• Ƀ/$

ისტორიაში უდიდესი გარიგება ირღვევა

22 ნოემბერი 11:43 | ანალიტიკა

საუდის არაბეთის სახელმწიფო ნავთობკომპანიის Saudi Aramco წარუმატებელი IPO-ს გამო ერ–რიადმა მსოფლიოს უმსხვილესი ფონდების მომსახურებაზე უარი თქვა და რეგიონულ ინვესტორებზე აპირებს ფოკუსირებას.

ამის შესახებ ავტორიტეტული გამოცემა Financial Times რამდენიმე წყაროზე დაყრდნობით წერს.


წლების განმავლობაში ამ გარიგებას ისეთი კომპანიები ემსახურებოდნენ, როგორებიცაა JPMorgan Chase, Morgan Stanley, Citigroup, Credit Suisse და Goldman Sachs. ახლა კი გადაწყდა, რომ აქციების განთავსებით დაკავდებიან HSBC, საუდიტების NCB და Samba Capital.


ბრიტანული HSBC პარტნიორების სიაში იმიტომ დარჩა, რომ საუდის არაბეთის საფინანსო ბაზარზე მუშაობს და Saudi British Bank–შიც ფლობს წილს, რომელიც ქვეყნის ერთ–ერთი უმსხვილესი ბანკია. გაზეთის წყაროების მტკიცებით, ერ–რიადი უპირველესად სპარსეთის ყურის ქვეყნების ინვესტორებითაა დაინტერესებული.


IPO-ზე გასვლამდე სამეფოს ხელისუფლება კომპანიას $2 ტრილიონად აფასებდა. მაგრამ, გლობალური ბანკები გაცილებით მოკრძალებული აღმოჩნდნენ მის შეფასებაში. მაგალითად, Bank of America–მ არ გამორიცხა, რომ Saudi Aramco–ს ფასი $1,22 ტრილიონამდე დავარდებოდა, ხოლო Goldman Sachs $1,6 ტრილიონს პროგნოზირებდა. ასეთი ინფორმაციის მიღების შემდეგ საუდის არაბეთმა კომპანიის წინასწარი ფასი $1,7 ტრილიონამდე დასწია.


კომპანიის განსათავსებელი აქციების მოცულობა 5 დეკემბერს გახდება ცნობილი, თუმცა არსებული ვარაუდით, კომპანიის აქციების 1,5% თითო აქციაზე $8–8,5–ის დიაპაზონში გაიყიდება. აქციების განსათავსებლად საუდის არაბეთის ბირჟა Tadawul შეირჩა.


ნავთობკომპანიის აქციების განთავსება ბევრჯერ გადაიდო. ბოლოს ეს საუდის არაბეთის ნავთობქარხანასა და ნავთობსაბადოებზე დრონებით მიტანილი იერიშის შემდეგ მოხდა, რომელზე პასუხისმგებლობაც იემენელმა ჰუთიებმა აიღეს. მაშინ ექსპერტები აღნიშნავდნენ, რომ სამეფო ვერ გასცემს გარანტიებს, რომ იგივე მომავალშიც არ განმეორდება, რაც შემოსავლებისთვის საფრთხეს წარმოადგენს.


კომპანიის აქციებიდან მიღებული შემოსავლების აკუმულირება საუდის არაბეთის ეროვნული კეთილდღეობის ფონდში მოხდება, საიდანაც უკვე ეკონომიკურ რეფორმებს მოხმარდება.


ეს IPO შეიძლებოდა ისტორიაში უდიდესი გამხდარიყო, მაგრამ ამ გარიგებიდან სამეფოს შემოსავლები დღეს $24 მლრდ–ს უტოლდება, რითაც Alibaba-ს რეკორდს ვერ ხსნის. ჩინურმა გიგანტმა 2014 წელს $25 მლრდ მოიზიდა.


სხვა სიახლეები

ექსკლუზივი