ძალიან დიდი და მნიშვნელოვანია თანხა, რაც ჩვენი ემიგრაციისგან ირიცხება - ყველა ოჯახი მადლობელია და სწორად უყურებს ამ მნიშვნელოვან შენატანს, მაგრამ ისიც უნდა გავიაზროთ, რომ ეს ფული ბიუჯეტში ხომ არ ჩარიცხულა? - აღნიშნული განცხადება “ქართული ოცნების“ დეპუტატმა დავით მათიკაშვილმა “საარჩევნო კოდექსის“ პროექტის იმ ნაწილის კრიტიკის პასუხად გააკეთა, რომლის გათვალისწინებით, პარლამენტის არჩევნები მხოლოდ საქართველოში გაიმართება და უცხოეთში საარჩევნო უბნები აღარ გაიხსნება.როგორც მათიკაშვილმა აღნიშნა, 2024 წელს ჩვენი ემიგრაციისგან 3 მილიარდ 300 მილიონი დოლარი გადმოირიცხა.“ეს არის ძალიან დიდი და ძალიან მნიშვნელოვანი თანხა. ძალიან ბუნებრივია, რომ ყველა ოჯახი მადლობელია და სწორად უყურებს ამ მნიშვნელოვან შენატანს საკუთარი ქვეყნისა და საკუთარი ოჯახების კეთილდღეობაში, მაგრამ ისიც უნდა გავიაზროთ, რომ ეს ფული ბიუჯეტში ხომ არ ჩარიცხულა? ეს ფული კონკრეტულ ადამიანებს და კონკრეტულად იმ მოქალაქეებს ჩაერიცხა, ვისი ოჯახის წევრებიც უცხოეთში იმყოფებიან. ჩვენთვის სავსებით გასაგებია, ეს რამხელა შრომასთან და რამხელა ენერგიასთან არის დაკავშირებული, რომ ეს ადამიანები იქ ნაღვაწის მნიშვნელოვან პროცენტს საკუთარ ქვეყანაში გზავნიან, მაგრამ მაინც უნდა ვიყოთ ზუსტი, არ უნდა მოვატყუოთ საზოგადოება - საუბარია არა 11 მილიარდზე, არამედ 3 მილიარდ 300 მილიონი დოლარზე“, - განაცხადა დავით მათიკაშვილმა.პარლამენტი ახალი რედაქციის “საარჩევნო კოდექსს“ და მისგან გამომდინარე კანონპროექტებს პირველი მოსმენით იხილავს.

ეროვნული ბანკის მიერ 25 ნოემბერს დადგენილი კურსით, დღეს 1 აშშ დოლარის ღირებულება 2.7052 ლარი, ხოლო ევროს კურსი 3.1204 ლარია.„ბიზნესპრესნიუსი“ გთავაზობთ თბილისის სხვადასხვა უბნებში მოქმედ სავალუტო ჯიხურებში ლარის გაცვლით კურსს ევროსა და დოლარის მიმართ.ვალუტის კურსი ჯიხურებში დღეს, 09:30 საათის მდგომარეობით:ამ მომენტისთვის, (09:30 საათისთვის) საბურთალოზე მდებარე სავალუტო ჯიხურებში ერთი დოლარის ყიდვას მოქალაქეები 2.7050 ლარად შეძლებენ, სავალუტო ჯიხურები კი - 2.7010 ლარად ყიდულობენ. ერთი ევროს შეძენა მოქალაქეებს 3.1300 ლარად, გაყიდვა კი 3.1230 ლარად შეუძლიათ.ჩუღურეთში დოლარის ყიდვას მოქალაქეები 2.7050 ლარად, ხოლო გაყიდვას 2.7000 ლარად შეძლებენ. რაც შეეხება ევროს, მისი ყიდვა მოქალაქეებს - 3.1350 ლარად, ხოლო გაყიდვა - 3.1150 ლარად შეუძლიათ.სადგურის მოედნის მიმდებარე ტერიტორიაზე ვალუტის გადამცვლელ პუნქტებში ერთი დოლარის ყიდვა მოქალაქეებს - 2.7060 ლარად, გაყიდვა კი - 2.7010 ლარად შეუძლიათ. რაც შეეხება ევროს, ერთ ევროს ყიდვას მოქალაქეები 3.1300 ლარად, გაყიდვას კი - 3.1150 ლარად შეძლებენ.თავისუფლების მოედნის მიმდებარე ტერიტორიაზე, სავალუტო ჯიხურებში 1 აშშ დოლარის ყიდვას მოქალაქეები 2.7050 ლარად, ხოლო გაყიდვას 2.6800 ლარად შეძლებენ, რაც შეეხება ევროს, მისი ყიდვა მოქალაქეებს 3.1350 ლარად, გაყიდვა კი 3.1000 ლარად შეუძლიათ.ცნობისთვის, ეროვნული ბანკი ახალ კურსს დღეს 17:00 საათზე გამოაქვეყნებს.

აშშ დოლარის ოფიციალური ღირებულება 2.7052 ლარი გახდა.ეროვნული ბანკის მიერ გამოქვეყნებული მონაცემების თანახმად, დღევანდელი ვაჭრობის შედეგად 1 აშშ დოლარის ღირებულება 2.7052 ლარი გახდა. კურსი, რომელიც დღეს მოქმედებდა, 2.7056 ლარი იყო. შესაბამისად, დოლარის ცვლილებამ ეროვნულ ვალუტასთან მიმართებაში 0.0004 ლარი შეადგინა.რაც შეეხება ევროს, მისი კურსი 3.1204 ლარია. მაშინ, როცა დღეს მოქმედი კურსი 3.1223 ლარს შეადგენდა. შესაბამისად, ევროს ცვლილებამ 0.0019 ლარი შეადგინა.

20–21 დეკემბერს, Spotlight-ის რიგით მეთორმეტე ღონისძიება სასტუმრო „რადისონ ბლუ ივერიაში” გაიმართება. ქვეყნის ერთ-ერთი მთავარი ინსპირაციული შეხვედრების სერია წელსაც საქართველოს ბანკის მხარდაჭერით ხორციელდება.Spotlight-ი უკვე წლებია იქცა სივრცედ, სადაც მარკეტინგის, ტექნოლოგიების, მედიის, ბიზნესის, დიზაინისა და შემოქმედებითი ინდუსტრიების პროფესიონალები იკრიბებიან, გამოცდილების, ცოდნისა და ინსპირაციის გასაზიარებლად. წლევანდელი სპიკერების ვინაობა პირველ დეკემბერს გახდება ცნობილი.ორდღიანი ღონისძიება  25-ზე მეტ სპიკერს, მათ ინსპირაციულ ისტორიებს, მასტერკლასებს, პანელურ დისკუსიებსა და  ნეთვორქინგის შესაძლებლობას აერთიანებს. Spotlight-ი ყოველწლიურად 1500-მდე პროფესიონალს უყრის თავს.„საქართველოს ბანკისა და Spotlight-ის თანამშრომლობა უფრო მეტია, ვიდრე თანამშრომლობის ტრადიცია - ეს არის ერთობლივად გავლილი გზა, რომელიც წლიდან წლამდე ქმნის ახალი ენერგიის, ისტორიებისა და გამორჩეული იდეების გაცვლის სივრცეს. შესაბამისად, Spotlight-ი იქცა ადგილად, სადაც ინოვაცია და კრეატიულობა ერთიანდება. ამ პროცესის ნაწილად ყოფნა კი ჩვენთვის ყოველთვის მნიშვნელოვანია. მადლობა გვინდა გადავუხადოთ ამ პროექტის განხორციელებაში ჩართულ თითოეულ ადამიანს, რომლებიც ამ პლატფორმას ყოველ წელს კიდევ უფრო მეტად გამორჩეულს ხდიან. გელით Spotlight-ზე,“ - აცხადებს საქართველოს ბანკის ბრენდის მიმართულების ხელმძღვანელი, მარიამ ცანავა.„პროექტის ორგანიზატორებს გვჯერა, რომ შთაგონებას ძალიან დიდი ძალა აქვს. ამიტომ ვქმნით სცენას, რომელიც 2 დღის განმავლობაში ინსპირაციის ეპიცენტრი გახდება. სპიკერები მთავარ სცენაზე საკუთარ იდეებს, წარმატების და მარცხის ისტორიებს გაგვიზიარებენ და გვჯერა, რომ ეს გამოცდილება უამრავი ადამიანის ცხოვრებას სასიკეთოდ შეცვლის. გარდა ამისა, Spotlight საუკეთესო საშუალებაა ნეთვორქინგისთვის, რადგან აქ ადამიანებს შეუძლიათ იპოვონ ახალი პარტნიორები და მეგობრები. ეს ურთიერთობები კი მთელი ცხოვრება გრძელდება. საქართველოს ბანკის მთავარი გზავნილია „არ გაჩერდე“. ეს სიტყვები ძალიან ბევრ ადამიანს და ორგანიზაციას აძლევს მოტივაციას. ის, რომ საქართველოს ბანკი დგას ჩვენს გვერდით, ვფიქრობ, მთელი ინდუსტრიისთვის ნათქვამი გზავნილია, არ გაჩერდნენ, იმოძრაონ და გახდნენ უკეთესები. ჩვენ კი ამ ნდობას აუცილებლად გავამართლებთ“, - ამბობს Spotlight-ის დამფუძნებელი აკო ახალაია.ბილეთების გაყიდვა 2 დეკემბერს, 16:00 საათიდან დაიწყება. ვებგვერდებზე biletebi.ge, tkt.ge. თუ გსურთ ბილეთების შეძენა კორპორაციულად, დაუკავშირდით მარკეტერის კომერციულ სამსახურს ელ. ფოსტაზე: sales@marketer.ge. შევხვდებით Spotlight-ზე. 

ამერიკის ფსიქოლოგთა ასოციაციის ახალი კვლევის თანახმად, TikTok-ზე სქროლვამ შეიძლება „ტვინის ლპობა“ გამოიწვიოს. ამ თემაზე მასალას ევრონიუსი აქვეყნებს და წერს, რომ გასულ წელს, ოქსფორდის ლექსიკონის წლის სიტყვად „ტვინის ლპობა“ დასახელდა. ესაა ტერმინი, რომელიც გამოხატავს შეშფოთებას „დაბალი ხარისხის ონლაინ კონტენტის ჭარბი რაოდენობით მოხმარების, განსაკუთრებით სოციალურ მედიაში“ ზემოქმედების გამო.ეს ცნება გულისხმობს გონებრივ დაქვეითებას - როდესაც ადამიანს უჭირს ფოკუსირება, ვერ აღიქვამს ინფორმაციას ისე, როგორც ადრე, აღარ სწავლობს, აღარ ვითარდება, მხოლოდ ერთფეროვანი, ტვინისთვის არაფრისმიმცემი საქმიანობით არის დაკავებული.ამერიკის ფსიქოლოგთა ასოციაციის ბოლოდროინდელი დასკვნები ადასტურებს, რომ ტვინის „ლპობა“ არა მხოლოდ რეალობაა და მეტია, ვიდრე უბრალოდ  გვერდითი მოვლენა: ეს არის რეალური ნეიროკოგნიტური სინდრომი, რომელიც გაზომვად ზიანს იწვევს.კვლევას საკმაოდ გრძელი სახელწოდება აქვს: „კვება, გრძნობები და ფოკუსირება: სისტემატური მიმოხილვა და მეტაანალიზი, რომელიც იკვლევს მოკლე ვიდეოების გამოყენების კოგნიტურ და ფსიქიკურ ჯანმრთელობასთან დაკავშირებულ კორელაციებს“. ეს ნაშრომი პირდაპირ აკავშირებს ალგორითმებზე დაფუძნებული პლატფორმებიდან, როგორიცაა TikTok, Instagram Reels და YouTube Shorts, მოკლე ვიდეო კონტენტს (SFV) ტვინის „ლპობას“.მკვლევარებმა გააანალიზეს 71 კვლევის 98,299 მონაწილის მონაცემები და აღმოაჩინეს, რომ რაც უფრო მეტ მოკლე ვიდეოს უყურებს ადამიანი, მით უფრო ცუდი კოგნიტური მაჩვენებლები აქვს მას ყურადღებისა და ინჰიბიტორული კონტროლის თვალსაზრისით.კვლევაში ნათქვამია: „მაღალი სტიმულირების, სწრაფი ტემპის მქონე კონტენტის განმეორებითმა ზემოქმედებამ შეიძლება ხელი შეუწყოს შეჩვევას, რომლის დროსაც მომხმარებლები კარგავენ მგრძნობელობას უფრო ნელი და უფრო შრომატევადი კოგნიტური ამოცანების მიმართ, როგორიცაა კითხვა, პრობლემების გადაჭრა ან ღრმა შესწავლა“.ავტორები აღნიშნავენ, რომ შეჩვევა ასტიმულირებს ტვინის ჯილდოს სისტემას, რაც აძლიერებს ჩვეულ გამოყენებას, რამაც შეიძლება გამოიწვიოს „სოციალური იზოლაცია, ცხოვრებით კმაყოფილების დაქვეითება და თვითშეფასების და სხეულის იმიჯის დაქვეითებაც კი“. თითქოს ეს საკმარისი არ იყოს, პლატფორმების გაზრდილი გამოყენება ასევე დაკავშირებულია ძილის დარღვევასთან, შფოთვის მომატებასთან და მარტოობასთან.მოკლედ, დაბალი ხარისხის ციფრული კონტენტის ჭარბ ზემოქმედებას შესამჩნევი გავლენა აქვს ჩვენი ტვინის ფუნქციონირებაზე. რაც უფრო მეტს უყურებთ მოკლემეტრაჟიან ფილმებს ისეთ პლატფორმებზე, როგორიცაა TikTok, მით უფრო მცირდება ყურადღების ხანგრძლივობა, რაც გავლენას ახდენს ფსიქიკურ ჯანმრთელობასა და კრიტიკულ აზროვნებაზე.jandacva.ge

პირადობის დამადასტურებელ მოწმობებზე QR კოდის დამატება იგეგმება. ახალი საკანონმდებლო ინიციატივა ეკონომიკური პოლიტიკის კომიტეტის წევრებს იუსტიციის მინისტრის მოადგილემ, გიორგი დგებუაძემ წარუდგინა.კერძოდ, ცვლილებების შეტანა იგეგმება „საქართველოს მოქალაქეთა და საქართველოში მცხოვრებ უცხოელთა რეგისტრაციის, პირადობის (ბინადრობის) მოწმობისა და საქართველოს მოქალაქის პასპორტის გაცემის წესის შესახებ“ საქართველოს კანონში.იუსტიციის მინისტრის მოადგილის თქმით, საქართველოს მოქალაქის პირადობის ელექტრონული მოწმობის, დროებითი და მუდმივი ბინადრობის ელექტრონული მოწმობის, აგრეთვე დროებითი საიდენტიფიკაციო მოწმობის მნიშვნელოვანი ელექტრონული გაუმჯობესება იგეგმება.„ეს შეეხება საქართველოს კანონში საქართველოს მოქალაქეთა და საქართველოში მცხოვრებ უცხოელთა რეგისტრაციის, პირადობის, ბინადრობის მოწმობისა და საქართველოს მოქალაქის პასპორტის გაცემის შესახებ ცვლილებების განხორციელებას. ახალი პირადობის დოკუმენტები და მათი ტექნიკური მახასიათებლები ამ ცვლილებების შემდეგ სრულად უპასუხებს თანამედროვე გამოწვევებს და კიდევ უფრო დაცული და უსაფრთხო იქნება.საქართველოს მოქალაქის პირადობის ელექტრონული მოწმობის, დროებითი და მუდმივი ბინადრობის ელექტრონული მოწმობის, აგრეთვე დროებითი საიდენტიფიკაციო მოწმობისათვის მნიშვნელოვანია ტექნოლოგიურად გაუმჯობესებული, ახალი თაობის მიკროსქემებისა და დოკუმენტების ახალი დიზაინის დანერგვა, დამატებითი დამცავი ნიშნებით, რომლებიც არსებული მიკროსქემისა და დოკუმენტების მახასიათებლებისგან განსხვავებული იქნება.დოკუმენტებს უნდა დაემატოს ახალი რეკვიზიტები. კერძოდ, მოწმობის წვდომის კოდი, რომელიც უკონტაქტო მიკროსქემიდან მონაცემთა ამოკითხვისათვის გამოიყენება და ე.წ. QR კოდი, რომლის მეშვეობითაც, პირს შეუძლია გადაამოწმოს ინფორმაცია დოკუმენტის ან მისი მფლობელის შესახებ. აქ ჩვენ შეგვიძლია დავამატოთ ისეთი ინფორმაციები, რომელიც დაკავშირებულია შშმ პირის სტატუსთან, შეიძლება ეს იყოს დაკავშირებული სტუდენტის სტატუსთან და სხვა მნიშვნელოვან ინფორმაციასთან.მნიშვნელოვანია ასევე კანონით განისაზღვროს, რომ პირადობის მოწმობა შეიცავდეს თითის ანაბეჭდს, რაც უსაფრთხოების მაღალ სტანდარტს დაამკვიდრებს და გაყალბებისგან დოკუმენტის დაცვის ხარისხს გაზრდის.ამასთან, გარდა კანონით განსაზღვრული საფუძვლებისა, დაინტერესებული პირი უფლებამოსილი იქნება, შეცვალოს პირადობის დამადასტურებელი დოკუმენტი, თუ დოკუმენტის მოქმედების ვადის ამოწურვამდე დარჩენილი იქნება 6 თვეზე ნაკლები,“ - განაცხადა იუსტიციის მინისტრის მოადგილემ.