ ფოკუსირება, არის რამე აქ განსხვავებული ფაქტორი?- ბოლო წლებში, ტექნოლოგიური პროგრესისა და ავტომატიზაციის გამო გაზრდილმა უმუშევრობამ ადამიანები მსგავსი სქემების მიმართ კიდევ უფრო მოწყვლადი გახადა. თაღლითები იყენებენ ფსიქოლოგიურ მანიპულაციასა და აგრესიულ ზეწოლას, მაგალითად, ფულის დროულად არმიტანის შემთხვევაში "გუნდიდან გაგდების" მუქარას. ისინი მსხვერპლს მარტივი გამდიდრების ილუზიას უქმნიან, იქნება ეს, მაგალითად, მუსიკის ასაკოვანი პედაგოგის უეცრად "ფინანსურ ანალიტიკოსად" გადაქცევა თუ პენსიონერის დარწმუნება, რომ მცირე ინვესტიციით უზარმაზარ მოგებას ნახავს.ამ ყველაფრის მთავარი მიზეზი ფინანსური განათლების ნაკლებობაა. განაგრძეთ კითხვა

საქართველოს მთავრობის დადგენილებით, მიმდინარე წლის 1 ივლისიდან, ცხოველთა მოვლისა და ჰიგიენური მომსახურების (გრუმინგი) ობიექტები ვეტერინარულ კონტროლს დაექვემდებარა. კანონის ამოქმედებამდე სურსათის ეროვნულმა სააგენტომ გასცა რეკომენდაციები და ვეტერინარული საქმიანობის განმახორციელებელ ბიზნესოპერატორებს დეტალურად გააცნო ის მოთხოვნები, რომელთა შესრულებას მათ კანონი ავალდებულებს.სააგენტოს ინსპექტორებმა ცხოველთა ჰიგიენური მომსახურების ობიექტების შემოწმება თბილისში დაიწყეს. სახელმწიფო კონტროლის დროს გამოვლინდა როგორც კრიტიკული, ასევე არაკრიტიკული შეუსაბამობები.მიმდინარე წელს საქართველოში მოქმედი ყველა ობიექტის შემოწმებაა დაგეგმილი.ვეტერინარულ კონტროლს დაქვემდებარებულმა ობიექტებმა, ჰიგიენური ნორმებისა და სხვა რეგულაციების დაცვის პარალელურად, ყურადღება უნდა გაამახვილონ შინაური ბინადარი ცხოველის იდენტიფიკაცია-რეგისტრაციაზე. თუ ცხოველის შესახებ ინფორმაცია მონაცემთა ერთიან ბაზაში არ არის ასახული, ობიექტებს  მომსახურების გაწევის უფლება არ ექნებათ.

თბილისში დევნილებისთვის ბინების გადაცემის ღონისძიება გაიმართა. მთავრობის ადმინისტრაციის ინფორმაციით, დღეს ბინა 1600 ოჯახს გადაეცა.„ეს არის ყველაზე მასშტაბური პროექტი, რომელიც აქამდე განხორციელებულა. მთლიანობაში მასში ჩაიდო 280 მლნ ლარის ინვესტიცია და თბილისში თანამედროვე სტანდარტების საცხოვრებელი უბანი შეიქმნა.პროექტი მოიცავს 11 კორპუსს, 2400-ზე მეტ ბინას. 4 შენობაში მოსახლეობის ნაწილი უკვე შესახლდა, დღეს კი 1600 ოჯახი იწყებს ცხოვრებას კომპლექსის ახალ, მშვიდ ბლოკში.დევნილების საცხოვრებლით უზრუნველყოფა არის ჩვენი ხელისუფლების ერთ-ერთი მთავარი პრიორიტეტი და ჩვენი ძალისხმევა მხოლოდ თბილისით არ შემოიფარგლება.ძალიან მნიშვნელოვანი პროექტები ხორციელდება რეგიონებში - რუსთავში 800 დევნილისთვის 4 კორპუსი შენდება, ზუგდიდში 1700 ბინა 7 ახალ კორპუსში იქნება უზრუნველყოფილი, ბორჯომში ახალ სახლებს 150 დევნილი მიიღებს - ეს არის მასშტაბური პროექტი და მიზანია, ყველა დევნილი ოჯახი იყოს უზრუნველყოფილი“, - განაცხადა ირაკლი კობახიძემ.

რუსთავიდან თბილისის მიმართულებით მოძრავი მიკროავტობუსებით მგზავრობის ღირებულება 50 თეთრით მოიმატა და 2.50 ლარის ნაცვლად, მგზავრობის საფასური 3 ლარი გახდა.მგზავრების ინფორმაციით, ახალი ტარიფი კომპანია „ინტერტრანსის“ მიერ თბილისის მიმართულებით მომსახურების ყველა მარშრუტზე მოქმედებს.ტარიფის ზრდის მიზეზად საწვავის ფასის მატება სახელდება.

თბილისის საბავშვო ბაღებში, სადაც სავარაუდო კვებითი ინტოქსიკაციის შემთხვევები დაფიქსირდა, ლაბორატორიული სინჯები აიღეს და გამოკითხვაზე დაიბარეს იმ კომპანიების წარმომადგენლები, რომლებიც მათ ამარაგებდნენ.გამოძიებას აინტერესებს, რა იყო მიზეზი, რის გამოც 55 ბავშვი და ერთი აღმზრდელი კლინიკაში გადაიყვანეს, ასობით ბავშვმა კი ვერ შეძლო საბავშვო ბაღში მისვლა იმის გამო, რომ სააღმზრდელო დაწესებულება დახურული იყო.სავარაუდო ინტოქსიკაციის შემთხვევა თბილისის 20 საბავშვო ბაღში დაფიქსირდა, მათგან სასწავლო პროცესი სრულად შეწყდა შვიდში, თუმცა დანარჩენ 13-ში მშობლების დიდმა ნაწილმა ბავშვები აღარ მიიყვანა.პირველად ეჭვი საკვებზე გაჩნდა, თუმცა ბაღის დირექტორები, არ გამორიცხავენ რაიმე ვირუსის გავრცელებას.17 სექტემბერს, როცა შეიძლება ინტოქსიკაციის შემთხვევა მომხდარიყო, თბილისის საბავშვო ბაღების მენიუში იყო რძის პროდუქტები, ხორცი და ბოსტნეული. როგორც ირკვევა, ამ პროდუქტებს თბილისის საბავშვო ბაღებს ერთი და იგივე კომპანიები აწვდიან. ი.მ. მანანა ღვინცაძე საბავშვო ბაღებს აწვდის რძის პროდუქტებს: რძე, მაწონი, ხაჭო, არაჟანი. ტენდერის პირობების მიხედვით, კომპანიამ საბავშვო ბაღებს უნდა მიაწოდოს ბელორუსული რძე და საქართველოში წარმოებული სხვა რძის პროდუქტები. "თარეა" — ხორცი. ტენდერის მიხედვით, „ხორცი უნდა იყოს ძროხის, ახალი, გაუყინავი, გაცივებული, ძვალგამოცლილი“. შპს „ინ“ — ხილ-ბოსტნეული, კარაქი, პური, ბურღულეული, ქათამი. ტენდერის მიხედვით, ნაღების კარაქი და რძის ფხვნილი უნდა იყოს ირანული და ბელორუსული წარმოების, ქათამი [ჯერ არ შეუტანიათ] კი — ქართული. „სრული პასუხისმგებლობით ვაცხადებთ, რომ საბავშვო ბაღებში პროდუქტების შეტანის, დასაწყობების, მომზადებისა და მიწოდების წესები მკაცრ ყოველდღიურ კონტროლს გადის, რათა აღსაზრდელებამდე მივიდეს უსაფრთხო და სტანდარტით გათვალისწინებული საკვები. ასევე ზედმიწევნით არის დაცული სანიტარიულ-ჰიგიენური ნორმები და მოთხოვნები“ - ეწერა თბილისის საბავშვო ბაგა-ბაღების მართვის სააგენტოს განცხადებაში.18 სექტემბერს თბილისში შვიდმა საბავშვო ბაღმა, „ეპიდემიოლოგიური რისკების დაზღვევის მიზნით“, აღსაზრდელები არ მიიღო. საუბარია მე-10, 22-ე, 31-ე, 49-ე, 59-ე, 109-ე და 124-ე ბაღებზე.ბაღების დირექტორებმა განაცხადეს, რომ მათ ბაღებში ყველა პროდუქტი შესაბამისი დოკუმენტაციით და პირობებით შედის. მათივე განცხადებით, ამ ეტაპზე ინტოქსიკაციის გამომწვევ მიზეზზე კონკრეტული ინფორმაცია არ აქვთ და საბოლოო პასუხს შესაბამისი კვლევების დასრულებას ელოდებიან. საბოლოოდ ამის შემდეგ გაირკვევა ინტოქსიკაციაა თუ ვირუსი. „როგორც ჩანს, იყო რაღაც კონკრეტული პრობლემა, თუმცა მე წინ ვერ გავუსწრებ მოვლენებს, მთავარია, რომ შესაბამისმა უწყებებმა გაარკვიონ, რა იყო მიზეზი, იყო თუ არა ამაში კონკრეტული კომპანიის ან კომპანიების ბრალეულობა. ამ შემთხვევაში პასუხისმგებლობაც დადგება“, - განაცხადა ირაკლი კობახიძემ, რომელიც ოთხი დღის წინ საჯარო ბაღების მიღწევებზე საუბრობდა.შეგახსენებთ, ფინანსთა სამინისტროს საგამოძიებო სამსახურის თანახმად, საგამოძიებო და საპროცესო მოქმედებები, მათ შორის, ჩხრეკა, მთელი ღამის განმავლობაში მიმდინარეობდა ოთხ ბაგა ბაღსა და მათთვის საკვები პროდუქტების მიმწოდებელ სამ კომპანიაში. გამოკითხეს 50-ზე მეტი ბავშვის კანონიერი წარმომადგენელი და სამედიცინო დაწესებულებების თანამშრომლები.გამოძიება მიმდინარეობს საქართველოს სისხლის სამართლის კოდექსის 198-ე მუხლის მეორე ნაწილით - სიცოცხლისათვის საშიში პროდუქციის დამზადება-რეალიზაციისთვის ხუთიდან რვა წლამდე პატიმრობაა გათვალისწინებული.„ამ ეტაპზე არსებული ინფორმაციით, ინტოქსიკაცია შესაძლოა ბაქტერიულ ინფექციას უკავშირდებოდეს, რომლის წყაროც, სავარაუდოდ, ბაგა-ბაღებში მიღებული საკვები პროდუქტია“, - ამბობენ საგამოძიებო უწყებაში.მომზადებულია „რადიო თავისუფლების“ მასალის მიხედვით

საქართველოში მოქმედი ტაქსის კომპანია Bolt-ი 2026 წლის დღეიდან, 18 სექტემბრიდან, მგზავრობის ტარიფებს 12%-ით აძვირებს.მოკლე ტექსტური შეტყობინებები კომპანიისგან Bolt-ის მომხმარებელთა ნაწილსა და „პარტნიორ მძღოლებს“ 17 სექტემბერს, საღამოს საათებში მიუვიდათ.Bolt-ის საიტზე წერია: „18 სექტემბრიდან მგზავრობის ტარიფები ყველა კატეგორიაში 12%-ით გაიზრდება (ცვლილება არ ეხება მინიმალურ ტარიფებს)“.„ვიცით, რამდენი შრომა, დრო და პასუხისმგებლობა დგას თქვენი ყოველდღიური საქმიანობის უკან. საწვავისა და ავტომობილის მოვლის ხარჯების ზრდა, სხვა ყოველდღიურ ხარჯებთან ერთად, პარტნიორი მძღოლების შემოსავალზეც აისახება. ჩვენ მუდმივად ვაკვირდებით ბაზრის მონაცემებს და სწორედ ამ დაკვირვების საფუძველზე მივიღეთ ტარიფების გაზრდის გადაწყვეტილება. მიგვაჩნია, რომ ეს თქვენი შემოსავლის მხარდაჭერისთვის აუცილებელი ნაბიჯია. პარტნიორი მძღოლების ღირსეულ შემოსავალზე ზრუნვა ყოველთვის იყო ჩვენი პრიორიტეტი და მომავალშიც ასე დარჩება. მადლობა ნდობისთვის, ყოველდღიური შრომისთვის და იმისთვის, რომ ჩვენთან ერთად ქალაქს გადაადგილებაში ეხმარებით. გისურვებთ უსაფრთხო მგზავრობებსა და შემოსავლიან სამუშაო დღეებს", - ნათქვამია კომპანიის განცხადებაში, რომელიც მძღოლებს მიემართება.შეახსენებთ, ბოლო ერთ თვეში საწვავი კიდევ 20-45 თეთრით გაძვირდა.

თბილისის 7 საბავშვო ბაგა-ბაღში სააღმზრდელო პროცესი დროებით შეჩერდა. თბილისის საბავშვო ბაგა-ბაღების სააგენტოს განცხადებით, გადაწყვეტილება ეპიდემიოლოგიური რისკების დაზღვევის მიზნით მიიღეს.სააგენტოს ინფორმაციით, ფინანსთა სამინისტროს საგამოძიებო სამსახური თბილისში მდებარე 20 ბაგა-ბაღში 55 აღსაზრდელისა და ერთი აღმზრდელის ინტოქსიკაციის ფაქტს იძიებს.გამოძიება სისხლის სამართლის კოდექსის 198-ე მუხლის მეორე ნაწილით მიმდინარეობს, რომელიც ადამიანის სიცოცხლისა და ჯანმრთელობისთვის საშიში პროდუქციის დამზადებასა და რეალიზაციას ეხება, თუ აღნიშნულმა ქმედებამ ადამიანის სიცოცხლეს ან ჯანმრთელობას საფრთხე შეუქმნა.უწყების ცნობით, მთელი ღამის განმავლობაში ჩხრეკა ოთხ ბაგა-ბაღსა და საბავშვო ბაღებისთვის საკვები პროდუქტების მიმწოდებელ სამ კომპანიაში მიმდინარეობდა.ამ ეტაპზე არსებული ინფორმაციით, ინტოქსიკაციის შემთხვევები შესაძლოა ბაქტერიულ ინფექციას უკავშირდებოდეს, რომლის სავარაუდო წყაროდაც ბაგა-ბაღებში მიღებული საკვები განიხილება. კონკრეტულად რომელი პროდუქტი გახდა ინტოქსიკაციის მიზეზი, შესაბამისი ექსპერტიზის შედეგად დადგინდება.„თბილისის რამდენიმე საჯარო ბაღში რეგისტრირებულ აღსაზრდელს დაუფიქსირდა ცხელება, რიგ შემთხვევებში გულისრევა და ღებინება, რომელთაც მიმართეს სხვადასხვა კლინიკას.ეპიდემიოლოგების რეკომენდაციით, კანონმდებლობის შესაბამისად, 7 საჯარო ბაღში, ეპიდემიოლოგიური რისკების დაზღვევის მიზნით, შეჩერდა სააღმზრდელო პროცესი, დანარჩენი 183 ბაღი აგრძელებს ფუნქციონირებას.სააგენტო ყველა შესაბამის უწყებასთან ერთად მათ შორის თბილისის ეპიდემიოლოგიური ზედამხედველობის სამსახურთან, სურსათის ეროვნულ სააგენტოსთან, საქართველოს ფინანსთა სამინისტროს საგამოძიებო სამსახურთან და დაავადებათა კონტროლის ეროვნულ ცენტრთან კოორდინაციით ატარებს ყველა საჭირო ღონისძიებას“, - ნათქვამია თბილისის საბავშვო ბაგა-ბაღების სააგენტოს განცხადებაში.