1780302120

სკოლის დამთავრება ახალგაზრდის ცხოვრებაში ერთ-ერთი ყველაზე მნიშვნელოვანი მოვლენაა. ეს არის ეტაპი, რომელიც მეგობრებთან, მასწავლებლებთან და ბავშვობის წლებთან გამომშვიდობებას უკავშირდება. თუმცა ბოლო წლებში საქართველოში სულ უფრო ხშირად ისმის კითხვა: გადაიქცა თუ არა ეს დღე დღესასწაულიდან ფინანსურ ტვირთად და სოციალურ წნეხად?მშობლების ნაწილის თქმით, სკოლის ბანკეტთან დაკავშირებული ხარჯები უკვე იმ მასშტაბს აღწევს, რომელიც ბევრი ოჯახისთვის სერიოზულ ფინანსურ გამოწვევად იქცა. საუბარია არა მხოლოდ ბანკეტის ორგანიზების საერთო ხარჯებზე, არამედ დამატებით დანახარჯებზეც, რომლებიც ტანსაცმელს, ვიზაჟს, ტრანსპორტს, ფოტოსესიებსა და სხვა მომსახურებებს უკავშირდება. ზოგიერთი მშობლის შეფასებით, საერთო ხარჯი 1300-დან 2000 ლარამდე მერყეობს, ზოგ შემთხვევაში კი ამ თანხასაც აღემატება.სწორედ ეს გარემოება აჩენს ყველაზე მნიშვნელოვან კითხვას: რა ხდება მაშინ, როდესაც კლასში ყველა ოჯახს ერთნაირი ფინანსური შესაძლებლობა არ აქვს?როგორც მშობლების ნაწილი აღნიშნავს, ზოგი ოჯახი იძულებულია მნიშვნელოვანი თანხა დახარჯოს მხოლოდ იმისთვის, რომ ბავშვი თანაკლასელებისგან გამორჩეული არ დარჩეს. სხვები კი საერთოდ უარს ამბობენ მონაწილეობაზე. ზოგიერთ შემთხვევაში თავად მოსწავლეები გამოხატავენ პროტესტს და ამბობენ, რომ არ სურთ ერთ დღეში იმ თანხის დახარჯვა, რომლის მოსაპოვებლად მშობლებს მთელი თვის შრომა სჭირდებათ.ამ პრობლემას მხოლოდ ფინანსური განზომილება არ აქვს. განათლების სპეციალისტების შეფასებით, საკითხი თანასწორობას, სოციალურ ჩართულობასა და ბავშვების ემოციურ კეთილდღეობასაც უკავშირდება. როდესაც კლასის ნაწილი ღონისძიებაში მონაწილეობს, ნაწილი კი ფინანსური მიზეზების გამო გარეთ რჩება, იქმნება განცდა, რომ მნიშვნელოვანი სასკოლო გამოცდილება ყველასთვის თანაბრად ხელმისაწვდომი აღარ არის.განსაკუთრებით საგულისხმოა ის გარემოება, რომ ბანკეტების ფორმატსა და მასშტაბს ხშირად თავად მოსწავლეები კი არა, უფროსები განსაზღვრავენ. მშობლები, სკოლის ადმინისტრაცია ან საორგანიზაციო ჯგუფები ქმნიან წარმოდგენას იმის შესახებ, როგორი უნდა იყოს „სრულყოფილი“ დამამთავრებელი ღონისძიება. შედეგად, ზოგჯერ მთავარი აქცენტი ემოციებიდან და ბავშვების საჭიროებებიდან გადადის სტატუსზე, შთაბეჭდილებაზე და გარეგნულ ეფექტზე.ამ პროცესში იკარგება მთავარი კითხვა: ვისთვის ეწყობა ეს დღე? თუ ბანკეტი პირველ რიგში მოსწავლეების დღესასწაულია, მაშინ მისი დაგეგმვისას მთავარი კრიტერიუმი ის უნდა იყოს, რომ მასში მონაწილეობა ყველა ბავშვს შეეძლოს. წინააღმდეგ შემთხვევაში, ღონისძიება საკუთარ არსს კარგავს და იმ ბავშვებისთვის სტრესის წყაროდ იქცევა, ვისაც ფინანსური შესაძლებლობები არ აქვს.საზოგადოებაში სულ უფრო ხშირად ისმის მოსაზრება, რომ კარგი მოგონებები და ძლიერი ემოციები პირდაპირ კავშირში არ არის ძვირად ღირებულ სასტუმროებთან, მდიდრულ დეკორაციებთან ან შთამბეჭდავ ბიუჯეტებთან. ბევრი მშობელი და სპეციალისტი მიიჩნევს, რომ გაცილებით მნიშვნელოვანია თბილი, მეგობრული და ინკლუზიური გარემო, სადაც ყველა მოსწავლე თანაბრად იგრძნობს თავს მნიშვნელოვანი მოვლენის მონაწილედ.მსოფლიოს სხვადასხვა ქვეყანაში დამამთავრებელი ღონისძიებების ორგანიზების განსხვავებული პრაქტიკა არსებობს. რიგ ქვეყნებში სკოლები ცდილობენ, ღონისძიებები ისე დაგეგმონ, რომ დამატებითი ფინანსური ტვირთი მინიმალური იყოს. მთავარი აქცენტი კეთდება არა ხარჯზე, არამედ გამოცდილებაზე და იმ განცდაზე, რომ სკოლის დასრულება საერთო წარმატებაა.საბოლოოდ, საკითხი მხოლოდ ბანკეტის ფასს არ ეხება. ეს არის დისკუსია იმაზე, თუ რა ღირებულებებს ვუზიარებთ ბავშვებს. ვასწავლით თუ არა მათ თანასწორობას, თანაგრძნობას და ერთმანეთის მხარდაჭერას, თუ ვქმნით გარემოს, სადაც მონაწილეობა ფინანსურ შესაძლებლობებზე ხდება დამოკიდებული.ალბათ ყველაზე მნიშვნელოვანი კითხვა სწორედ ეს არის: როგორ მოვაწყოთ ისეთი დამამთავრებელი დღე, რომლის მიღმაც არც ერთი მოსწავლე არ დარჩება? არც ფიზიკურად და არც ემოციურად. რადგან სკოლის დამთავრების მთავარი ღირებულება არა ბანკეტის ბიუჯეტი, არამედ ის საერთო მოგონებებია, რომლებიც ახალგაზრდებს მთელი ცხოვრების განმავლობაში გაჰყვებათ.mshoblebi.ge

1780040280

ფინანსთა სამინისტრომ ფიზიკური პირების მიერ უძრავი ქონების გაყიდვიდან მიღებული შემოსავლის დაბეგვრის საკითხზე საჯარო გადაწყვეტილება მიიღო.კერძოდ, სამინისტრო განმარტავს, თუ რა კრიტერიუმებს უნდა აკმაყოფილებდეს უძრავი ქონება იმისთვის, რომ საცხოვრებელ ბინად/სახლად ჩაითვალოს და მეპატრონე ქონების რეალიზაციის დროს, ნაცვლად 20%-ისა, მხოლოდ 5%-იანი განაკვეთით დაიბეგროს.როგორც გადაცემა „დილის მონეტიზაციაში" Nexia Georgia-ს მმართველმა პარტნიორმა დავით მამრიკიშვილმა განმარტა, აქტივის მიწოდებით მიღებული შემოსავლის საშემოსავლო გადასახადით დაბეგვრის მექანიზმთან დაკავშირებით ფინანსთა სამინისტროს მიერ გამოცემული საჯარო გადაწყვეტილება დამაზუსტებელი ხასიათისაა და არსებული ნორმების მკაფიო განმარტებას ისახავს მიზნად.მისივე თქმით, გადაწყვეტილებით ზუსტდება, აქტივის რეალური სტატუსი, რომლის საფუძველზეც, ქონების გასხვისების დროს, მესაკუთრის საგადასახადო ვალდებულებები განისაზღვრება.დავით მამრიკიშვილის განმარტებით, აღნიშნული მიდგომა კოდექსში აქამდეც არსებობდა და სპეციალისტები სწორედ ამის მიხედვით ხელმძღვანელობდნენ.როგორ დაიბეგრება აპარტამენტებისა და ბინების გაყიდვა - ფინანსთა სამინისტროს საჯარო გადაწყვეტილება„ეს საკითხი ნამდვილად ეხება თითქმის ყველა მოქალაქეს, ფიზიკურ პირს. გამომდინარე იქიდან, რომ ფიზიკური პირები ხშირად ახორციელებენ აქტივების მიწოდებას, რაც შესაძლოა, იყოს საცხოვრებელი ბინა ან წინარე ნასყიდობის უფლება (ჯერ საკუთრების უფლება არ მიუღია, მაგრამ დავუშვათ, მშენებარე ობიექტში იაფად იყიდა ფართი და ორი წლის შემდეგ გადაყიდა).ეს ასევე შეიძლება იყოს ტურისტული საწარმოს სტატუსის ფარგლებში შეძენილი აპარტამენტის გაყიდვა. პირობითად, ისეთი კატეგორიის აპარტჰოტელებში, როგორებიცაა: „ორბი“, „მგზავრები“ და ა.შ. ან სულაც, პირმა თავად ააშენა საცხოვრებელი სახლი და შემდგომ გაყიდა.ამ შემთხვევაში, საგადასახადო კანონმდებლობაში ზოგადი წესი, რა თქმა უნდა, გაწერილია, თუმცა გარკვეული დეტალები (თუ რა ითვლება საცხოვრებელ სახლად ან რა შემთხვევაში რა დაბეგვრის რეჟიმები გვაქვს) დასაზუსტებელი რჩებოდა.ბუნდოვანება ამ ნაწილში ფაქტია, რომ არსებობდა. შესაბამისად, მიმდინარე წლის 13 მაისს ფინანსთა სამინისტროს მიერ გამოიცა ე.წ. საჯარო გადაწყვეტილება.რა დაარეგულირა ახალმა საჯარო გადაწყვეტილებამ? - მოგეხსენებათ, რომ ფიზიკური პირის მიერ საცხოვრებელი ბინის გაყიდვისას, თუ პირი ქონებას ფლობს 2 წელზე მეტხანს და ამ ვადის გასვლის შემდეგ ყიდის მას, ნამეტი შემოსავალი (გაყიდვის ფასს მინუს შესყიდვის ფასი) განთავისუფლებულია საშემოსავლო გადასახადისგან.მაგრამ, თუ ეს საცხოვრებელი ბინა 2 წლის ვადაში გაყიდა - პირობითად, შეიძინა და 1 წელიწადში გაასხვისა, გადასახადის განაკვეთი 5%-იანია. ანუ, გვაქვს ძალიან შეღავათიანი ტარიფი.თუმცა, მნიშვნელოვანია, თუ რა ითვლება და რას აკვალიფიცირებს კანონმდებლობა საცხოვრებელ ბინად.კლასიფიკაცია გვეუბნება, რომ თუ საჯარო რეესტრის ამონაწერის მიხედვით, ქონება კვალიფიცირდება როგორც საცხოვრებელი ბინა და ფაქტობრივადაც დასტურდება, რომ ეს აქტივი გამოიყენება საცხოვრებლად, აღნიშნულ შემთხვევაში შეღავათი მოქმედია. 2 წლის შემდგომ გაყიდვა თავისუფლდება გადასახადისგან, ხოლო 2 წლამდე გაყიდვისას ნამეტი შემოსავალი 5%-ით იბეგრება.თუმცა, ყოველთვის არსებობდა კითხვა, მაგალითად, სასტუმრო ტიპის აპარტამენტებთან დაკავშირებით.პირობითად, პირმა შეიძინა აპარტჰოტელი ბაკურიანში და შესაძლოა, დეტალებში არ ჩაუღრმავდეს და უბრალოდ საცხოვრებელი ბინა ჰგონია. აქ სისტემა მუშაობს შემდეგნაირად: თუ კომპანია ყიდის აპარტამენტს და უკან იღებს იჯარით, თვითონვე მართავს, იღებს შემოსავალს და აქედან ნაწილს უნაზღაურებს აპარტამენტის მფლობელს.სამინისტროს ახალი საჯარო გადაწყვეტილების შესაბამისად, ასეთი აქტივი, როგორც სასტუმრო ინფრასტრუქტურის ნაწილი, არ განიხილება საცხოვრებელ ბინად. შესაბამისად, აქ 5%-იანი დაბეგვრის რეჟიმი არ მუშაობს.თუ მას ეს ფართი თავად სასტუმროზე გაქირავებული არ ექნება, თვითონ იცხოვრებს და ორწლიანი ფლობის შემდგომ გაყიდის, მაგ შემთხვევაში შეღავათით ისარგებლებს. მაგრამ, თუ ქონება ფლობიდან 2 წლის ვადაში გაასხვისა, მოცემულ შემთხვევაში, ნაცვლად 5%-იანი განაკვეთისა, ის დაიბეგრება საერთო წესით – 20%-ით, გამომდინარე იქედან, რომ ეს აქტივი არ კვალიფიცირდება საცხოვრებელ ბინად.ეს უფრო დამაზუსტებელი ცვლილებებია, ასე ვთქვათ, განიმარტა. 13 მაისს გამოქვეყნდა საჯარო გადაწყვეტილება, თუმცა მიმაჩნია, რომ ეს გარკვეული განმარტებაა.კოდექსში ეს ჩანაწერი აქამდეც არსებობდა და სიმართლე გითხრათ, ჩვენი ვარაუდითაც ასე უნდა ყოფილიყო, ვინაიდან სასტუმრო აპარტამენტი კლასიკური საცხოვრებელი ბინა არაა“, - განაცხადა დავით მამრიკიშვილმა.ცნობისთვის, დამტკიცებული წესის მიხედვით, უძრავი ქონება საცხოვრებელ ბინად/სახლად განიხილება იმ შემთხვევაში, თუ ის ერთობლივად აკმაყოფილებს შემდეგ კრიტერიუმებს: წარმოადგენს დამოუკიდებელ ერთეულს; შესაძლებელია მისი გამოყენება საცხოვრებლად; ტექნიკურად უზრუნველყოფილია ან შეიძლება უზრუნველყოფილი იყოს საბაზისო საინჟინრო კომუნიკაციებით; არ წარმოადგენს სხვა საქმიანობის ფუნქციურ ნაწილს. ფინანსთა სამინისტროს ამავე გადაწყვეტილებით, განისაზღვრა ის პუნქტებიც, თუ რა შემთხვევაში არ განიხილება უძრავი ქონება/მისი გაყიდვა საცხოვრებელ ბინად/სახლად და მის რეალიზაციად:„მეწარმე ფიზიკური პირის მიერ სამეწარმეო საქმიანობის ფარგლებში (დეველოპერული საქმიანობა, იპოთეკური მოთხოვნების უზრუნველყოფა და სხვა) განხორციელებული მიწოდება, არ განიხილება საცხოვრებელი ბინის/სახლის რეალიზაციად.სასტუმროს ინფრასტრუქტურის ფარგლებში არსებული ფართობი/ნომერი საცხოვრებელ ბინად/სახლად არ განიხილება.მშენებარე ობიექტი, საცხოვრებელ ბინად/სახლად განიხილება, თუ იგი მიწოდების მომენტში თავისი პროექტითა და დანიშნულებით წარმოადგენს საცხოვრებელ ერთეულს და მყიდველს გადაეცემა მისი საცხოვრებლად გამოყენებისთვის საჭირო ყველა ძირითადი უფლება“, - ნათქვამია დოკუმენტში.BPN

1780033921

სასკოლო კვებასთან დაკავშირებით ჩვენი მიზანი არის, რომ ეტაპობრივად ყველა სკოლაში არსებობდეს კვების შესაძლებლობა და პარალელურად, მოსწავლეებში დამკვიდრდეს ჯანსაღი კვების კულტურა, - ამის შესახებ განათლების მინისტრმა, გივი მიქანაძემ პარლამენტში, ინტერპელაციის წესით მოსმენისას განაცხადა.მიქანაძის თქმით, სკოლებში კვების მიმართულებით შემუშავდა შესაბამისი დოკუმენტი, რომელიც დეტალურად არეგულირებს პერსონალის ჰიგიენის, მონიტორინგისა და კონტროლის საკითხებს. როგორც მინისტრმა აღნიშნა, დოკუმენტი ასევე განსაზღვრავს დასაშვები და აკრძალული პროდუქტების ჩამონათვალს.„სკოლებში კვების მიმართულებით რამდენიმე მნიშვნელოვანი სამუშაო ჩატარდა. პირველ რიგში, შესწავლილ იქნა სკოლებში არსებული ბუფეტებისა და კვების ობიექტების მდგომარეობა და სკოლების რეაბილიტაციის პროცესში განსაკუთრებული აქცენტი კეთდება კვების ობიექტების მოწესრიგებაზე, რათა ეს ის ადგილი იყოს, სადაც შესაბამისად მოხდება საკვები პროდუქტის რეალიზაცია.სურსათის უვნებლობისა და კვების რაციონთან დაკავშირებული საკითხები მხოლოდ ჩვენი სამინისტროს კომპეტენციას დაქვემდებარებული საკითხი რომ არ არის, ეს ცალსახაა, ამიტომ, ამ მიმართულებით ჩვენ ინტენსიურად ვმუშაობთ როგორც ჯანდაცვის სამინისტროსთან, ასევე სოფლის მეურნეობის სამინისტროს სურსათის ეროვნულ სააგენტოსთან. შედეგად, შემუშავებულ იქნა შესაბამისი დოკუმენტი, რომელიც მინისტრის ბრძანებით დამტკიცდა. დოკუმენტი დეტალურად არეგულირებს პერსონალის ჰიგიენის, მონიტორინგისა და კონტროლის საკითხებს. ასევე განსაზღვრავს დასაშვები და აკრძალული პროდუქტების ჩამონათვალს.განსაკუთრებული ყურადღება ეთმობა ჯანსაღი კვების პრინციპების დაცვას. სკოლის კვების ბლოკში აიკრძალა ისეთი პროდუქტების გამოყენება, როგორიც არის საღეჭი რეზინი, კანფეტი, შოკოლადი, არომატიზებული წასახემსებლები, როგორიც არის ჩიფსები, ჟელიბონი და სხვ. მარილიანი, შაქრიანი ან ცხიმით დამუშავებული თხილეული, ხილი და ბოსტნეული, მაიონეზი და მაიონეზით შეზავებული ბოსტნეული, დაკონსერვებული პროდუქტები, თერმულად დამუშავებული კვერცხი, სოკო ნებისმიერი ფორმით, კრემიანი საკონდიტრო ნაწარმი, ტკბილი გაზიანი სასმელები და ყავა.სამინისტროსთვის ასევე მნიშვნელოვანია მონიტორინგის ეფექტიანი მექანიზმის არსებობა, სწორედ ამიტომ, სკოლები ვალდებულნი არიან, შექმნან მონიტორინგის ჯგუფები, რომელშიც ჩართულნი იქნებიან მოსწავლეები, მშობლები, მასწავლებლები, სასურველია ბიოლოგიის პედაგოგების, ასევე სკოლის ექიმი ან ექთანი და ადმინისტრაციის წარმომადგენლები.შეუსაბამობის აღმოჩენის შემთხვევაში, ჯგუფი ვალდებულია, დაუყოვნებლივ აცნობოს სკოლის დირექტორსა და სურსათის უვნებლობის სააგენტოს. სასკოლო ინფრასტრუქტურის განვითარებასთან ერთად, სამინისტრო შესაბამის უწყებებთან თანამშრომლობით აგრძელებს მუშაობას კვებისთვის შესაბამისი გარემოს უზრუნველსაყოფად.სასკოლო კვების პროგრამის განსავითარებლად განხორციელდა საჯარო სკოლების ინფრასტრუქტურის დეტალური მოკვლევა, საერთაშორისოდ აპრობირებული სასკოლო კვების ოთხი მოდელისთვის რელევანტურ საჭიროებებთან მიმართებაში. აღნიშნული ოთხი მოდელი მოიცავს ჰაბი სკოლების შექმნას, რომლებიც მოამარაგებენ სხვა სკოლებს. სკოლებში სამზარეულოების გამართვასა და ადგილზე მომზადებას და ე.წ. ლანჩბოქსებით მომარაგებას, თუმცა სასკოლო კვების სისტემის შემოღება იმაზე მეტია, ვიდრე უბრალოდ ინფრასტრუქტურის მოწესრიგება. საჭიროა სრული ლოჯისტიკური ქსელის აწყობა, მოწესრიგებული უნდა იყოს კვების ინფრასტრუქტურა, საკვების შენახვისთვის აუცილებელი პირობები. მომზადდეს შესაბამისი ადამიანური რესურსი, რათა სრულად იყოს უზრუნველყოფილი ჰიგიენურ-სანიტარული ნორმების დაცვა, შესაბამისად, სასკოლო საათებში კვების საკითხის მოგვარებას ჩვენ ვუდგებით სისტემურად და ორიენტირებული ვართ მდგრადი მექანიზმის შექმნაზე“, - განაცხადა გივი მიქანაძემ.www.interpressnews.ge