• Ƀ/$

საერთაშორისო გამოხმაურება სირიის საკითხზე - ერდოღანი ევროპას ემუქრება

11 ოქტომბერი 11:46 | ანალიტიკა

ირანის საგარეო საქმეთა სამინისტრომ ანკარისგან ოფიციალურად მოითხოვა სირიის ტერიტორიიდან თურქი სამხედროების გაყვანა და იერიშების შეწყვეტა.

„ირანის საგარეო საქმეთა სამინისტრო შეშფოთებას გამოხატავს ჩრდილოეთ სირიაში თურქული სამხედრო ოპერაციის მიმდინარეობასთან დაკავშირებით, ჰუმანიტარული კრიზისისა და შეტაკებების არეალში მშვიდობიანი მოქალაქეების წინაშე მდგარი საფრთხეების გამო. ხაზგასმით აღვნიშნავთ, რომ საჭიროა შეტევების დაუყონებლივი შეჩერება და თურქული ჯარების გაყვანა სირიის ტერიტორიიდან“, - ნათქვამია განცხადებაში.


ოფიციალური თეირანის პოზიციით, თურქეთის სამხედრო ოპერაციებმა სირიას უზარმაზარი მატერიალური და ჰუმანიტარული ზიანი მიაყენა, რასაც ირანის ხელისუფლება ყოველთვის ეწინააღმდეგებოდა.


მანამდე, 10 ოქტომბერს, ირანის პარლამენტის თავმჯდოამარემ ალი ლარიჯანიმ თურქეთში დაგეგმილი ვიზიტი გააუქმა, სირიაში მიმდინარე მოვლენების გამო. ლარიჯანი მისი თურქი კოლეგის მიწვევით უნდა გამგზავრებულიყო სტამბოლში, სადაც მონაწილეობა უნდა მიეღო საპარლამენტო შეხვედრაში.


მოსკოვი ანკარისა და დამასკოს შერიგებას ეცდება


რუსეთის ფედერაციის საგარეო საქმეთა მინისტრის სერგეი ლავროვის განცხადებით, რუსეთი ეცდება დიალოგის წარმოებას სირიასა და თურქეთს შორის, რადგან აღნიშნული ორივე სახელმწიფოს ინტერესებში შედის.


პომპეო: თურქეთის შეშფოთება ჩრდილოეთ სირიასთან დაკავშირებით საფუძვლიანია


„ანკარის შეშფოთება თურქეთის სამხრეთ საზღვრებზე არსებული ვითარების და ტერორისტული საფრთხეების შესახებ კარგად არის დასაბუთებული“, - განაცხადა აშშ-ის სახელმწიფო მდივანმა.


ისრაელი გმობს თურქეთის ქმედებებს და ინიციატივით გამოდის დახმარება გაუწიოს ქურთ ხალხს


ისრაელის პრემიერ-მინისტრის ბენიამინ ნეთანიაჰუს განცხადებით, ოფიციალური იერუსალიმი მკაცრად გმობს თურქეთის შეჭრას სირიაში და აფრთხილებს მათ, რომ არ განახორციელონ რეგიონში მაცხოვრებელი ქურთების ეთნიკური წმენდა.


ლიბანის პრეზიდენტი თურქული ოპერაციის შესაძლო შედეგებზე საუბრობს


ლიბანის პრეზიდენტ მიშელ აუნის განცხადებით, თურქული არმიის სამხედრო ოპერაციამ ჩრდილოეთ სირიაში შესაძლოა ამ ქვეყნის ერთიანობისთვის საშიში შედეგები მოიტანოს და უარყოფითად იმოქმედოს ტერორისტების წინააღმდეგ ბრძოლის მიმდინარეობაზე. მისი თქმით, ოფიციალური ბეირუთი იმედოვნებს, რომ შეტევა არ იმოქმედებს სირიის სუვერენიტეტზე და არ წარმოშობს ლტოლვილთა ახალ ნაკადებს.


ფრანგებმა თურქეთის ელჩი დაიბარეს


მანამდე საფრანგეთის საგარეო უწყების ხელმძღვანელმა ჟან-ივ ლე დრიანმა განაცხადა, რომ თურქულმა ოპერაციამ სირიაში შესაძლოა ევროპის უსაფრთხოება შეარყიოს და საჭიროა მისი შეწყვეტა.


„მე მგმობ ცალმხრივ ოპერაციას, რომელიც ანკარამ სირიაში წამოიწყო. ეს საფრთხეს უქმნის კოალიციის მიერ უსაფრთხოების და ჰუმანიტარული დახმარების ძალისხმევას ტერორისტული ორგანიზაცია „ისლამური სახელმწიფოს“ წინააღმდეგ“, - განმარტა მინისტრმა.


თურქეთის სამხედრო ოპერაციას იტალიაც გმობს


იტალიის საგარეო საქმეთა მინისტრის ლუიჯი დი მაიოს განცხადებით, ოფიციალური ანკარის წამოწყებული კამპანია ქურთების წინააღმდეგ არის მიუღებელი და დაუყონებლივ უნდა შეწყდეს სამხედრო მოქმედებები.


„თურქულ ინიციატივას ვგმობთ, რადგან წარსულში განხორციელებულმა სამხედრო მოქმედებებმა გვიჩვენა, რომ ეს ტერორიზმის საფრთხეს მხოლოდ ამაღლებს“, - განაცხადა დი მაიომ.


ფინეთი თურქეთს იარაღს აღარ აწვდის


ფინეთის ხელისუფლება გმობს თურქულ სამხედრო ოპერაციას სირიაში და ამ სახელმწიფოსთვის იარაღის მიყიდვის ლიცენზიების გაცემა შეაჩერა.


ფინეთის პრემიერ-მინისტრ ანტტი რინნეს განცხადებით, სახელმწიფო საბჭო არ გასცემს ახალ ლიცენზიებს იარაღის ექსპორტზე. მისი თქმით, ოფიციალური ანკარის ქმედებები კიდევ უფრო აუარესებს რეგიონის საერთო კრიზისს და იწვევს ლტოლვილთა ახალი ნაკადების გაჩენას.


სირიელი ქურთები ევროკავშირს მიმართავენ


„სირიის დემოკრატიული საბჭოს“ (“სირიის დემოკრატიული ძალების” პოლიტიკური ფრთა - SDF) თანათავმჯდომარის ილჰამ აჰმედის განცხადებით, ევროგაერთიანების ქვეყნებმა უნდა გაიწვიონ საკუთრი ელჩები თურქეთიდან.


თურქეთის პრეზიდენტის განცხადება


რეჯეპ ტაიპ ერდოღანი პირობას დებს, რომ ევროპაში შესასვლელ კარს გაუღებს 3,6 მლნ სირიელ ლტოლვილს, თუ ევროკავშირი გააგრძელებს სირიის ჩრდილოეთში მიმდინარე თურქული სამხედრო მოქმედებების ოკუპაციად ეტიკეტირებას. აღნიშნული მან მმართველი AK პარტიის დეპუტატებთან შეხვედრისას განაცხადა.


სომხეთის მინისტრთა კაბინეტის გადაწყვეტილება


სომხეთის მთავრობის 10 ოქტომბრის სხდომაზე მიღებული იქნა გადაწყვეტილება, რომლის მიხედვით ლიბანის, სირიისა და ერაყის მოქალაქეებს შეეძლებათ ამავე სახელმწიფოებში მდებარე დიპლომატიურ წარმომადგენლობებსა და საკონსულო დაწესებულებებში სომხეთის მოქალაქეობის მიღება. აღნიშნული 2019 წლის 31 დეკემბრამდე მოქმედებდა და ახლა კიდევ ერთი წლით გახანგრძლივდება.


ქურთი ოფიციალური პირების განცხადება


სირიის ქურთული ადმინისტრაციის განცხადებით, თურქეთი ჩრდილოეთ სირიაში, ქამიშლიში მდებარე ჩირქინის სასჯელაღსრულების დაწესებულებას ბომბავს, სადაც „ისლამური სახელმწიფოს“ 60-ზე მეტი ეროვნების წევრი იხდის სასჯელს.


PKK-მ (ქურთისტანის მუშათა პარტია) ოფიციალური განცხადება გააკეთა, რომლის მიხედვით, ორგანიზაციის ხელმძღვანელობას, სამხედრო დანაყოფებსა და ფილიალებს მოუწოდებენ შეიარაღებული თავდასხმების გააქტიურებისკენ და მობილიზებისკენ „ჩრდილოეთ ქურთისტანის“ (აღმოსავლეთ თურქეთი) მიმართულებით, როგორც შურისძიება სირიის ჩრდილოეთში თურქეთის შეჭრის გამო.


სირიის ჩრდილოეთზე შეტევის დაწყების შემდეგ თურქული ლირა სტაბილურია


ხუთშაბათს თურქული ლირა დოლარის მიმართებაში სტაბილური იყო, მას შემდეგ რაც თურქულმა ჯარებმა და მათმა სირიელმა მოკავშირეებმა დაიწყეს სახმელეთო ოპერაცია ქურთების წინააღმდეგ სირიის ჩრდილო-აღმოსავლეთ ნაწილში.


 


 M2B-ის მიმომხილველი - რატი ერისთავი 


სხვა სიახლეები

ექსკლუზივი