• Ƀ/$

რუსეთი სომხეთს თანამედროვე შეიარაღებას და სამოკავშირეო ვალდებულებების შესრულებას ჰპირდება

5 ნოემბერი 15:19 | მედია ბიზნესისთვის - M2B

„კოლექტიური უსაფრთხოების ხელშეკრულების ორგანიზაციის“ წევრი-სახელმწიფოები, რომელთა წარმომადგენლებიც ერევანში შეიკრიბნენ, მნიშვნელოვნად მიიჩნევენ ტერორიზმის ნებისმიერი გამოვლინების თავიდან ასაცილებელი ზომების მიღებას.

აღნიშნულის შესახებ დღეს, 5 ნოემბერს ერევანში მიმდინარე „კოლექტიური უსაფრთხოების ხელშეკრულების ორგანიზაციის“ (კუხოს) საპარლამენტო ასამბლეის საბჭოს სხდომაზე, რუსეთის დუმის დეპუტატმა, თნამემამულეებთან ურთიერტობების და დსთ-ის საკითხთა კომიტეტის წევრმა კონსტანტინ ზატულინმა განაცხადა.


ჟურნალისტის კითხვაზე, შესაძლოა თუ არა აზერბაიჯანის მხრიდან ტავუშის რეგიონის (ეს ტერიტორია საქართველოს ესაზღვრება, რედ.) სომეხი მშვიდობიანი მოსახლეობის დაბომბვა შეფასდეს, როგორც ტერორიზმის გამოვლინება და როგორ რეაგირებს ამაზე „კუხო“, ზატულინმა უპასუხა, რომ ერევანში დღეს მიმდინარე შეხვედრაზე განიხილეს ყარაბაღის კონფლიქტის ზონაში დაძაბულობის გაზრდის საკითხი.


აქვე ზატულინმა აღნიშნა, რომ თუ ოფიციალური ერევანი საჭიროდ მიიჩნევს დააყენოს აზერბაიჯანის მხრიდან მისი ტერიტორიის დაბომბვის საკითხი „კუხოს“ წევრი-სახელმწიფოების შეხვედრების ფარგლებში, მას ამის უფლება აქვს.


„მაგრამ მე ჯერ არ გამიგია, რომ ერევანს ეს საკითხი დისკუსიების დღისწესრიგში დაეყენებინოს“ - დასძინა ზატულინმა.


დეპუტატის თქმით, რუსეთი სომხეთს მოკავშირედ აღიქვამს და რეალური საფრთხის წარმოშობის შემთხვევაში მზად არის „კუხოს“ კანონმდებლობით გათვალისწინებული დამცავი მექანიზმები აამოქმედოს.


„მინდა შეგახსენოთ, რომ 102-ე რუსული სამხედრო ბაზა გიუმრიში მხოლოდ ფორმალობისთვის არ დგას. ამ ბაზის გაძლიერება იმის მანიშნებელია, რომ რუსეთი არ აპირებს უარი თქვას სომხეთთან სამოკავშირეო ვალდებულებების შესრულებაზე. ამის დადასტურებაა თუნდაც ის, რომ სირიის ჩრდილოეთში მიმდინარე ოპერაციის ფარგლებში განსაკუთრებული ყურადღება მივაქციეთ ქამიშლიში მცხოვრები სომეხი მოსახლეობის კეთილდღეობას და ეს საკითხი ცალკე განვიხილეთ თურქეთის ხელისუფლებასთან“, - აღნიშნა ზატულინმა.


სომხეთის პარლამენტის თავმჯდომარის მოადგილის ალენ სიმონიანის განცხადებით, ოფიციალური ერევანი რუსეთთან დიალოგისას ყოველთვის აყენებს კრემლის მხრიდან აზერბაიჯანისთვის იარაღის მიყიდვის საკითხს და ცდილობს ამ თემის გადაჭრას პრემიერ-მინისტრის დონეზე.


„რუსი ოფიციალური პირები გვეუბნებიან, რომ არა რუსეთი, რომელიც ვაჭრობს იარაღით, მის მაგივრად აუცილებლად გამოჩნდება სხვა, ამავდროულად მოსკოვი ერევანს ყოველთვის აძლევს შეაირაღება შეღავათიან ფასებში. პირადად ჩემთვის ეს არ არის დამაკმაყოფილებელი პასუხი, ანუ ჯერ კიდევ ვცდილობთ ამის მოგვარებას“, - განაცხადა სიმონიანმა.


აქვე მისი თქმით, რუსეთის მხრიდან აზერბაიჯანისთვის იარაღის მიყიდვის გამო სომხეთის ხელისუფლება არ განიხილავს „კუხოს“ დატოვებას.


თავის მხრივ აღნიშნულ თემაზე კომენტარი გააკეთა რუსეთის დუმის დეპუტატმა, კომუნისტური პარტიის ცენტრალური კომიტეტის მდივანმა ლეონიდ კალაშნიკოვმა. მისი თქმით სომხეთის მსგავსად რუსული იარაღის შესყიდვაზე შეშფოთებას გამოხატავს აზერბაიჯანიც.


„რუსეთი სომხეთს ისეთ თანამედროვე იარაღს აწვდის, რომელიც სხვა სახელმწიფოებს არ მიეწოდება. ეს კი ბაქოს გარკვეულ შეშფოთებას იწვევს“, - განაცხადა კალაშნიკოვმა.


4-5 ნოემბერს ერევანში „კუხოს“ საპარლამენტო ასამბლეის საბჭოს სხდომა იმართება, რომელშიც ორგანიზაციის წევრი ქვეყნების გარდა სერბეთის, ავღანეთის, ირანისა და კუბის დელეგაციები მონაწილეობენ.


სხვა სიახლეები