1722058676
ყაზახეთი ნავთობის გადაზიდვის ალტერნატიულ გზებზე ალაპარაკდა
![bjt bjt](https://m2b.ge/uploads/files/2023/08/22/1328/bjt_w_h.jpeg)
შავ ზღვის პორტებში განვითარებულმა მოვლენებმა კითხვის ნიშნები გააჩინა არაერთი საერთაშორისო მარშრუტის ირგვლივ. მათ შორისაა ყაზახური ნავთობის ექსპორტის საკითხიც. ამ დღეებში, „ყაზტრანსოილის“ გენერალური დირექტორის მოადგილემ Reuters-ს განუცხადა, რომ, თუკი შავ ზღვაში ვითარება კიდევ უფრო დაიძაბება, შესაძლოა, ყაზახეთმა ნავთობის ექსპორტისთვის, ნოვოროსიისკის პორტი, სანქტ-პეტერბურგის ოლქში მდებარე პორტ უსტ-ლუგათი ჩაანაცვლოს.
ერიკ საგიევის ეს განცხადება ეხმიანება ორი უპილოტო ობიექტის შეტევას ნოვოროსიისკის პორტზე, რასაც გემების გადაადგილების დროებითი აკრძალვა მოჰყვა. გაზაფხულზე იყო საუბარი იმის შესახებ, რომ „ყაზმორტრანსფლოტი“ - ყაზახეთის ეროვნული საზღვაო გადამზიდავი, ნავთობის ექსპორტის გაორმაგებას და მის ტრანსპორტირებას აზერბაიჯანის გავლით, კასპიის ფლოტით გეგმავდა.
ამ დროისთვის ყაზახური ნავთობის ტრანსპორტირება, კასპიის ზღვის გავლით, ბაქო-თბილისი-ჯეიჰანის მილსადენითაც ხდება. ამ მარშრუტით ტონა ნავთობის გადაზიდვისთვის ყაზახეთი 100 დოლარს იხდის, განსხვავებით რუსული მიმართულებისგან, რომელიც მხოლოდ 38,4 დოლარი უჯდება. შესაბამისად, ნავთობის ექსპორტის 70% ყაზახეთს სწორედ რუსული მარშრუტით გადააქვს. გამოიყენება ორი მიმართულება - კასპიის კონსორციუმის მილსადენი, რომელიც ნოვოროსიისკის პორტამდე მიდის და ატირაუ-სამარას მილსადენი, რომელიც პორტ უსტ-ლუგაში ხვდება.
ყაზახური ნავთობის ძირითადი წილი ნოვოროსიისკით გადის - გასული წლის მონაცემებით, ეს 52,2 მლნ ტონა ნავთობია, 8,4 მლნ ტონა გაიტანა ყაზახეთმა შარშან პორტ უსტ-ლუგას გავლით. დატვირთავს თუ არა მთლიანად მეორე რუსულ მარშრუტს ყაზახეთი, თუკი შავ ზღვაზე პრობლემები გაგრძელდება თუ ნავთობის ნაწილს ბაქო-თბილისი-ჯეიჰანის მილსადენითაც გაატარებს, ჯერჯერობით უცნობია.