15 დეკემბერს ქუთაისში უნალექო ამინდს ელოდებიან, დღისით +9 და ღამით +4 გრადუსია მოსალოდნელი.წვიმიანი დღეა ნავარაუდევი ოზურგეთში, დღისით +11 გრადუსი დაფიქსირდება, ღამით კი +5. ბათუმშიც ნალექიანი დღე იქნება. დღისით ჰაერი +10 გრადუსამდე გათბება, ხოლო ღამით +6 გრადუსი დაფიქსირდება.უნალექო ამინდია მოსალოდნელი ფოთში. დღისით +11 გრადუსი დაფიქსირდება, ღამით კი +6 გრადუსია მოსალოდნელი. ასეთივე ამინდი იქნება ზუგდიდში, დღისით ტემპერატურა +9, ღამით კი +3 გრადუსია ნავარაუდევი.უნალექო დღეა სოხუმში. +9 გრადუსია მოსალოდნელი დღისით, ღამით +5 გრადუსი დაფიქსირდება.მესტიაში თოვს. დღისით -2 გრადუსი იქნება, ღამით კი -10 გრადუსი დაფიქსირდება. ამბროლაურშიც თოვლს ელოდებიან. ჰაერი +3 გრადუსამდე გათბება, ღამით კი -4 გრადუსი დაფიქსირდება.მზიანი ამინდია ჭიათურაშიც, დღისით +5 გრადუსი, ღამით კი -4 გრადუსი დაფიქსირდება.ახალციხეშიც უნალექო დღეა. დღისით ჰაერი +2 გრადუსამდე გათბება, ღამით კი ტემპერატურა -9 გრადუსი იქნება.ნალექს არც ბორჯომში ელოდებიან. +2 იქნება დღისით, ღამით კი -6 გრადუსი დაფიქსირდება. უნალექო დღეა მოსალოდნელი ბაკურიანში, დღისით -2 გრადუსია მოსალოდნელი, ღამით -12 გრადუსი დაფიქსირდება.მზიან ამინდს ელოდებიან გორში, დღისით +6 გრადუსი, ღამის განმავლობაში კი -5 გრადუსი დაფიქსირდება. მზიანი დღე იქნება ცხინვალში, ჰაერის ტემპერატურა +5 გრადუსი იქნება, ღამით კი -6 გრადუსი დაფიქსირდება.გუდაურში უნალექო დღე იქნება, დღის განმავლობაში -4 გრადუსი დაფიქსირდება, ღამით კი ჰაერის ტემპერატურა -11 გრადუსი იქნება. ომალოშიც უნალექო ამინდი იქნება, დღისით -2, ღამით კი -10 გრადუსი დაფიქსირდება.ლაგოდეხში უნალექო დღეს ელოდებიან. ჰაერის ტემპერატურა დღის განმავლობაში +9 გრადუსი იქნება, ღამით კი +0 გრადუსი დაფიქსირდება. მზიანი დღე იქნება თელავშიც, +7 გრადუსი დაფიქსირდება, ღამით კი -1 გრადუსია ნავარაუდევი.უნალექო ამინდს ვარაუდობენ გურჯაანშიც. დღისით +8 გრადუსი, ღამით კი -2 გრადუსი დაფიქსირდება. სიღნაღში მზიან ამინდს ელოდებიან, დღისით +6 გრადუსია მოსალოდნელი, ღამით -2 გრადუსი დაფიქსირდება.უნალექო დღეა რუსთავში, დღისით +8 გრადუსია მოსალოდნელი, ღამით კი +0 გრადუსი დაფიქსირდება.თბილისში მზიან ამინდს ვარაუდობენ. ჰაერის ტემპერატურა დღისით +7 გრადუსს მიაღწევს, ღამით კი +0 გრადუსი იქნება.

ახალი წლის სადღესასწაულო დღეების მოახლოების პარალელურად, გარემოს დაცვისა და სოფლის მეურნეობის სამინისტროს შესაბამისი სამსახურები წიწვოვანი მცენარეების მოპოვებასა და ტრანსპორტირებაზე კონტროლს ამკაცრებენ.როგორც გარემოს დაცვისა და სოფლის მეურნეობის სამინისტროს მიერ გავრცელებულ ინფორმაციაშია ნათქვამი, ეროვნული სატყეო სააგენტო კიდევ ერთხელ მოუწოდებს მოსახლეობას, ნუ გაანადგურებენ ბუნებრივ სიმდიდრეს და გამოიყენონ ხელოვნური ნაძვის ხე.„წიწვოვანების უკანონოდ მოპოვებაზე, ტრანსპორტირებასა და რეალიზაციის წესის დარღვევაზე ჯარიმა, პირველ ჯერზე, 2000 ლარით განისაზღვრება, ხოლო გამეორების შემთხვევაში, დგება სისხლის სამართლებრივი პასუხისმგებლობა. ამავდროულად, დაანგარიშდება გარემოსთვის მიყენებული ზიანი. თუ ზიანის ოდენობა აჭარბებს 1000 ლარს, პირის მიმართ აღიძვრება სისხლის სამართლის საქმე - ჯარიმა/ან თავისუფლების აღკვეთა 1-დან 3 წლამდე, ხოლო დიდი ოდენობით წიწვოვანის უკანონო მოპოვების შემთხვევაში, თუ გარემოსთვის მიყენებული ზიანი აჭარბებს 3000 ლარს, სასჯელი ითვალისწინებს თავისუფლების აღკვეთას 5-დან 7 წლამდე. ყოველ გამოვლენილ სამართალდარღვევაზე კანონმდებლობით განსაზღვრული სანქციები გატარდება“, - აღნიშნა ეროვნული სატყეო სააგენტოს უფროსმა, კახა ცერცვაძემ.წიწვოვანი ხე-მცენარეების კანონიერად მოპოვება შესაძლებელია სანერგეებში, პლანტაციებში, საკარმიდამო ნაკვეთებში, ასევე, იმპორტირება.„კანონიერად მოპოვებული ხე-მცენარეების რეალიზაციის შემთხვევაში, რეალიზატორმა უნდა წარმოადგინოს ხე-მცენარის კანონიერად ფლობის დამადასტურებელი სათანადო დოკუმენტი. თუ წიწვოვანი მცენარე მოპოვებულია კერძო საკუთრებაში არსებულ მიწის ნაკვეთზე ან ხელოვნურად გაშენებულ სანერგეში, მცენარეების ტრანსპორტირებისთვის სავალდებულოა მათი ადგილწარმოშობის ცნობა, რომელსაც ადგილობრივი მუნიციპალიტეტის მერია გასცემს“, - ნათქვამია ინფორმაციაში.

ეროვნული ბანკის მიერ 12 დეკემბერს დადგენილი კურსით, დღეს 1 აშშ დოლარის ღირებულება 2.6985 ლარი, ხოლო ევროს კურსი 3.1640 ლარია.გთავაზობთ თბილისის სხვადასხვა უბნებში მოქმედ სავალუტო ჯიხურებში ლარის გაცვლით კურსს ევროსა და დოლარის მიმართ.ვალუტის კურსი ჯიხურებში დღეს, 09:30 საათის მდგომარეობით:ამ მომენტისთვის, (09:30 საათისთვის) საბურთალოზე მდებარე სავალუტო ჯიხურებში ერთი დოლარის ყიდვას მოქალაქეები 2.6970 ლარად შეძლებენ, სავალუტო ჯიხურები კი - 2.6900 ლარად ყიდულობენ. ერთი ევროს შეძენა მოქალაქეებს 3.1680 ლარად, გაყიდვა კი 3.1500 ლარად შეუძლიათ.ჩუღურეთში დოლარის ყიდვას მოქალაქეები 2.6990 ლარად, ხოლო გაყიდვას 2.6940 ლარად შეძლებენ. რაც შეეხება ევროს, მისი ყიდვა მოქალაქეებს - 3.1680 ლარად, ხოლო გაყიდვა - 3.1540 ლარად შეუძლიათ.სადგურის მოედნის მიმდებარე ტერიტორიაზე ვალუტის გადამცვლელ პუნქტებში ერთი დოლარის ყიდვა მოქალაქეებს - 2.6990 ლარად, გაყიდვა კი - 2.6950 ლარად შეუძლიათ. რაც შეეხება ევროს, ერთ ევროს ყიდვას მოქალაქეები 3.1700 ლარად, გაყიდვას კი - 3.1550 ლარად შეძლებენ.თავისუფლების მოედნის მიმდებარე ტერიტორიაზე, სავალუტო ჯიხურებში 1 აშშ დოლარის ყიდვას მოქალაქეები 2.7000 ლარად, ხოლო გაყიდვას 2.6700 ლარად შეძლებენ, რაც შეეხება ევროს, მისი ყიდვა მოქალაქეებს 3.1700 ლარად, გაყიდვა კი 3.1250 ლარად შეუძლიათ.

სახელმწიფო მას შემდეგ, რაც ნარკოდამოკიდებულთა იძულებითი მკურნალობის გადაწყვეტილება მიიღო, ცდილობს სამედიცინო ცენტრებში ამ მკურნალობის შესაბამისი ინფრასტრუქტურის მოწყობას.ჯერჯერობით მხოლოდ თბილისშია ყოფილი რესპუბლიკურის ტერიტორიაზე 22 პაციენტზე გათვლილი ასეთი ცენტრი მოწყობილი - დასავლეთ საქართველოში იძულებითი მკურნალობის დაწესებულებას 160 პაციენტისთვის ახლა აკეთებენ.ქუთაისში, ნარკოდამოკიდებულებს ტუბერკულოზისა და ინფექციური პათოლოგიების ცენტრის ყოფილ შენობაში უმკურნალებენ - შენობის მოწყობა ფანჯრების გისოსებით აღჭურვით იწყება.ფასადზე გისოსების მონტაჟში 68 845 ლარი დაიხარჯება.გამარტივებული შესყიდვის დოკუმენტაციიდან ირკვევა, რომ სახელმწიფოს ნარკოდამოკიდებულთა იძულებითი მკურნალობისთვის 200-250 საწოლზე გათვლილი სამედიცინო დაწესებულება სჭირდება.ქუთაისში, ჩხობაძის ქუჩა #20-ში ნარკოდამოკიდებულთა იძულებითი მკურნალობის დაწესებულებას ფსიქიკური ჯანმრთელობისა და ნარკომანიის პრევენციის ცენტრი აწყობს.ეს ორგანიზაცია გამარტივებული შესყიდვის დასაბუთებაში წერს, რომ პაციენტების მკურნალობის პროცესი უკვე დაწყებულია."უახლოეს მომავალში მოსალოდნელია სავალდებულო მკურნალობას დაქვემდებარებული პაციენტების ნაკადის ზრდა, ვინაიდან, დღეის მდგომარეობით კომისიაში იძულებით მკურნალობის საკითხი უკვე განიხილება იმაზე მეტი პირის მიმართ, ვიდრე არსებული რესურსი იძლევა მათი შემდგომი განთავსების საშუალებას. მკურნალობის პროცესის სათანადოდ წარმართვისთვის კი საჭიროა შესაბამისი ინფრასტრუქტურის არსებობა და დაწესებულების დაკომპლექტება სათანადო უნარებისა და კვალიფიკაციის მქონე პერსონალით", - წერს ცენტრი და ითხოვს ნებართვას კრიტიკული ინფრასტრუქტურის მოსაწყობად.სახელმწიფომ ნარკოპოლიტიკაში სადამსჯელო ზომები 2025 წლის გაზაფხულზე გაამკაცრა. ამავე დროს მიიღეს გადაწყვეტილება, ნარკოდამოკიდებულ ადამიანთა იძულებითი მკურნალობის შესახებ. მკურნალობა განიხილება, როგორც სასჯელი სისხლის სამართლის დამნაშავეებისთვის. გადაწყვეტილებას მოსამართლე იღებს.www.radiotavisupleba.ge

“ქვეყანაში სამეწარმეო განათლების დეფიციტია, ბიზნესი ნუ გერევათ თაღლითობაში, ცნობიერება ძალიან დაბალ დონეზეა", - ამის შესახებ "ბიოლის" დამფუძნებელმა თამაზ მჭედლიძემ "პალიტრანიუსის" გადაცემაში “შენობით ბიზნესთან" განაცხადა.მისივე თქმით,“ველნესის" მიმართულებას ჩვენს ქვეყანაში დიდი პოტენციალი აქვს და ამას გამოყენება სჭირდება."ბიზნესპრესნიუსი" გთავაზობთ ინტერვიუს მცირე შემოკლებით:პირველ რიგში, მოგვიყევით სიახლეების შესახებ...საქართველოში ძალიან რთულია იმის დაგეგმვა და გაკეთება, რაც გინდა, მაგრამ მივდივარ ნელ-ნელა წინ. შენი ბოლო ვიზიტის შემდეგ, სიახლე ის არის, რომ კოტეჯებზე მწვანე სახურავები გავაკეთეთ, კიბეებზე ადიხარ და შენი საკუთარი ეზო გაქვს, სასიამოვნოა ადამიანისთვის. სკულპტურები მიყვარს ძალიან და ეგეც დავამატეთ. მთავარი, რაც დავასრულეთ, ეს არის ტბა. ისე ფურორი კი გამოიწვია, მართლა ძალიან ლამაზი გამოვიდა. ექვსი ჭაბურღილიდან იკვებება, ფერი გამოვიდა სასწაული. ხელოვნური ტბა კი არის, მაგრამ ყველას ცურვა უნდა. სამი შალე დავდგი მხოლოდ. ყველა მეუბნება, რომ კიდევ დავდგათ, მაგრამ გეტოდ არ მინდა აქაურობა ვაქციო. მინდა, რომ სიწყნარე და იდუმალება შევინარჩუნო, მაგრამ ქართველების ხელში რა სიწყნარეს და სიჩუმეს შეინარჩუნებ?! ამ მხრივ, საყვედური კი მინდა ვთქვა, ხმაურიანი ხალხი ვართ, მაგრამ უმეტესობა ამოდის, რომ ჩიტებს უსმინონ და ბუნების გულის ფეთქვას.„ველნესი“, რომელიც არის მრავალმილიონიანი ინდუსტრია მსოფლიოს მასშტაბით და მზარდი, თუმცა საზოგადოების ჩართულობის და ცნობიერების გარეშე, ძალიან რთულია, რომ ინდუსტრია შეიქმნას. ამდენი წელია იბრძვი ამისთვის და მენტალურად გვაქვს ტრანსფორმაცია?დღემდე ვხუმრობ, რომ ქართველისთვის "ველნესი" არის სუფთა ჰაერზე სიგარეტის მოწევა. პირველად, გაოცებულები იყვნენ, როგორ არ შეიძლება სიგარეტის მოწევაო. ახლა თუ ვინმე სიგარეტს მოწევს, ბოდიშს იხდის, არ ვიცოდიო. სერიოზული ტრანსფორმაცია. ფოთლების დაწვას რაც შეეხება, ეს პრობლემა რჩება. პრობლემა იცით კიდევ რაშია? - მენტალობაში. "მამაჩემი და წინაპრები წვავდნენ და არაფერი ემართებოდათ და მე რაღა უნდა დამემართოსო", - ეს არცოდნაა. წინაპრები საშუალოდ 40 წელი ცხოვრობდნენ, დღეს 80 წელია საშუალო სიცოცხლისუნარიანობა. მძიმე მეტალები ალერგიებს იწვევს, კიბოს ბიძგია. ადამიანო, წამლავ შენ თავს, შენ შვილებს და შენ გარშემო მეზობლებს. რა შეიცვალა იცი? ღამე იწყებენ წვას და ვერ ხედავ, ვინ გააკეთა. ადრე გარემოს დაცვაში რომ რეკავდი ამის გამო, უკვირდათ და ახლა უკვე გაგებით უყურებენ ამას. მაინც ხალხი მიჩვეულია ამას და ამბობენ რა ვქნათ, სად წავიღოთო? არადა ეს ცირკულარული ეკონომიკის ნაწილია, ამის კულტურა გვჭირდება. ცოტა გაბოროტებულიც არის ხალხი, რამე შენიშვნას რომ აძლევ, არ მოსწონთ. ჭკუის სწავლება საქართველოში არის, აი კოჟრზე ფეხი რომ დაადგა მაგის ტოლფასი, მაგრამ ხანდახან გვჭირდება ხოლმე.ცივილიზებული სამყაროს დონემდე რომ მივიდეთ, ჩვენზეა ყველაფერი დამოკიდებული. ასეთი მიწა-წყალი დაგვიტოვეს წინაპრებმა და მხოლოდ იმით ხომ არ უნდა ვიტრაბახოთ რა მაგრები იყვნენ ისინი, ჩვენც მაგრები უნდა გავხდეთ. რომ გვიყვარს ჩვენი ქვეყანა და სადღეგრძელოებს ყანწებით ვამბობთ, მართლა ისეთი რამ უნდა გავაკეთოთ, რომ ჩვენი საქართველო გავხადოთ "ლაქშერი" და ბუტიკური. პატარა ქვეყანაა და ძალიან ლამაზი. კურორტული ზონები პატარა საქართველოში იმდენია, რაც დიდ ევროპაში, ამის არგამოყენება დანაშაულია. ნელ-ნელა, რომ ვაკეთოთ ხარისხიანი რაღაც, მონაკო და დუბაი სხვანაირად კი არ გამდიდრებულა? ერთი და იგივე რაღაცაში, იქ უცხოელი რომ ჩადის 50-ჯერ ძვირს იხდის, ვიდრე აქ რომ ჩამოვა, ჩვენ რით ვართ ნაკლები? სვლა გავაკეთოთ, შესაძლებლობა გვაქვს, ნიჭიერი ერი ვართ.როგორც ქვეყანა უნდა გავძვირდეთ?აუცილებლად, სხვა გზა არ გვაქვს. მესამე ხარისხოვანი ქვეყანა ვიქნებით სულ თუ არ გავძვირდით. მდიდარი ადამიანი რატომ უნდა ჩამოვიდეს მაინცდამაინც საქართველოში? წავა შვეიცარიაში, საფრანგეთში, შატოებიც არის, შალებიც და ყველაფერიც. რა დაკარგა საქართველოში? ჩვენ უნდა შევქმნათ ის ხარისხი, რომ იმას მოუნდეს აქ ჩამოსვლა და იმ დიდი ფულის დატოვება.ერთ რამეს დავამატებ. ჩვენთან მინდოდა, რომ დაბალბიუჯეტიან ადამიანსაც შესძლებოდა შემოსვლა და სეირნობა, მაგრამ რაღაც მომენტში რიგები რომ დადგა, დანებით დაუწყეს ლაპარაკი დაცვას. დამსვენებელი ამბობდა, ამდენი ხმაური და ბავშვების წივილ-კივილი რანაირი " „ველნესიაო", თან მაინც ეწეოდა ვიღაცა თამბაქოს, კი დავდევთ, მაგრამ მაინც. ვარეგულირებდით, მაგრამ რომ მოგვაწყდა ხალხი, ჩვენც ავწიეთ ფასი, მე როგორც გულუბრყვილო და სოციალურის ქსელების მოყვარული ადამიანი, თან ტრაბახიც მიყვარს, დავწერე და ბოდიში მოვიხადე, რომ დეპოზიტი ავწიე 100 ლარამდე. მანამდე 50 ლარი იყო, რომელსაც ხარჯავდი რესტორანში. კინაღამ გადამიარეს, მაგრამ ჩვენ თუ არ ავუხსენით ეკონომიკის რეალობა, ამ ხალხს ვინ აუხსნის?! მწერენ, რომ ტურისტებისთვის და მდიდარი ქართველებისთვის ვაკეთებ ამას, ამ ხნის განმავლობაში 51 მილიონი დოლარი მაქვს ჩადებული და მოგება ერთი თეთრიც არ მიმიღია, მაგრამ რამდენიმე მილიონი ლარი უკვე გადახდილი მაქვს სახელმწიფო ბიუჯეტში და ის ადამიანი, რომელიც ამას მეუბნება, მე რა სარგებელი მაქვსო, ვერ ხვდება, რომ ამან მას, ვინც პენსიონერია, მის ქვეყანას, უკვე შემოუტანა ეს თანხა. ასევე, საზღვარგარეთიდან შემოსული თანხა აძლიერებს ეკონომიკას, სხვანაირად როგორ გამდიდრება ქვეყანა? რესურსები არ გვაქვს, ჩვენი რესურსია ჩვენი ბუნება და ჩვენი ხალხი.მე მგონია, რომ ყველაფრის თავი და თავი არის განათლება, სამეწარმეო განათლების დეფიციტი ქვეყანაში...მე ვიტყოდი, კატასტროფული დეფიციტი და ტაშს გიკრავ იმისთვის, რასაც შენ აკეთებ, მაგარ საქმეს აკეთებ! ხალხნო, ბიზნესი ნუ გერევათ თაღლითობაში. ტოლობის ნიშანი მათ შორის არ შეიძლება. ეს მოდის საბჭოთა მენტალობიდან, ეს ერთი, ყველა იპარავდა და მეორე ისეთი სტრუქტურები, რომლებიც მართლა ეკონომიკის ჯარისკაცია, ბევრი გინახავს? ბევრი ფულს "ჩალიჩით" შოულობს, უბრალოდ ადამიანი ხედავს და ამბობს, რომ ამასაც ფული აქვს და ამასაც ფული აქვს და რა სხვაობაა ვერ ხვდება. თაღლითებიც ბევრია სამწუხაროდ, და ეს რომ გვერევა ერთმანეთში, თაღლითი და ეკონომიკის ჯარისკაცი, კონკურენტუნარიანი ვერ ვიქნებით. იმიტომ, რომ ეკონომიკის სიძლიერეს ერის ერთობა სჭირდება.მაინტერესებს ქვეყნის სტრატეგია, რამდენად კარგად ხდება "ველნესის" მიმართულებით საერთაშორისო პრომოუშენი?გულახდილად რომ გითხრა, იცი როგორ მდგომარეობაში ვართ? ურემი რომ მიდის ისეთ გზაზე, რომ აყანყალებს. იმიტომ ვარ "ველნესით" დაკავებული, რომ ამაში ვხედავ საქართველოს ყველაზე დიდ პოტენციალს. ბუნება, კლიმატური ზონები. მკურნალი ერი ვართ. სოფელს ვერ ნახავ, სადაც მკურნალი არ იყოს, მედეა, ლეგენდები, ამის გამოყენებაა საჭირო. ჩვენ თუ გავაიაფეთ აქაურობა, ვერასოდეს ვერ ამოვალთ სიღარიბიდან. უნდა ვეცადოთ ავიმაღლოთ ინტელექტი. "ველნესში" მედიცინაც არის, ბუნებაც, ეკოლოგიაც, კვებაც, მაგრამ 99%-ს რომ ჰკითხო, ვერ აგიხსნის რა არის " ველნესი". თუ არ ვიცით რა არის, როგორ უნდა იყოს ეს ჩვენი ღერძი?! ცნობიერება ძალიან დაბალ დონეზეა.მინდა ადამიანური რესურსის ნაწილზე გადავიდე. ვიცით, რა დიდი გამოწვევაა სექტორულად პროფესიონალი კადრების პოვნა. რამდენად დიდი გამოწვევაა შენთვის, იპოვო ადამიანები, რომლებიც შენ ტალღაზე თუ ვერა, მიახლოებულად მაინც იქნება?ეგ გამორიცხულია, მაგრამ ადამიანი რომ იპოვო და გადმოიყვანო შენ ტალღაზე, უადვილესია. ჩვენი კომპანიის ხელმძღვანელი მუშაობდა ეკონომიკაში, აქ რომ გადმოვიდა, ამბობდა, ვკითხულობდი არ ვიცოდი სიტყვა " ველნესი" რა იყოვო, დღეს საქართველოში მაგაზე მაგარი ექსპერტს ვერ ნახავთ ამ სფეროში. პლუსი და მინუსიც ის გვაქვს, რომ ყველაფერში ნიჭიერი ვართ, კარგშიც და ცუდშიც. კარგად რომ ჩავინერგავთ თავებში და ამაში გავძლიერდებით, ეს ყველაზე მაგარი იქნება. გული მწყდება, ჩვენი საქართველო რატომ არის ასეთ დაბალ ინტელექტუალურ დონეზე.მითხარი სამომავლო გეგმების შესახებ...გეგმები გვაქვს, რა თქმა უნდა. გასართობ ზონას ვაკეთებთ, იმიტომ, რომ ეს აქაურობას აკლია, სპორტულ სივრცეს ვაკეთებთ, კინო-თეატრის მშენებლობა დავიწყეთ თავისი წყლებით და ყველაფრით. რაც მთავარია, მომავალ წელს დიდ აუზს თავისი დიდი „ველნესით“, მოძრავი სახურავებით დაგხვდებათ. თუ ვაკეთებ ძალიან მაგარი უნდა გავაკეთო, ვაგროვებ თანხებს და მერე "დავცხებ" ხოლმე, უკვე 20 წელია, რაც "ბიოლი" დაწყებული მაქვს.BPN.GE

მსოფლიოში გასართობი მედია პლატფორმები ყველაზე მეტად ნახვადია და ის ახალ ვარსკვლავებსაც იზიდავს. კონტენტის შემქმნელები კი წელიწადში მილიონობით დოლარს გამოიმუშავებენ.„კონტენტ კრეატორებისთვის კერძო დაფინანსება უფრო ძლიერია, ვიდრე ოდესმე“, - ამბობს ერიკ შერიდანი, Goldman Sachs-ის ტექნოლოგიური კვლევის თანახელმძღვანელი.ინვესტიცია შედეგს იძლევა. forbes -მა Instagram-ზე, TikTok-სა და YouTube-ზე 50 უმდიდრესი კონტენტ-შემქმნელი გამოავლინა, რომლებმაც ჯამურად დაახლოებით 853 მილიონი დოლარი გამოიმუშავეს, რაც 18%-ით მეტია 2024 წელთან შედარებით.ზრდას აგრძელებს მათი აუდიტორიაც. 2025 წელს 50 საუკეთესო კრეატორს ჯამში 3.4 მილიარდი გამომწერი ჰყავდა, რაც გასულ წელთან შედარებით 24%-ით მეტია. და ეს ხდება მაღალკონკურენტულ გარემოში.Goldman Sachs-ი ვარაუდობს, რომ ამჟამად მსოფლიოში 67 მილიონი კონტენტ შემქმნელია და მათი რიცხვი 2030 წლისთვის დაახლოებით 107 მილიონამდე გაიზრდება.წარმოგიდგენთ 10 ყველაზე მაღალი შემოსავლის მქონე კრეატორს forbes-ის მიხედვით.1. MrBeastშემოსავალი: 85 მილიონი დოლარიგამომწერთა საერთო რაოდენობა: 634 მილიონიYouTuber-ი, ცნობილია თავისი ტრიუკებითა და გამოწვევებით. MrBeast ის იმპერია აგრძელებს გაფართოებას ციფრული პლატფორმების მიღმაც: ის აწარმოებს Feastables-ის ტკბილეულს, ფლობს MrBeast Burger-ის სწრაფი კვების ქსელს და ახლა უკვე სტრიმინგ სერვისს: მისი პოპულარული შოუ Beast Games ორი სეზონით განახლდა Amazon Prime-ზე.2. Dhar Mannშემოსავალი: 56 მილიონი დოლარიგამომწერთა საერთო რაოდენობა: 137 მილიონიYouTube შოუების პროდიუსერმა შექმნა სრულფასოვანი ჰოლივუდური სტუდია და ასობით ადამიანისგან შემდგარი გუნდი თანამედროვე სკოლის სპეციალური გადაცემების შესაქმნელად, რომლებმაც მილიარდობით ნახვა დააგროვეს.ის ყოველწლიურად საკმაოდ სოლიდურ თანხას გამოიმუშავებს YouTube AdSense-ის წყალობით.3. Jake Paulშემოსავალი: 50 მილიონი დოლარიგამომწერთა საერთო რაოდენობა: 79 მილიონიჯეიკ პოლის ბრძოლამ მაიკ ტაისონთან ნოემბერში დიდი აჟიოტაჟი გამოიწვია და პოლს დიდძალი ანაზღაურება მოუტანა. Netflix-მა პირველად უმასპინძლა ღონისძიების პირდაპირ ეთერში.4. Rhett & Linkშემოსავალი: 36 მილიონი დოლარიგამომწერთა საერთო რაოდენობა: 33.8 მილიონიონლაინ შოუს წამყვანები აგრძელებენ თავიანთი კომედიური იმპერიის გაფართოებას. მათ Roku-ზე, Amazon Prime-სა და Samsung-ზე სტრიმინგ არხები გაუშვეს, პირდაპირი ეთერის ღონისძიებების ბიზნესი შექმნეს და ბესტსელერი კულინარიული წიგნიც კი გამოსცეს სათაურით - „მითიური კულინარიული წიგნი“.5. Alex Cooperმოგება: 32 მილიონი დოლარიგამომწერების საერთო რაოდენობა: 15 მილიონიპოდკასტების ვარსკვლავი ალექსანდრა კუპერი ნამდვილი გარიგებების შემქმნელია. Spotify-თან სამწლიანი, 60 მილიონ დოლარიანი პარტნიორობის შემდეგ, მან ურთიერთობების შოუ - Call Her Daddy, რადიო გიგანტ Sirius XM-ში გადაიტანა და 125 მილიონ დოლარიანი კონტრაქტი გააფორმა.ეს ყველაფერი არ არის: Call Her Daddy-ს გარდა, მისი პოდკასტების ქსელი შვიდ შოუმდე გაიზარდა. მის ცხოვრებაზე გადაღებული დოკუმენტური ფილმი ივნისში გამოვიდა.6. Charli D’Amelioშემოსავალი: 23.5 მილიონი დოლარიგამომწერების საერთო რაოდენობა: 216 მილიონი2024 წლის ოქტომბერში ჩარლი დ’ამელიომ შეუძლებელი შეძლო: მან ბროდვეიზე დებიუტი შეასრულა. მოცეკვავე-TikToker-ად ქცეულმა მოწაფემ თავისი დიდი ხნის ნანატრი ოცნება მიუზიკლში „& Juliet“ აიხდინა.თითქმის 200 მილიონი TikTok-ის მიმდევრით, ის პარტნიორობას ინარჩუნებს მოდის ბრენდებთან, როგორიცაა Prada და Kate Spade და ფლობს წილს ოჯახის დივერსიფიცირებულ ბიზნესში D’Amelio Brands.7. Matt Rifeშემოსავალი: 50 მილიონი დოლარიგამომწერების საერთო რაოდენობა: 42 მილიონიMatt Rife წლების განმავლობაში შრომობდა კომედიურ სცენაზე, სანამ შემთხვევით, 2021 წელს, სოციალურ მედიაში თავისი უკვე ცნობილი სტენდაპ რუტინების გაზიარება არ დაიწყო. მისი გულშემატკივრების ბაზა მკვეთრად გაიზარდა.დღეს მას 40 მილიონი გულშემატკივარი ჰყავს და ქონებას 100 000-ზე მეტი კონცერტის ბილეთების გაყიდვით შოულობს. ის ასევე მონაწილეობდა Netflix-ის ორ კომედიურ სპეციალურ გადაცემაში და მალე რამდენიმე კომედიურ ფილმსაც გამოუშვებს.8. Mark Roberშემოსავალი: 25 მილიონი დოლარიგამომწერთა საერთო რაოდენობა: 80 მილიონიNASA-ს ყოფილ თანამშრომელს მარკ რობერს ამჟამად თითქმის 69 მილიონი გულშემატკივარი ჰყავს თავისი სამეცნიერო კონტენტის წყალობით.მის ვიდეოებში შედის თვითმართვადი მანქანის მოტყუების მცდელობები (ამ პოსტმა 23 მილიონი ნახვა დააგროვა) და ლაზერის სიმძლავრის ელვისებურ დარტყმასთან შედარება (41 მილიონი ნახვა). ის ასევე ექსპერიმენტებს ატარებს სოციალური მედიის მიღმა. მას აქვს საგანმანათლებლო პროდუქტების კომპანია CrunchLabs.9. Druskiშემოსავალი: 14 მილიონი დოლარიგამომწერების საერთო რაოდენობა: 25 მილიონიჰიპ-ჰოპ სატირიკოსს სოციალურ მედიაში გულშემატკივრების ჩართულობის ერთ-ერთი ყველაზე მაღალი მაჩვენებელი აქვს. ბრენდებიც მისი დიდი გულშემატკივრები არიან.2025 წელს Druski-მ სუპერბოულის დროს Dunkin' Donuts-ის რეკლამაში მიიღო მონაწილეობა. მისი პარტნიორები არიან Google, Nike და PrizePicks.10. Khaby Lameშემოსავალი: 20 მილიონი დოლარიგამომწერების საერთო რაოდენობა: 258.5 მილიონიმემების არტისტი TikTok-ზე ყველაზე პოპულარულ ადამიანად რჩება 162.2 მილიონი გამომწერით. ცნობილი თავისი პაროდიებითა და ვირუსული ტენდენციებით, ეს იტალიელი ინფლუენსერი მილიონებს შოულობს ისეთი ბრენდების რეკლამირებით, როგორიცაა Hugo Boss, კრიპტოვალუტის ბირჟა Binance და მრავალი ჰოლივუდური სტუდია.forbes.com