• Ƀ/$

„შრომის კოდექსში“ შესატან ცვლილებებში ბიზნესომბუდსმენი რისკებს ხედავს

5 ნოემბერი 14:41 | ეკონომიკა

ბიზნესომბუდსმენი ირაკლი ლექვინაძე მიიჩნევს, რომ თუ „შრომის კოდექსში“ ცვლილებები არსებული ფორმით შევა, ეს ბიზნესისთვის ხარჯებს გაზრდის, რამაც, შესაძლოა, სამუშაო ადგილების შემცირებაც გამოიწვიოს.

ამის შესახებ საქართველოს ბიზნესომბუდსმენმა „შრომლის კოდექსში“ შესატანი ცვლილებების შეფასებისას ჟურნალისტებთან განაცხადა.


„ჩვენ გვაქვს რამდენიმე პრინციპული ხასიათის შენიშვნა: სამუშაო დროის ნორმირებასთან, ზეგანაკვეთური სამუშაო დროის ნორმირებასთან, შრომის ხელშეკრებულების ვადებთან და შეწყვეტასთან დაკავშირებული საკითხები. ეს იმდენად სხვაგვარად აყალიბებს დასაქმებულსა და დამსაქმებელს შორის ურთიერთობებს, რომ ჩვენ მიგვაჩნია ეს მძიმე ტვირთი იქნება ბიზნესისთვის. თუ აღნიშნული ფორმით ეს ცვლილებები შევა ძალაში, ეს გამოიწვევს ბიზნესისთვის ხარჯების მნიშველოვან ზრდას. ამან შეიძლება მოგვცეს სამუშაო ადგილების შემცირება და გარკვეული შრომითი ურთიერთობების ჩრდილოვან სექტორში გადატანა“, - სიიჩნევს ირაკლი ლექვინაძე.


ჯერ კიდევ სექტემბერში ბიზნესომბუდსმენის აპარატს შრომის კოდექსზე - 6, შრომის ინსპექციის კანონზე კი - 17 შენიშვნა-წინადადება ჰქონდა, რომელთა მიხედვითაც კანონის პროექტების დღეს არსებულ ვერსიაში, ბიზნესისთვის კრიტიკულ საკითხებს შორისაა: ვადიან შრომით ხელშეკრულებებზე შეზღუდვა, შრომითი ხელშეკრულებების ზეპირი ფორმით გაფორმების აკრძალვა, ერთზე მეტ სრულ და არასრულ სამუშაო განაკვეთზე პირის დასაქმებაზე დამატებითი შეზღუდვები, ზეგანაკვეთური სამუშაო დროის ხანგრძლივობის შეზღუდვა. „შრომის ინსპექციის შესახებ“ საქართველოს კანონის პროექტში ხშირი, ორაზროვანი და ბუნდოვანი ჩანაწერები. მნიშვნელოვანია კანონში დეტალურად გაეწეროს შრომის ინსპექციის მრჩეველთა საბჭოს ფუნქციები. ასევე, აუცილებელია განისაზღვროს სამუშაო ადგილზე შრომის ნორმების დარღვევასთან დაკავშირებით საჩივრის დამწერ პირთა წრე (ინსპექციას მხოლოდ დაზარალებულის საჩივრის შემთხვევაში უნდა ჰქონდეს ინსპექტირების უფლებამოსილება), დაუშვებელია შრომის ინსპექციას მიეცეს უფლება, განახორციელოს ნებისმიერი სამუშაო ადგილის ან სამუშაო სივრცის ინსპექტირება განუსაზღვრელი ვადით. შრომის ინსპექტორს უნდა შეეზღუდოს„გამოკითხვის“ ჩატარების უფლება. კანონში უნდა განისაზღვროს ინსპექტირების მიზნებისთვის დალუქული/ამოღებული დოკუმენტის, ნივთის, ნივთიერების თუ მასალის დამსაქმებლისთვის უკან დაბრუნების ვადები. დაუშვებელია, შრომის ინსპექციისთვის ადმინისტრაციული სახდელების დაკისრებასთან დაკავშირებით დისკრეციული უფლებამოსილების მინიჭება.


სხვა სიახლეები