• Ƀ/$

სომხეთი თავის ამბიციურ გეგმებს ირანსა და ყაზახეთს აცნობს

1 ოქტომბერი 17:04 | ანალიტიკა

ერევანში „ევრაზიის ეკონომიკური კავშირის“ უმაღლესი საბჭოს სხდომა აქტიურ ფაზაშია და ლიდერები ვიცრო და გაფართოებული შემადგენლობებით ორმხრივი შეხვედრებისთვის ემზადებიან.

საბჭოს სხდომის დღისწესრიგით 19 საკითხია განსაზღვრული. დღეს, 1–ელ ოქტომბერს, ვიწრო ფორმატში 3, ხოლო ფართო ფორმატში 16 საკითხი განიხილება.


ვიწრო ფორმატში მონაწილეობას იღებენ „ევრაზიის ეკონომიკური კავშირის“ წევრი-სახელმწიფოების ლიდერები: სომხეთის პრემიერი ნიკოლ ფაშინიანი, რუსეთის ფედერაციის პრეზიდენტი ვლადიმირ პუტინი, ბელარუსის პრეზიდენტი ალექსანდრ ლუკაშენკო, ყირგიზეთის პრეზიდენტი სოორონბაი ჟეენბეკოვი, ყაზახეთის პრეზიდენტი კასიმ-ჟომარტ ტოკაევი და ევრაზიის ეკონომიკური კომისიის კოლეგიის თავმჯდომარე ტიგრან სარქისიანი.


გაფართოებულ ფორმატში მათ შეუერთდებიან ირანის პრეზიდენტი ჰასან რუჰანი, სინგაპურის პრემიერი ლი სიან ლუნი და მოლდოვის პრეზიდენტი იგორ დოდონი, როგორც დამკვირვებელი სახელმწიფოს წარმომადგენელი.


ვიწრო ფორმატის შეხვედრებზე განხილული იქნება ევრაზიის ეკონომიკური ფორუმის, ეკონომიკური კომისიის თავმჯდომარეობასა და პერსონალთან დაკავშირებული საკითხები, ასევე „ევრაზიის ეკონომიკური კავშირის“ წევრ-სახელმწიფოებში იმპორტირებული საქონლის საბაჟო გადასახადების საკითხები.


რაც შეეხება გაფართოებულ ფორმატს, აქ განიხილება ორგანიზაციის 2018 წლის ბიუჯეტის შესრულების საკითხი, 2020 წლის ბიუჯეტი, კავშირის საერთო ფინანსური ბაზრის ფორმირების კონცეფცია და ორგანიზაციის რიგი შიდა ცვლილებები. ასევე განისაზღვრება უზენაესი საბჭოს შემდეგი შეხვედრის ადგილი.


სომხეთ–ირანის ურთიერთობები


ღონისძიებების დაწყებამდე ნიკოლ ფაშინიანსა და ირანის პრეზიდენტ ჰასან რუჰანის შორის შეხვედრა გაიმართა.


„ჩვენი ურთიერთობები ოფიციალურ თეირანთან უნდა მიმდინარეობდეს გეოპოლიტიკური გავლენის მიღმა, რადგან ვართ პირდაპირი მეზობლები და გვაქვს საერთო ინტერესები. ჩვენ უნდა ვითანამშრომლოთ საუკუნეების და ათასწლეულების განმავლობაში. აქვე, სომხეთი მაღალ შეფასებას აძლევს ირანის დაბალანსებულ პოლიტიკას ყარაბაღის კონფლიქტის მოგვარებასთან დაკავშირებით“, - განაცხადა ფაშინიანმა.


ჰასან რუჰანის თქმით, ისინი დიდ მნიშვნელობას ანიჭებენ სომხეთთან სამომავლო ურთიერთობების განვითარებას და გაფართოებას ყველა სფეროში.


„მზად ვართ, გავაგრძელოთ მუშაობა თქვენ მთავრობასთან, ახალი პროგრამების შემუშავებისა და განხორციელების მიზნით, პროგრამა „გაზი - ელექტროენერგიის სანაცვლოდ“ მასშტაბების გასაფართოვებლად. ამავდროულად მზად ვართ სომხეთში განვახორციელოთ მზის და ქარის ენერგიის საშუალებით, ელექტროენერგიის წარმოების პროგრამები. დაინტერესებული ვართ რეგიონალური პროექტების განხორციელებით ენერგეტიკულ სექტორში, ინფრასტრუქტურის განვითარებაში“, - განაცხადა რუჰანიმ.


ირანის პრეზიდენტის თქმით, თეირანი დაინტერესებულია სომხეთთან თანამშრომლობით სატრანსპორტო ინფრასტრუქტურის სფეროში, მათ შორის ირანის ტერიტორიაზე მიმდინარე და სამომავლო საგზაო მშენებლობების პროგრამებში ჩართვის კუთხით.


პრემიერი ფაშინიანი მიესალმა ირანული მხარის მზადყოფნას „გაზი - ელექტროენერგიის სანაცვლოდ“ პროგრამის გასაფართოებლად. ორივე სახელმწიფოს ლიდერმა, ქვეყნების მთავრობების წარმომადგენლებს დაავალეს შეიმუშაონ და წარადგინონ წინადადებები აღნიშნულ სფეროში თანამშრომლობის რაც შეიძლება მალე გასაძლიერებლად.


მხარეები ასევე შეეხნენ რკინიგზის სექტორში თანამშრომლობის საკითხებს. მაღალტექნოლოგიური, საბაჟო, მეცნიერების და ტურიზმის სფეროებში სამომავლო ურთიერთობებს.


ირანის პრეზიდენტმა დაამატა, რომ ისინი მზად არიან იმსჯელონ მეჰრინის (იგივე არაქსის ჰესი) ჰიდროელექტროსადგურის მშენებლობის პროგრამის განხორციელებაზე, გააფართოვონ ორმხრივი ინვესტიციები და ვაჭრობა „თავისუფალი სავაჭრო ზონების“ საშუალებებით.


მხარეებმა გაცვალეს მოსაზრებები სპარსეთის ყურიდან შავი ზღვისკენ მიმავალ სატრანზიტო მარშრუტებზე. ფაშინიანმა ამ თემაზე ხასი გაუსვა, რომ აღნიშნული პროგრამის განხორციელება ემყარება მისი ქვეყნის სტრატეგიულ ინტერესებს და ოფიციალური ერევანი მზადაა გადადგას შესაბამისი ნაბიჯები ამ მიზნის მისაღწევად.


სომხეთი ყაზახეთთან სავაჭრო-ეკონომიკური კავშირების განვითარებითაა დაინტერესებული


ნიკოლ ფაშინიანის განცხადებით, „ევრაზიის ეკონომიკური კავშირის“ გამოყენებით, სომხეთ-ყაზახეთს აქვთ დიდი პოტენციალი განხორციელდეს მათ შორის სავაჭრო-ეკონომიკური ურთიერთობები გაფართოვდეს და ეს შანსი აუცილებლად უნდა იქნას გამოყენებული.


თავის მხრივ, კასიმ-ჟომარტ ტოკაევმა აღნიშნა, რომ აუცილებელია ვაჭრობის მოცულობის გაზრდისთვის შესაბამისი ნაბიჯების გადადგმა და სომხეთ-ყაზახეთის მთავრობათშორისი კომისიის საქმიანობის გაღრმავება.


მხარეებმა განიხილეს ენერგეტიკის, სოფლის მეურნეობის და ციფრული ტექნოლოგიების სფეროში ერთობლივი ინვესტიციების პროგრამების განხორციელების შესაძლებლობები.


ქვეყნების ლიდერებმა ისაუბრეს სატრანსპორტო ინფრასტრუქტურის და ამ სფეროში არსებული პრობლემების გადალახვის საკითხებზე, იმპორტ-ექსპორტის მოცულობის გაზრდის თვალსაზრისით.


ავტორი: რატი ერისთავი, M2B-ს მიმომხილველი.


მსგავს თემაზე:

სომხეთის ამბიციები "ევრაზიის ეკონომიკური კავშირის" ბიუროკრატიული პრობლემების წინააღმდეგ


"ევრაზიის ეკონომიკური კავშირის" ლიდერები ერევანში შეიკრიბნენ


პუტინი ერევანში ჩაფრინდა



სხვა სიახლეები