ნავთობპროდუქტების იმპორტიორთა კავშირი: ბაზარზე უხარისხო საავტომობილო ზეთები შემოდის

ბიზნესი 1639136040
საავტომობილო ზეთი

ნავთობპროდუქტების იმპორტიორთა კავშირი ეჭვობს, რომ საავტომობილო ზეთების ბაზარზე უხარისხო პროდუქცია შემოდის, რომელიც შემდეგ აქტიურად გამოიყენება ცნობილი ზეთების ბრენდების გასაყალბებლად.

ეჭვის საფუძველზე კავშირს პროდუქციის იმპორტის მაჩვენებელი აძლევს, რამდენადაც საცხებ-საპოხი მასალების იმპორტის ნიშნული უცვლელია - 2021 წლის იანვარ-თებერვალში ქვეყანაში საცხებ-საპოხი მასალების იმპორტმა 17,12 ათასი ტონა შეადგინა, რაც 2020 წლის ანალოგიური პერიოდის მაჩვენებელია.

კავშირში საყურადღებოდ მიაჩნიათ ის ფაქტი, რომ წელს საცხებ-საპოხი მასალების ყველაზე დიდი მომწოდებელი კვლავ ირანი გახდა. "ეს იმის მაჩვენებელია, რომ საავტომობილო ზეთების ბაზარზე კვლავინდებურად დიდი მოცულობით იქნება წარმოდგენილი უხარისხო, არასტანდარტული პროდუქტი, რომელიც ასევე აქტიურად გამოიყენება საავტომობილო ზეთების ცნობილი ბრენდების გასაყალბებლად", - განმარტავენ კავშირში.

ასოციაციაში ამბობენ, რომ ბენზინისა და დიზელის იმპორტის ზრდის (3,7%-ით) პარალელურად საცხებ-საპოხი მასალები არ იმატებს და ეს იმ პირობებში, როდესაც მიმდინარე წელს გასულ წელთან შედარებით ფაქტიურად არ ყოფილა ე.წ. „ლოკდაუნი“ და სხვადასხვა შეზღუდვა პანდემიიდან გამომდინარე, რასაც შეიძლება პირდაპირ უარყოფითად ემოქმედა საცხებ-საპოხი მასალების მოხმარებაზე.

საცხებ-საპოხი მასალების იმპორტის ყველაზე დიდი მოცულობა განხორციელდა ირანიდან 2,86 ათასი ტონა, რაც იმპორტის 16,7%-ია, მეორე ადგილზე თურქეთია 2,75 ათასი ტონით (16,1%), რუსეთი - 2,72 ათასი ტონა (15,9%); გერმანია - 1,44 ათასი ტონა (8,4%) და სხვ.