2025 წლის იანვარ-ოქტომბერში, გასული წლის იმავე პერიოდთან შედარებით, საქართველოში გაყინული ქათმის ნაწილებისა და სუბპროდუქტების იმპორტი 20%-ით გაიზარდა.უფრო კონკრეტულად, სტატისტიკის ეროვნული სამსახურის მონაცემებით, 2025 წლის საანგარიშო პერიოდში 88.159 მლნ დოლარის ღირებულების 60 387 ტონა გაყინული ქათმის ნაწილებისა და სუბპროდუქტების იმპორტი განხორციელდა, 2024 წლის იანვარ-ოქტომბერში კი 73.275 მლნ დოლარის ღირებულების 49 651 ტონა ქათმის ნაწილები შემოვიდა.აღსანიშნავია, რომ 2025 წლის პირველ ათ თვეში საქართველოში ქათმის ნაწილებისა და სუბპროდუქტების იმპორტში 39%-იანი წილით ჩინეთი ლიდერობდა. კერძოდ, საანგარიშო პერიოდში აღნიშნული ბაზრიდან საქართველომ 34.446 მლნ დოლარის ღირებულების 20 225 ტონა ქათმის ნაწილები შეიძინა.„ბიზნესპრესნიუსი“ დაინტერესდა იმ კომპანიებით, რომლებსაც საქართველოში ჩინეთიდან შინაური ქათმის ნაკლავის გაყინული ნაწილები და სუბპროდუქტები შემოაქვს.საქსტატის მიერ „ბიზნესპრესნიუსისთვის“ მოწოდებული ინფორმაციის თანახმად, 2025 წლის იანვარ-ოქტომბერში საქართველოში აღნიშნული პროდუქცია ყველაზე მეტი ღირებულების შემდეგმა კომპანიებმა შემოიტანეს: შპს „ვესტ ინვესტ“, შპს „იზი“, შპს „კაკსო 2015“, შპს „ფუდსერვისი“ და შპს „ჯეო დისტრიბუშენ გრუპი“.სამეწარმეო რეესტრში არსებული ბოლო მონაცემების თანახმად, „ბიზნესპრესნიუსი“ გთავაზობთ, ვის ეკუთვნის აღნიშნული კომპანიები: „ვესტ ინვესტი“ 2006 წლიდან ოპერირებს ბაზარზე. კომპანიის მფლობელი ცისბედი ქართველიშვილია, დირექტორის პოსტს კი ირაკლი ჩაჩავა იკავებს. „იზი“ სამეწარმეო რეესტრში 2012 წელს არის რეგისტრირებული. წილებს სრულად იაგორი გერაძე ფლობს, დირექტორი კი ირაკლი გერაძეა. 2015 წლიდან ოპერირებს ბაზარზე „კასკო 2015“. კომპანიაში წილების 70%-ს ლევან კაჭარავა ფლობს, დარჩენილი 30% კი ლევან ჭიორელის საკუთრებაშია. კომპანიაში დირექტორის თანამდებობას მამუკა მინდიაშვილი იკავებს. „ფუდსერვისი“ 2018 წელს დარეგისტრირდა სამეწარმეო რეესტრში. კომპანიის მფლობელი არის შპს „ჰოლდინგ. ჯი“. თავის მხრივ „ჰოლდინგ. ჯის“ 100%-იან წილებს არჩილ გეგენავა ფლობს. 2012 წელს დარეგისტრირდა რეესტრში „ჯეო დისტრიბუშენ გრუპი“, რომლის დირექტორიც ლევან წიკლაურია. წიკლაური ფლობს კომპანიის 60%-იან წილსაც, წილების 40%-ის მფლობელი კი ნოდარ ჯაფარიძეა. შენიშვნა: იმპორტიორები არ არის დალაგებული რეიტინგის მიხედვით.

„ადამიანმა არ იცის, რისგან გაკეთებულ საჭმელს მიირთმევს ამა თუ იმ საცხობსა თუ კვების ობიექტში. იგივე სიტუაციაა რესტორნებში, რადგან რესტორნების 90% არარეგისტრირებული საწარმოებიდან, ბაზრებიდან ყიდულობენ გაურკვეველი მიკვლევადობის პროდუქციას. ვერ მიაკვლევთ, ვერ გაიგებთ, რისგან შედგება. კარგა ხანი ამის მიზეზი დაუსჯელობის სინდრომიც იყო“, - აცხადებს საქართველოს მერძევეთა ასოციაციის თავმჯდომარე ნიკოლოზ ბენიაიძე რადიო „კომერსანტის“ ეთერში საუბრისას.ნიკოლოზ ბენიაიძის განმარტებით, მომხმარებელს აქვს სრული უფლება, იცოდეს, რას მიირთმევს, რისგან შედგება ესა თუ ის პროდუქტი. შესაბამისად, მომხმარებელს შეუძლია, იმავე რესტორანსა თუ საცხობში მოითხოვოს, აქვს თუ არა ეტიკეტი ყველს.„მომხმარებელს მინდა, მივმართო, რომ ინფორმაციის მიღების სრული უფლება აქვთ, თუმცა, იმასაც ვეტყვი, რომ შემთხვევათა 90%-ში ისინი ეტიკეტს ვერ მიიღებენ, თუ უნდათ, ჩაატარონ ცდა და თავადვე დარწმუნდებიან. იშვიათ რესტორნებში წააწყდებით ეტიკეტს, რადგან ნამდვილი ყველი ძალიან ცოტაა“, - ამბობს ნიკოლოზ ბენიაიძე.მერძევეთა ასოციაციის თავმჯდომარის ინფორმაციით, ყველისა და ხაჭოს იმპორტი 27%-ით არის გაზრდილი და წლის ბოლომდე უკვე 100 მილიონს მიაღწევს.„ცუდი ის არის, რომ კლებადია ადგილობრივ ბაზარზე როგორც რძე, აგრეთვე, პირუტყვი. საქართველოში ნედლი რძის 65%-იანი დეფიციტი გვაქვს, რასაც შემოსული მზა პროდუქტები და ფხვნილი ანაცვლებს. როგორ წარმოგიდგენიათ, არაჟანი შემოვიდა სხვა ქვეყნიდან და ის ჯანსაღი იქნება? ნედლი რძისგან დამზადებული პროდუქტების გარეშე ჯანსაღი კვება არ არსებობს. მზა პროდუქტი, რომელიც შემოდის და ეს მომხმარებელმა უნდა იცოდეს, კონსერვანტებით არის გაჯერებული“, - განაცხადა ნიკოლოზ ბენიაიძემ რადიო „კომერსანტის“ ეთერში.

საქართველოს ბანკი ბიზნესების მხარდაჭერას აგრძელებს. ამჯერად, ბანკის პარტნიორმა კომპანია “ველი ნატახტარმა”, მცხეთის მუნიციპალიტეტ, სოფელ ნატახტარში, ახალი ქართული ლუდის “რკონის” საწარმო ააშენა. პროექტი საქართველოში ლუდის წარმოების ახალი კულტურის დამკვიდრებას და რეგიონში თანამედროვე სტანდარტების საწარმოს შექმნას ისახავს მიზნად. პროექტის ჯამური ღირებულება 7 მლნ ლარს შეადგენს. საქართველოს ბანკის მიერ განხორციელებული ინვესტიცია კი 5.4 მლნ.ლარია. აღნიშნული ინვესტიცია საწარმოს ინფრასტრუქტურის მშენებლობასა და მისი დანადგარებით აღჭურვას მოხმარდა. ახალი საწარმო მცხეთის მუნიციპალიტეტში, 4,500 კვ.მ -ზე აშენდა და ის აღჭურვილია საერთაშორისო სტანდარტების შესაბამისი თანამედროვე ევროპული ტექნოლოგიებით. პროექტი გერმანელი ტექნოლოგების ჩართულობითა და კონსულტაციით განხორციელდა, რაც  ქართულ ბაზარზე საუკეთესო პრაქტიკებისა და ინოვაციური გადაწყვეტილებების დანერგვას გულისხმობს. ამჟამად კომპანია ერთი სახეობის - ბავარიული ჰელესის ტიპის ლუდს აწარმოებს, თუმცა სამომავლოდ ახალი სახეობების დამატებას გეგმავს. კომპანია „ველი ნატახტარი“ „ბიარ ჯორჯიას“ შვილობილი კომპანიაა. ის უკვე ორი ათწლეულია წარმატებით საქმიანობს ქართულ ბაზარზე და მომხმარებლებს ევროპული ხარისხის ლუდის მრავალფეროვან არჩევანს სთავაზობს. 20 წლის განმავლობაში დაგროვებული გამოცდილებისა და ცოდნის საფუძველზე გადავწყვიტეთ ახალი ეტაპის დაწყება - შევქმნათ ქართული ლუდის ახალი ისტორია ბრენდ „რკონით“. ჩვენი მიზანია ლუდის მოყვარულებისთვის უმაღლესი ხარისხის, გამორჩეული გემოს მქონე ლუდის წარმოება და ამ სტანდარტის მუდმივი შენარჩუნება. გვინდა, რომ „რკონი“ იქცეს არა მხოლოდ ლუდის მოყვარულთა საყვარელ ბრენდად, არამედ, გამორჩეულად ქართულ ბრენდად. საქართველოს ბანკთან ჩვენი თანამშრომლობა 2023 წელს დაიწყო და ეს გახლავთ ჩვენი პირველი ერთობლივი პროექტი, რომელიც ნათელი მაგალითია იმისა, თუ როგორ შეიძლება ბიზნესმა და ფინანსურმა ინსტიტუტმა ერთად განახორციელოს ქვეყნის ეკონომიკისთვის მნიშვნელოვანი და სტრატეგიული ინიციატივა. ამჯერად, საწარმოს თვიური წარმადობა 100 ტონას შეადგენს, ჩვენი მიზანია ეტაპობრივად გავზარდოთ მოცულობა, გავძლიერდეთ როგორც ადგილობრივად, ასევე ავითვისოთ საერთაშორისო ბაზრები“, - განაცხადა დავით კურდღელაშვილმა, „ველი ნატახტარის“ დირექტორმა.

აშშ დოლარის ოფიციალური ღირებულება 2.7062 ლარი გახდა.ეროვნული ბანკის მიერ გამოქვეყნებული მონაცემების თანახმად, დღევანდელი ვაჭრობის შედეგად 1 აშშ დოლარის ღირებულება 2.7062 ლარი გახდა. კურსი, რომელიც დღეს მოქმედებდა, 2.7067 ლარი იყო. შესაბამისად, დოლარის ცვლილებამ ეროვნულ ვალუტასთან მიმართებაში 0.0005 ლარი შეადგინა.რაც შეეხება ევროს, მისი კურსი 3.1173 ლარია. მაშინ, როცა დღეს მოქმედი კურსი 3.1203 ლარს შეადგენდა. შესაბამისად, ევროს ცვლილებამ 0.0030 ლარი შეადგინა.

საქართველოს ბანკმა, როგორც ფინანსური სექტორის ინოვატორმა, ახალი მომსახურება – SOLO Business – წარადგინა. SOLO Business საქართველოს ბანკის პრემიუმ კლასის მომსახურებაა, რომელიც სპეციალურად, საშუალო ზომის ბიზნესებისთვის შეიქმნა. იგი აერთიანებს როგორც საბანკო, ისე არასაბანკო სერვისებს, რაც ბიზნესის მარტივ და ოპტიმალურ მართვას უწყობს ხელს.SOLO Business-ის ძირითადი კომპონენტებია: SOLO Business Lounge – ერთ სივრცეში სრულფასოვან საბანკო მომსახურებას როგორც ბიზნესის, ასევე პირადი ფინანსების მართვისთვის. პერსონალური ბიზნესბანკირი – ფინანსური ექსპერტი, რომელიც ბიზნესს კონკრეტული სპეციფიკისა და საჭიროებების მიხედვით სწრაფი გადაწყვეტილებების მიღებაში დაეხმარება. ბიზნესკონსიერჟი – ასისტენტი, რომელიც ბიზნესის ადმინისტრაციულ და საორგანიზაციო პროცესებს მართავს, მათ შორისაა ღონისძიებების, მივლინებების დაგეგმვა, დოკუმენტაციის თარგმნა და ბიზნესღონისძიებების მართვა. SOLO Business Lifestyle – აქ ერთიანდება ექსკლუზიური ბიზნესშეხვედრები, პარტნიორული შეთავაზებები და სხვა უპირატესობები, რომლებიც ბიზნესის ახალ საფეხურზე გადაყვანას უწყობს ხელს. Galt & Taggart-ის კვლევები და ანალიტიკა –  წვდომა სექტორულ კვლევებზე, ანალიტიკასა და ბაზრის შეფასებებზე, რაც ბიზნესს ინფორმირებული გადაწყვეტილებების მიღებაში დახმარებას უწევს. საწყის ეტაპზე, მომსახურება ბათუმში, უახლესი დიზაინის და კონცეფციის SOLO ლაუნჯშია ხელმისაწვდომი, რომელიც პ. მელიქიშვილის 5/7 და რუსთაველის 43-ის კვეთაზე მდებარობს. ახალ ლაუნჯზე SOLO-ს გუნდმა იტალიურ სააგენტო DINN!-თან ერთად იმუშავა.“SOLO Business-ის შექმნა გარდამტეხი ეტაპია საქართველოში ბიზნეს მომსახურების სტანდარტების ამაღლების თვალსაზრისით. ამ სიახლით, ჩვენ ვაერთიანებთ მაღალი დონის საბანკო პროდუქტებს, პერსონალურ საბანკო მომსახურებას, ბიზნეს ასისტენტის მხარდაჭერას, ექსკლუზიურ შეთავაზებებს და სხვა არაერთ უპირატესობას. ჩვენ კარგად გვესმის, რომ ბიზნესში წარმატებისთვის საჭიროა დროული რეაგირება, ინფორმაციაზე წვდომა და სანდო პარტნიორის ყოლა, რომელიც ყოველდღიურ გამოწვევებს ეფექტიანი ინსტრუმენტებით უპასუხებს. სწორედ ამიტომ შევქმენით SOLO Business, რათა ბიზნესს მივცეთ თავისუფლება, ფოკუსირდნენ ზრდასა და ახალი შესაძლებლობების ათვისებაზე, ჩვენ კი მხარი დავუჭიროთ ფინანსური, ადმინისტრაციული თუ სტრატეგიული პროცესების მართვაში” - აცხადებს თორნიკე კუპრაშვილი, საქართველოს ბანკის მცირე და საშუალო ბიზნესის მიმართულების ხელმძღვანელი.გაიგეთ მეტი SOLO Business-ის ახალი ვებგვერდიდან. 

საქართველოს ბანკი, როგორც განათლების მთავარი მხარდამჭერი ბანკი, მოსწავლეებისთვის შემეცნებისა და განვითარების შესაძლებლობების შექმნას განაგრძობს.სწორედ ამ მიზნით, ინტელექტუალური ჩემპიონატის - “ინტელექტიადას” მხარდამჭერია. პროექტი ნოვატორთა აუდიტორიის ორგანიზებით ქუთაისში იმართება.წელს, შემოდგომის სეზონის ფარგლებში, ჩემპიონატში მონაწილეობა იმერეთის საჯარო და კერძო სკოლის III-XII კლასის 700-ზე მეტმა მოსწავლემ მიიღო.მონაწილეები ოთხი ასაკობრივი კატეგორიის მიხედვით გუნდებად დაიყვნენ და ორი დღის განმავლობაში ერთმანეთს ზოგადი განათლების კითხვებზე პასუხის გაცემაში ეჯიბრებოდნენ.ინტელექტუალური ჩემპიონატი „ინტელექტიადა“ წელიწადში ორჯერ იმართება და მიზნად ისახავს, ხელი შეუწყოს ახალგაზრდებში ინტელექტუალური თამაშების პოპულარიზაციას, გუნდური მუშაობის უნარების ჩამოყალიბებას, სხარტი და ანალიტიკური აზროვნების განვითარებას, ზოგადი განათლების ხელშეწყობას.ინფორმაციისთვის, საქართველოს ბანკის, როგორც განათლების მთავარი მხარდამჭერი ბანკის CSR მიმართულებისთვის უკვე 5 წელზე მეტია განათლება პრიორიტეტია. სწორედ ამიტომ, 40-ზე მეტ საგანმანათლებლო პროექტს ახორციელებს და უჭერს მხარს, რითაც 500 000-ზე მეტი მოსწავლისთვის, სტუდენტისა და ახალგაზრდა პროფესიონალისთვის ქმნის განათლების შესაძლებლობას. ბანკის CSR მიმართულების პორტფელი მოიცავს ისეთ საგანმანათლებლო პროექტებს, როგორებიც არის: საქართველოს ბანკის სტიპენდიები; გიორგი ჩახავას სახელობის სტიპენდია; დიდ ბრიტანეთში, აშშ-სა და გერმანიაში სწავლის სრული დაფინანსება; იდეათეკები - საქართველოს ბანკის ბიბლიოთეკების პროექტი; საქართველოს ბანკისა და კომაროვის ერთობლივი პროექტი - STEM სკოლა; საქართველოს ბანკის ოლიმპიადები მოსწავლეებისთვის: STEM ოლიმპიადა, ეკონომიკის ოლიმპიადა, Kings-ის ფინანსური განათლების ოლიმპიადა, ევერესტი. ამასთან, საჯარო მეტყველების კონკურსი, და სხვა.საქართველოს ბანკის მიერ განხორციელებული საგანმანათლებლო პროექტების შესახებ დეტალური ინფორმაციის მისაღებად ეწვიეთ ვებგვერდს ganatleba.bog.ge