საქართველოს ბანკი - სუხიშვილების გენერალური სპონსორი20 ივლისიდან 1-ელ აგვისტომდე, ქართული ნაციონალური ბალეტი „სუხიშვილები“ მაყურებელს „თაკარას“ ღია სცენაზე ახალ პროგრამას -„რეკონსტრუქცია“ წარუდგენს. განახლებული სივრცე, ახალი დადგმები და სპეციალურად ამ სეზონისთვის შექმნილი მუსიკა, ქორეოგრაფია და კოსტიუმები უკვე მესამე წელია „თაკარას“ ზაფხულის ერთ-ერთ გამორჩეულ კულტურულ მოვლენად აქცევს.ქართული ცეკვა მხოლოდ ქორეოგრაფია არასდროს ყოფილა - ის ქვეყნის ისტორიას, კულტურასა და იდენტობას ინახავს. 80 წელია, „სუხიშვილები“ ამ მემკვიდრეობას მსოფლიოს სხვადასხვა სცენაზე აცოცხლებენ და ტრადიციას მუდმივად ახალ ფორმებს სძენენ. სწორედ ამ უწყვეტი განვითარების იდეის გაგრძელებაა საქართველოს ბანკისა და SOLO-ს მხარდაჭერით შექმნილი „თაკარა“ - სივრცე, სადაც კლასიკური ქართული ქორეოგრაფია თანამედროვე შემოქმედებით ძიებას ხვდება.„თაკარა“ განსაკუთრებული ფორმატით გამოირჩევა - ახალ შემოქმედებით იდეებთან და ექსპერიმენტულ დადგმებთან ერთად ღია სივრცეში მაყურებელი წარმოდგენას მაქსიმალურად ახლოდან ადევნებს თვალს, რაც მოცეკვავეების ტექნიკის, სინქრონისა და ენერგიის სრულიად განსხვავებულ გამოცდილებას ქმნის და სცენასა და აუდიტორიას შორის არსებულ საზღვრებს ამცირებს.წლევანდელი პროგრამა „რეკონსტრუქცია“ სწორედ ამ იდეის გაგრძელებაა. სპეციალურად „თაკარასთვის“ შექმნილი ახალი დადგმები ტრადიციულ ქართულ ქორეოგრაფიას თანამედროვე მუსიკასთან, სცენურ გადაწყვეტებსა და ვიზუალურ ხელწერასთან აერთიანებს, რაც კიდევ ერთხელ წარმოაჩენს „სუხიშვილების“ მუდმივ სწრაფვას განვითარების, ექსპერიმენტისა და სიახლისკენ.შეგახსენებთ, რომ საქართველოს ბანკი მრავალი წელია „სუხიშვილების“ გენერალური სპონსორია და ანსამბლთან ერთად ხელს უწყობს ქართული კულტურის პოპულარიზაციასა და იმ მემკვიდრეობის გაგრძელებას, რომელიც ათწლეულებია ქვეყნის ერთ-ერთ მნიშვნელოვან კულტურულ სიმბოლოდ რჩება.20 ივლისიდან 1-ელ აგვისტომდე „თაკარაზე“ გამართული წარმოდგენების ბილეთების შეძენას SOLO მომხმარებლები Biletebi.ge-სა და TKT.ge-ზე SOLO ბარათით გადახდისას 20%-იანი ფასდაკლებით შეძლებენ."სუხიშვილები" - საქართველოს შემოქმედება, რომელიც არ ჩერდება.საქართველოს ბანკი - „სუხიშვილების“ მთავარი სპონსორი.

4 წელი, 2 000-ზე მეტი მოსწავლე, 500-ზე მეტი სტიპენდიატი - საქართველოს ბანკი, განათლების მთავარი მხარდამჭერი ბანკი.საქართველოს ბანკი, როგორც განათლების მთავარი მხარდამჭერი, ახალგაზრდებისთვის ხარისხიან განათლებაზე ხელმისაწვდომობის გაზრდასა და ახალი შესაძლებლობების შექმნას აქტიურად აგრძელებს.  სწორედ ამ მიზნით, საქართველოს ბანკმა, კომაროვის სკოლასთან ერთად, შექმნა STEM სკოლა - საგანმანათლებლო პროექტი, რომელიც საქართველოში ზუსტი და საბუნებისმეტყველო მეცნიერებების სწავლების ხელშეწყობასა და პოპულარიზაციას ემსახურება.STEM სკოლა, მთელი საქართველოს მასშტაბით, VII-XI კლასის მოსწავლეებს აძლევს შესაძლებლობას, გაიარონ ერთწლიანი სასწავლო კურსი და კომაროვის პროფესიონალი მასწავლებლებისგან მიიღონ ხარისხიანი თეორიული ცოდნა და პრაქტიკული გამოცდილება.პროექტში მოსწავლეები საქართველოს ყველა რეგიონიდან არიან ჩართულნი. სრულად დისტანციური სწავლება კი მათ შესაძლებლობას აძლევს, საცხოვრებელი ადგილის მიუხედავად, დაეუფლონ მომავლის პროფესიებისთვის საჭირო ცოდნასა და უნარებს.პროექტის წარმატებაზე ციფრებიც მეტყველებს: STEM სკოლის პირველი, მეორე და მესამე მოდული უკვე 2 000-ზე მეტმა მოსწავლემ დაასრულა, საქართველოს ბანკის სტიპენდიით კი 500-ზე მეტმა მოსწავლემ ისარგებლა.სასწავლო კურსის ფარგლებში მოსწავლეები სწავლობენ ფიზიკას, ქიმიას, ბიოლოგიას, კომპიუტერულ პროგრამირებას, ელექტროინჟინერიას, მიკროელექტრონიკას, ლოგიკურ აზროვნებასა და ალგორითმების შექმნას. ასევე, ეუფლებიან Tinkercad-ის გამოყენებას, Arduino-ს დაპროგრამებასა და სენსორების მართვას. კურსის ბოლოს კი საკუთარი ინტერესების მიხედვით STEM პროექტებს ქმნიან და მიღებულ ცოდნას პრაქტიკაში იყენებენ.STEM სკოლის კურიკულუმი დასავლური საგანმანათლებლო პრინციპებისა და გამოცდილების საფუძველზეა შემუშავებული, სასწავლო პროცესს კი STEM სწავლების გამოცდილების მქონე კომაროვის პროფესიონალები უძღვებიან.პროექტის ფარგლებში საქართველოს ბანკი საუკეთესო შედეგების მქონე მოსწავლეებს სწავლის დაფინანსების შესაძლებლობასაც აძლევს, ყოველწლიურად 90 მოსწავლიდან 60 სრულ, ხოლო 30 - 50%-იან დაფინანსებას იღებს.შედეგად, საქართველოს ბანკისა და კომაროვის ერთობლივი პროექტი ათასობით მოსწავლეს აძლევს შესაძლებლობას, საქართველოს ნებისმიერი რეგიონიდან მიიღოს ხარისხიანი განათლება და გადადგას პირველი ნაბიჯები მომავლის პროფესიებისკენ.STEM სკოლის ახალი მიღება აგვისტოს ბოლოს გამოცხადდება და მოსწავლეებს მთელი საქართველოდან კვლავ ექნებათ შესაძლებლობა, ჩაერთონ პროექტში და მოიპოვონ საქართველოს ბანკის სტიპენდია.პროექტის შესახებ დეტალური ინფორმაციის მისაღებად ეწვიეთ ვებგვერდს: ganatleba.bog.ge 

საყოველთაო ჯანდაცვის პროგრამა გაფართოვდა - ძვლის ტვინის ტრანსპლანტაციის შემდგომ განვითარებული მძიმე გართულების, GVHD რეაქციის, სამკურნალოდ სახელმწიფო ძვირად ღირებულ მედიკამენტს „ჯაკავს“ დააფინანსებს.საქართველოს მოქალაქეებს ძვლის ტვინის ტრანსპლანტაციის ოპერაცია უფინანსდებათ როგორც საქართველოში, ისე საზღვარგარეთ. თუმცა, გადანერგვის შემდეგ, პაციენტთა ნაწილს უვითარდება რეაქცია GVHD - „ტრანსპლანტატი მასპინძლის წინააღმდეგ“. ეს არის მდგომარეობა, როდესაც გადანერგილი დონორის უჯრედები პაციენტის ორგანიზმს ებრძვიან. ასეთ შემთხვევებში სასიცოცხლო მნიშვნელობა აქვს თანამედროვე და მაღალტექნოლოგიურ მედიკამენტურ მკურნალობას. საერთაშორისო კლინიკური რეკომენდაციების მიხედვით, აღნიშნული გართულების მართვის ერთ-ერთ საუკეთესო სამკურნალო საშუალებად აღიარებულია მედიკამენტი „ჯაკავი“ („რუქსოლიტინიბი“), რომელიც განსაკუთრებით მნიშვნელოვანია იმ პაციენტებისთვის, რომელთა დაავადება სტანდარტულ ჰორმონალურ თერაპიას აღარ ექვემდებარება. შედეგად, სახელმწიფომ მიიღო გადაწყვეტილება, რომ პრეპარატი „ჯაკავი“ GVHD რეაქციის მქონე ყველა პაციენტს სრულად დაუფინანსდეს.მნიშვნელოვანი სიახლეა ისიც, რომ სახელმწიფოს მიერ შესყიდული მედიკამენტი „ჯაკავი“ უკვე ხელმისაწვდომია ყველა ონკოჰემატოლოგიური დიაგნოზის მქონე ბენეფიციარისთვის, მათ შორის, 18 წლამდე ასაკის ბავშვებისთვის. აღნიშნული ცვლილებები კიდევ უფრო გაზრდის მაღალი ხარისხის მკურნალობაზე ხელმისაწვდომობას და პაციენტთა ოჯახების ფინანსურ ტვირთს საგრძნობლად შეამსუბუქებს.

კირიბატი მთლიანი შიდა პროდუქტის (მშპ) 16.4%-ს განათლებაზე ხარჯავს, რაც მსოფლიოში ყველაზე მაღალი წილია - ამის შესახებ აღნიშნულია Visual Capitalist-ის პუბლიკაციაში, რომელიც მოიცავს 181 ქვეყნის მონაცემებს.როგორც გამოცემა წერს, შემოსავლების დონის განსხვავების მიუხედავად, ქვეყნების უმეტესობა მშპ-ს 4%-დან 6%-მდე ინვესტირებას განათლებაში ახდენენ. თუმცა, გასათვალისწინებელია, რომ განათლებაზე მშპ-ის უფრო მაღალი წილის გამოყოფა ავტომატურად არ განაპირობებს უკეთეს შედეგებს.გადამწყვეტია, რამდენად ეფექტიანად იხარჯება აღნიშნული რესურსი - სწავლების ხარისხის, სასწავლო პროგრამების, განათლების მართვისა და ხელმისაწვდომობის კუთხით. შესაბამისად, მსგავსი დანახარჯების მქონე ქვეყნებს შესაძლოა, განათლების სფეროში ერთმანეთისგან მნიშვნელოვნად განსხვავებული შედეგები ჰქონდეთ.მონაცემები აჩვენებს, რომ რეიტინგის სათავეში პატარა კუნძულოვანი ქვეყნები დომინირებენ - კირიბატი ლიდერობს მშპ-ს 16.4%-ით, მას მოსდევს ტუვალუ (12.9%) და მიკრონეზია (11.6%).10 ქვეყანა, სადაც განათლებაზე მშპ-ის ყველაზე დიდი წილი მოდის, ასე გამოიყურება: კირიბატი - 16.39%; ტუვალუ - 12.85%; მიკრონეზია - 11.56%; ნამიბია - 9.08%; ალჟირი - 8.98%; კუბა - 8.44%; სოლომონის კუნძულები - 8.29%; ბოტსვანა - 8.06%; მარშალის კუნძულები - 7.7%; ვანუატუ - 7.64%. თუ მსოფლიოს მსხვილ ეკონომიკებს განვიხილავთ, განათლებაზე გამოყოფილი მშპ-ის წილით შვედეთი ლიდერობს (7.3%), მას კი დანია (6.4%) მოსდევს.კერძოდ, 10 უმსხვილესი ეკონომიკის განათლებაზე გამოყოფილი ხარჯების წილი მშპ-ში ასეთია: შვედეთი - 7.3%; დანია - 6.4%; ბელგია - 6.3%; სამხრეთ აფრიკა - 6%; ისრაელი - 5.9%; გაერთიანებული სამეფო - 5.9%; ბრაზილია - 5.6%; ნორვეგია - 5.4%; აშშ - 5.4%; სამხრეთ კორეა - 5.4%. რაც შეეხება საქართველოსა და მეზობელ ქვეყნებს, მშპ-ში განათლებაზე გათვალისწინებული წილით პირველ ადგილზე რუსეთია, ბოლო ადგილს კი სომხეთი იკავებს.უფრო კონკრეტულად, საქართველოს მეზობელ ქვეყნებს შორის შემდეგი მაჩვენებლებია: რუსეთი (გლობალურ რეიტინგში 95-ე ადგილი) - მშპ-ის 4.16%; საქართველო (104 ადგილი) - მშპ-ის 3.98%; აზერბაიჯანი (115 ადგილი) - მშპ-ის 3.66%; თურქეთი (136 ადგილი) - მშპ-ის 3.1%; სომხეთი (157 ადგილი) - მშპ-ის 2.44%. BPN

კომპანია Akshaya Group საქართველოში Starbucks-ის ქსელის გაფართოებას გეგმავს. ინვესტიციების სააგენტოს თავმჯდომარის მოადგილის, თორნიკე სულაბერიძის განცხადებით, ახალი ფილიალების გახსნის შესაძლებლობა განიხილება არა მხოლოდ თბილისში, არამედ რეგიონებშიც.მისი თქმით, ერთ-ერთ შესაძლო ლოკაციად ბათუმი განიხილება, ასევე სხვა ქალაქებიც.„უკვე მიმდინარეობს ლოკაციების შერჩევა, რაშიც ჩვენც აქტიურად ვართ ჩართული. მაღალი მოთხოვნის გამო, რომელიც Starbucks-ის გახსნას პირველივე დღიდან მოჰყვა, კომპანიას სურს, ახალი ფილიალები რაც შეიძლება სწრაფად გახსნას“, - განაცხადა სულაბერიძემ გადაცემაში „ბიზნესი რუსთავი 2-ზე“.

„საერთაშორისო გამჭვირვალობა - საქართველომ“ თანამდებობის პირების მიერ დეკლარირებული საჩუქრები შეისწავლა. ორგანიზაციის ინფორმაციით, 2025 წლის სექტემბრიდან 2026 წლის აპრილამდე პერიოდში 379-მა თანამდებობის პირმა ჯამში 24 მილიონი ლარის ღირებულების საჩუქარი მიიღო.მათივე მონაცემებით, თანამდებობის პირებმა ფულადი საჩუქრების სახით 11 მილიონი ლარი, ხოლო უძრავი ქონების სახით 12 მილიონი ლარი მიიღეს. გარდა ამისა, დეკლარაციებში მითითებულია საჩუქრად მიღებული ავტომობილები, იარაღი და სამკაული. ორგანიზაციის ცნობით, დეკლარირებული საჩუქრების 60.78% მშობლებისგან არის მიღებული.„საერთაშორისო გამჭვირვალობა - საქართველო“ განმარტავს, რომ კანონმდებლობის თანახმად, თანამდებობის პირები ვალდებულნი არიან ქონებრივ დეკლარაციაში ასახონ მათი ან მათი ოჯახის წევრის მიერ მიღებული ნებისმიერი საჩუქარი, რომლის ღირებულება 500 ლარს აღემატება. ამასთან, მათ ეკრძალებათ ისეთი საჩუქრის მიღება, რომლის ღირებულება მათი წლიური ხელფასის 5%-ს აღემატება.ამავე დროს, აღნიშნული შეზღუდვები არ ვრცელდება ოჯახის წევრებისა და ახლო ნათესავებისგან მიღებულ საჩუქრებზე.ორგანიზაციის შეფასებით, მიუხედავად იმისა, რომ ეს გამონაკლისი ლოგიკურია, სათანადო ზედამხედველობის არარსებობის შემთხვევაში არსებობს რისკი, ის კანონის „ხვრელად“ იქცეს და არაკეთილსინდისიერმა მოხელეებმა უკანონოდ მიღებული შემოსავლის ლეგალიზებისთვის გამოიყენონ.„საერთაშორისო გამჭვირვალობა - საქართველო“ მიიჩნევს, რომ ყოველ ჯერზე, როდესაც საჯარო მოხელე დიდი ოდენობის თანხას ან მაღალი ღირებულების ნივთს საჩუქრის სახით ადეკლარირებს, სახელმწიფო აუდიტის სამსახურმა უნდა შეისწავლოს, ხომ არ არსებობს უკანონო შემოსავლის ლეგალიზების მცდელობის ნიშნები. ორგანიზაციის განცხადებით, მინიმუმ უნდა შემოწმდეს, ჰქონდა თუ არა საჩუქრის გამცემ პირს ასეთი ღირებულების საჩუქრის გაცემის ფინანსური შესაძლებლობა.