აშშ-ში FDA-მ დაარეგისტრირა პრეპარატი, რომელიც სწორი ნაწლავის კიბოს კურნავს - GSK

ჯანდაცვა 1735206882
GSK

ამერიკის შეერთებული შტატების სურსათისა და მედიკამენტების მარეგულირებელმა სააგენტომ (FDA) ახალი პრეპარატი, Jemperli (dostarlimab) დაარეგისტრირა, რომელიც, კვლევის თანახმად, 100%-ით კურნავს სწორი ნაწლავის კიბოს კონკრეტულ ტიპს - ამის შესახებ ინფორმაციას ფარმაცევტული კომპანია GSK ავრცელებს.

პრეპარატს FDA-მ “Breakthrough Therapy Designation” მიანიჭა, რაც დამტკიცებასა და ლიცენზირებას არ ნიშნავს, თუმცა რეგისტრაცია მიზნად ისახავს მედიკამენტის განვითარებას, კლინიკური კვლევების ჩატარების შესაძლებლობასა და ეფექტის არსებით გაუმჯობესებას.

როგორც კომპანიაში აღნიშნავენ, Jemperli FDA-მ სამედიცინო კვლევის შედეგებზე დაყრდნობით დაამტკიცა. კვლევაში მონაწილე 42-ვე პაციენტმა, რომლებმაც მკურნალობის სრული კურსი ჩაიტარეს, უპრეცედენტო, 100%-იანი შედეგი დააფიქსირეს: მაგნიტურ-რეზონანსული ტომოგრაფიის, ენდოსკოპიის, PET სკანირებისა და ციფრული გამოკვლევების შედეგებში სიმსივნური უჯრედები აღმოჩენილი არ არის.

როგორც GSK-ის ვიცე-პრეზიდენტი აღნიშნავს, სწორი ნაწლავის კიბოს მკურნალობის ამჟამინდელი მეთოდები, ქიმიოთერაპიასა და რადიაციას, შემდეგ კი ქირურგიულ ჩარევას ითვალისწინებს, რასაც პაციენტთა ცხოვრების ხარისხზე ხანგრძლივი ნეგატიური გავლენის მოხდენა შეუძლია. ჰეშამ აბდულა აცხადებს, რომ მედიკამენტის დამტკიცება საშუალებას იძლევა, dMMR/MSI-H ტიპის ნაწლავის კიბოს მკურნალობის ეს ფორმები უფრო მარტივი გზით შეიცვალოს.

Jemperli-ს, როგორც სწორი ნაწლავის კიბოს სამკურნალო მედიკამენტის გაყიდვა მსოფლიოს მასშტაბით ჯერჯერობით აკრძალულია. კომპანია პრეპარატზე მუშაობას აგრძელებს.