• Ƀ/$

ლაგოდეხის ხის კენწეროების ბილიკებზე წელიწადში 100 000-მდე ტურისტის მიღება იქნება შესაძლებელი

5 სექტემბერი 10:44, 2018 წელი | ეკონომიკა

დაცული ტერიტორიების სააგენტოს თავმჯდომარემ ვალერიან მჭედლიძემ ლაგოდეხში დაცულ ტერიტორიებზე ხის კენწეროების ბილიკის მოწყობასთან დაკავშირებით შეხვედრა გამართა.

უკვე გამოვლინდა საერთაშორისო ტენდერში გამარჯვებული გერმანულ-ჰოლანდიური კომპანია, „CITYFORESTER“,  რომელიც ბილიკის პროექტს მოამზადებს. კომპანია ევროპის წამყვან ქვეყნებში არქიტექტურა/ურბანიზმის მიმართულებით მუშაობს. „CITYFORESTER“-ის გარდა, ბილიკის საპროექტო სამუშაოების მომზადების პროცესში ორი უცხოური კომპანია: „OPENFABRIC“ და „IMAGINE STRUCTURE“ ჩაერთვება.


შეხვედრაზე, ბილიკის დაგეგმარებასთან დაკავშირებული საკითხები განიხილეს. პროექტის მომზადება გერმანიის ეკონომიკური თანამშრომლობისა და განვითარების სამინისტროს (BMZ) და გერმანიის რეკონსტრუქციის საკრედიტო ბანკის (KFW) ფინანსური მხარდაჭერით მიმდინარეობს.


„კახეთი ერთ-ერთი საუკეთესო მიმართულებაა ეკოტურიზმის განვითარების კუთხით. შესაბამისად, ჩვენ გვინდა მოვაწყოთ ხის კენწეროების ბილიკი. ეს არის ნოვაცია საქართველოში, მსგავსი პროექტი აქამდე არ განხორციელებულა. ვიზიტორები ბილიკის დათვალიერებისას, შეძლებენ გაეცნონ ლაგოდეხის დაცული ტერიტორიების უნიკალურ ბიომრავალფეროვნებას“, - განაცხადა ვალერიან მჭედლიძემ.


ხის კენწეროების ბილიკები მოიცავს კოშკურებს, საჰაერო ბილიკს, ხიდებს, საგანმანათლებლო და საინტერპრეტაციო ინტერაქტიულ პორტალებს. მსგავსი ბილიკები მხოლოდ მსოფლიოს წამყვან ეროვნულ პარკებშია. ბილიკი, წინასწარი გათვლებით 1 წლის განმავლობაში 60 000–100 000 ადამიანის მასპინძლობას შეძლებს.


სატენდერო პირობების მიხედვით, პროექტის მოსამზადებელი სამუშაოები მიმდინარე წლის ბოლომდე დასრულდება.


 


მსგავს თემაზე:


დაცული ტერიტორიების სააგენტო ევროპარკების ფედერაციის წევრი გახდა


დაცული ტერიტორიებით უცხოელი ტურისტების დაინტერესება იზრდება


გერმანული მხარის დახმარებით საქართველოში ტყეებს აღრიცხავენ


სხვა სიახლეები