ბოლო მაჩვენებლების მიხედვით ჩაის იმპორტი გაზრდილია. სტატისტიკური ინფორმაციის მიხედვით, 2025 წლის იანვარში საქართველომ 783.15 ათასი დოლარის ღირებულების 227.18 ჩაი იყიდა. 2024 წლის იანვარში კი 220.91 ტონა, შესაბამისად ზრდა 3%-ის დონეზეა.2025 წლის პირველი თვის მაჩვენებლებით, საქართველოში ჩაის ნომერ პირველი იმპორტიორი ქვეყანა თურქეთია, სწორედ მასზე მოდის იმპორტის 33%-ი. მეორე ადგილზე კი შრი-ლანკაა.TOP 5 ქვეყანა, საიდანაც საქართველომ ყველაზე დიდი რაოდენობით ჩაი იყიდა: თურქეთი - 76.07 ტონა, შრი-ლანკა - 39.55 ტონა, აზერბაიჯანი - 30.85 ტონა, რუსეთი - 27.61 ტონა, ირანი - 25.16 ტონა. არსებული სტატისტიკური მაჩვენებლებით, 2024 წელს საქართველომ 9,438.18 ათასი დოლარის ღირებულების 2,196.91 ტონა ჩაი იყიდა. 2024 წლის მაჩვენებლებით ჩაის იმპორტი 6%-ითაა შემცირებული. 2023 წელს საქართველომ 2,328.62 ტონა ჩაი იყიდა.

საქართველოს ეროვნული ნაკრები წლის პირველ მატჩებს სომხეთის წინააღმდეგ, ერთა ლიგის პლეი-ოფის ფარგლებში გამართავს.მოახლოებული მატჩებისთვის მზადებას ჩვენი გუნდი 17 მარტს დაიწყებს. შეკრებამდე დაწყებამდე, ტრადიციული პრესკონფერენციის ფარგლებში, მედიის კითხვებს ეროვნული ნაკრების მთავარმა მწვრთნელმა, ვილი სანიოლმა და სფფ-ის ვიცე-პრეზიდენტმა ალექსანდრე იაშვილმა უპასუხეს.პრესკონფერენცია საქართველოს ნაკრების მასპინძელ სასტუმრო პარაგრაფ თბილისში შედგა.ვილი სანიოლი (ეროვნული ნაკრების მთავარი მწვრთნელი): "სომხეთთან ორი რთული თამაში გველის, თუმცა დარწმუნებული ვარ, ფეხბურთელები მზად იქნებიან. B ლიგაში ადგილი უნდა შევინარჩუნოთ, რადგან მჯერა, რომ სწორედ აქ არის ჩვენი ადგილი. ასე რომ, კიდევ ერთხელ უნდა დავამტკიცოთ ეს. დარწმუნებული ვარ, ფეხბურთელები მოტივირებულები არიან ახალი სეზონის კარგად დასაწყებად. ბოლო ორი წელი ჩვენი ფეხბურთელებისთვის ძალიან დატვირთული იყო. ბევრი მატჩის ჩატარება მოუწიათ და გადაღლილები იყვნენ როგორც  ფიზიკურად, ისე მენტალურად, თუმცა ამისთვის მზად ვიყავით. ახლა, ზამთრის შესვენების შემდეგ, უკეთეს ფორმაში არიან და მარტში ბევრად უკეთეს თამაშს უნდა ველოდოთ, ვიდრე ნოემბერში გვქონდა. გურამ კაშია და ხვიჩა კვარაცხელია პირველ მატჩში ვერ დაგვეხმარებიან, თუმცა ჩვენთან ერთად იქნებიან და მეორე თამაშისთვის მოემზადებიან. გამოგვაკლდება გუნდის კაპიტანი და შეტევის ერთ-ერთი ლიდერი, თუმცა ეს შესაძლებლობას მისცემს სხვა მოთამაშეებს. მაგალითად, გოგლიჩიძეს, რომელსაც ადრეც შეეძლო სასტარტოში თამაშის დაწყება, მაგრამ ტრავმა მიიღო. ველოდები მის თამაშს, რადგან ის, რაც ემპოლიში აჩვენა ბოლო ექვსი თვის განმავლობაში საკმაოდ შთამბეჭდავი იყო. სომხეთთან პირველ მატჩში გუნდს ოთარ კიტეიშვილი უკაპიტნებს. ბევრი დისკუსია გვქონდა და ჩემთვის ეს საუკეთესო არჩევანია, რადგან ის კლუბშიც კაპიტანია, იცის რას ნიშნავს ეს როლი და როგორ უნდა მოიქცეს მოედანზე. ოთარ კიტეიშვილი ძალიან მნიშვნელოვანი ფეხბურთელია ჩვენთვის და ფეხბურთელები მას დიდ პატივს სცემენ.ხვიჩა კვარაცხელია უნიკალური ფეხბურთელია, რომლის შეცვლა ძალიან რთულია. მისი არყოფნა მისცემს შესაძლებლობას სხვა ფეხბურთელებს, მაგალითად ჩაკვეტაძეს და დავითაშვილს, მეტი პასუხისმგებლობა გამოავლინონ და ინიციატივა საკუთარ თავზე აიღონ. ლაცაბიძე ნიჭიერი ახალგაზრდა ფეხბურთელია. ვფიქრობ, თუ შრომა გააგრძელა ის ამ ნაკრების მომავალი იქნება. თუ სამომავლოდ მისი გამოყენება მსურს, უფრო ხშირად უნდა ვნახო საქმეში. ივნისში ეს არ მოხერხდება, რადგან ახალგაზრდულ ნაკრებს ევროპის ჩემპიონატი აქვს და სწორედ ამიტომ გამოვიძახე ახლა.  ახალგაზრდული ნაკრების სამწვრთნელო შტაბთან კარგი კომუნიკაცია გვაქვს. რა თქმა უნდა, პრიორიტეტი ყოველთვის ეროვნული ნაკრებია, თუმცა ამ ზაფხულს, ივნისში, პრიორიტეტული ახალგაზრდული ნაკრები იქნება. ახალგაზრდა მოთამაშეებისთვის მნიშვნელოვანია ასეთი დონის ტურნირებზე თამაში, რადგან იქ მიღებული გამოცდილება, ძალიან მნიშვნელოვანი იქნება ეროვნული გუნდისთვის.ჩვენი საოცარი გულშემატკივრების და  მოტივირებული და ძლიერი ფეხბურთელების გარეშე ვერასდროს მივაღწევდით იმას, რასაც მივაღწიეთ. ერთმანეთთან დაკავშირებულები ვართ. ძალიან ვაფასებ, რასაც ჩვენთვის აკეთებენ, როგორც საქართველოში, ისე გასვლით თამაშებზე". ალექსანდრე იაშვილი (სფფ-ის ვიცე-პრეზიდენტი): "ჩვენთვის ძალიან მნიშვნელოვანია დინამო არენაზე დაბრუნება. პრინციპული მატჩები გველის, რადგან B ლიგაში დარჩენა და ძლიერ მეტოქეებთან თამაში მნიშვნელოვანია ნაკრების განვითარებისთვის. ამიტომ, წარმატებული თამაში მნიშვნელოვანია და დინამო არენაზე შეკრებული გულშემატკივარი დიდი ძალაა ჩვენთვის. საბერძნეთთან გამარჯვების შემდეგ, დინამო არენაზე პირველად ვითამაშებთ და ამ სტადიონზე დაბრუნება გვახარებს. ჩვენთვის მნიშვნელოვანია კარგი კომუნიკაცია ეროვნულ და ახალგაზრდულ ნაკრებებს შორის. 2023 წლის ევროპის ჩემპიონატის დაწყებამდე, ეროვნულ ნაკრებსაც ოფიციალური მატჩები ჰქონდა და ფეხბურთელები ახალგაზრდულ ნაკრებს შოტლანდიასთან მატჩის შემდეგ შეუერთდნენ. ახლა კი, ზაფხულში ეროვნულ გუნდს მხოლოდ ამხანაგური მატჩები აქვს. ჩვენთვის მნიშვნელოვანია, რომ ევროპის ჩემპიონატზე წარმატებით ვიასპარეზოთ".საქართველო - სომხეთის პირველი მატჩი 20 მარტს, ერევანში გაიმართება, საპასუხო შეხვედრა 23 მარტს, თბილისში შედგება.

თბილისის ახალი ზოოპარკის მშენებლობის დასრულების თარიღი ისევ უცნობია. როგორც „ბიზნესპრესნიუსთან“ საუბრისას ზოოპარკის დირექტორი ზურაბ გურიელიძე აცხადებს, მიუხედავად ამისა, ახალ ზოოპარკში ცხოველების ნაწილი უკვე გადაყვანილია.„ახალი ზოოპარკის მშენებლობა მიმდინარეობს, მაგრამ როდის დასრულდა მშენებლობა ზუსტი ინფორმაცია ჯერ არ მაქვს. ამ ეტაპზე ახალ ზოოპარკში გარკვეული სახეობის ცხოველები უკვე იმყოფებიან, მათ შორის, მგლები, დათვები, ირმები, ნიამორები, ორი სახეობის ჯიხვი, აფრიკული მოხატული ძაღლები და ერთი აქლემი“, - განაცხადა გურიელიძემ.ახალი ვოლიერი შენდება ლომის ბოკვერისთვის, რომელიც საზოგადოების ყურადღების ცენტრში მას შემდეგ მოექცა, რაც ორგზის ოლიმპიურმა ჩემპიონმა ძიუდოში, ლაშა ბექაურმა მასთან ერთად გადაღებული ვიდეო “ინსტაგრამზე“ გამოაქვეყნა, მოგვიანებით კი ის თბილისის ზოოპარკში მიიყვანა.„ამ ბოკვერისთვის ვაშენებთ ახალ ვოლიერს სხვა ლომებთან მისი გადაყვანა არ მომხდარა. ზოოპარკში მყოფ ლომებთან მისი გადაყვანა ვერ მოხდება, რადგან ლომებისთვის სხვა ბოკვერის მიღება ცოტა რთული საკითხია, ამიტომ ვაპირებთ სხვა ლომების ჩამოყვანას, მაგრამ ჯერ ველოდებით პასუხებს“, - განაცხადა გურიელიძემშეგახსენებთ, რომ თბილისის ზოოპარკის გადატანის საჭიროება ჯერ კიდევ 2009 წელს, გმირთა მოედანზე ესტაკადის აშენებისას დადგა. მას შემდეგ კი, რაც 2015 წლის 13 ივნისს თბილისში სტიქია მოხდა, ზოოპარკის ქვედა ნაწილი მთლიანად განადგურდა. სტიქიიდან 3 თვეში ზოოპარკმა მუშაობა განაახლა, თუმცა, პარალელურად თბილისის ზღვის მიმდებარე ტერიტორიაზე, დაახლოებით 48 ჰექტარზე ახალი ზოოპარკის მოწყობის პროექტი დაიწყო. იყო საუბარი, რომ პროექტი 2018 წლის ბოლოს დასრულდებოდა და ზოოპარკი დამთვალიერებლებს ახალ მისამართზე 2018 წლის ბოლოს მიიღებდა. თუმცა პროცესი დროში იწელება. მთავარი მიზეზი კი, ფინანსების სიმწირეა.აღსანიშნავია, რომ ახალი ზოოპარკი ძველისგან განსხვავებული კონცეფციით შენდება და ის დაყოფილია ბიოგეოგრაფიული ზონების მიხედვით, ცალკე იქნება გამოყოფილი კავკასიის რეგიონი, ცალკე აზიის, აფრიკის და ა.შ.

2024 წლის წარმატებული კამპანიის შემდეგ, რომლის დროსაც საქართველომ მოცვი დიდ ბრიტანეთში, გერმანიაში, ნიდერლანდებში, პოლონეთში, დუბაისა და რუსეთში გაიტანა, მოცვის ქართველი მწარმოებლები ევროპაში, ასევე, ახლო აღმოსავლეთისა და აზიის სხვა ბაზრებზე ექსპორტის გაფართოებას გეგმავენ.ამის შესახებ EastFruit საქართველოს მოცვის მწარმოებელთა ასოციაციაზე დაყრდნობით წერს.ასოციაციის ცნობით, წელს წარმოების 7,000–8,000 ტონამდე ზრდა არის პროგნოზირებული. წარმოება მას შემდეგ გაიზარდა, რაც 2023 და 2024 წლებში ჩილესა და პერუში გაცნობითი მისიები შედგა, რომლის დროსაც ქართველმა ფერმერებმა წარმოების მეთოდებისა და პროდუქციის შორი ტრანსპორტისთვის მომზადების შესახებ მეტი ინფორმაცია მიიღეს.ამჟამად მოცვის პლანტაციები 3000 ჰექტარს შეადგენს, თუმცა უმეტესობა ჯერ კიდევ ახალგაზრდა, სამიდან ოთხ წლამდე ასაკის ნერგია და წარმოება სრული სიმძლავრით ჯერ ვერ მუშაობს. თუმცა ასოციაცია 2028 წლისთვის ქვეყნის მასშტაბით 20,000–25,000 ტონა მოცვის წარმოებას პროგნოზირებს.ევროკავშირში ექსპორტის გაფართოების გარდა, ასოციაცია მიზნად ისახავს ინდოეთში, ისრაელსა და საუდის არაბეთში მიწოდების დაწყებას. კიდევ ერთი გრძელვადიანი სამიზნე ჩინეთია, რისთვისაც ჯერ ფიტოსანიტარიული ოქმების შეთანხმება არის საჭირო.ასოციაციის შეფასებით, მოცვის სექტორში საქართველოს პოტენციალის გასაღები უნიკალური საექსპორტო ფანჯარაა, რომელიც ევროპისა და მეზობელი ქვეყნების მსხვილი მწარმოებლებისგან კონკურენციას გამორიცხავს. კერძოდ, ქართული მოცვი მაისიდან ივლისის დასაწყისამდე მოდის და ბაზარზე მაშინ შედის, როცა მაროკო და ესპანეთი ბოლო მოსავალს აგროვებენ. ამასთან, სერბეთი ქართული მოცვის წარმოების დაწყებიდან, დაახლოებით, 12-14 დღის შემდეგ იწყებს მიწოდებას, რომელსაც რუმინეთი მოსდევს, ხოლო პოლონეთი ბაზარზე ივნისის ბოლო-ივლისის დასაწყისში ჩნდება.საქართველოს კიდევ ერთი უპირატესობა, ზღვის დონიდან დაწყებული 1000 მეტრ სიმაღლემდე დამთავრებული, მოცვის მოშენების პირობების ფართო სპექტრია. ეს ქვეყანას საშუალებას აძლევს, წარმოება ღია გრუნტზე მაისიდან სექტემბრამდე გააფართოოს, ხოლო დაცულ გრუნტზე წარმოება ორი კვირით ადრე იწყება.ასოციაციის შეფასებით, საქართველო საერთაშორისო ბაზრებზე შესაძლოა, მოცვის მეტად ღირებულ მიმწოდებლად იქცეს, რადგან ევროპასა და აზიას შორის მდებარეობს. კერძოდ, პროდუქცია ავიამიწოდებით, მაგალითად, დუბაიმდე 3,5 საათში, ხოლო ინდოეთში სულ რაღაც 5 საათში ჩავა.რაც შეეხება ჯიშებს, ქართველი მეწარმეები ამჟამად ახლებზე არიან კონცენტრირებული, როგორიც არის Fall Creek და Sekoya, ხოლო ძველი, მათ შორის, Star-ის ჯიშები ადრეული წარმოებისთვის გამოიყენება.

„საქსტატის“ მონაცემებით, 2025 წლის თებერვალში, გასული წლის ანალოგიურ პერიოდთან შედარებით რესტორანში სადილი 3.94%-ით გაძვირდა.ამასთან, გაძვირებულია ხინკლის ღირებულებაც. უფრო კონკრეტულად, რესტორანში ხინკლის ფასი თებერვალში წლიურად 13.73%-ით გაძვირდა.როგორ შეიცვალა ხინკლის, ლუდის, ხაჭაპურის ფასებიამავე მონაცემების მიხედვით, გაზრდილია იმ ინგრედიენტების ღირებულებაც, რომელიც ხინკლის მომზადებას სჭირდება. კერძოდ, საანგარიშო პერიოდში: ძროხის ხორცის ფარში - 2.5%-ით გაძვირდა, ძროხის ხორცი - 2,37%-ით, მწვანილი - 45.84%-ით, ხახვი - 8.52%-ით; ფქვილი - 1.76%-ით არის გაძვირებული. თუმცა, გაიაფებულია ღორის ხორცი - 3,61%-ით.ამასთან, აღსანიშნავია, რომ 2025 წლის თებერვალში წინა წლის ანალოგიურ პერიოდთან შედარებით, 2.99%-ით გაძვირდა - კაფეში ხაჭაპური; 4.09%-ით გაიზარდა - ხაჭაპურის ფასი საცხობში; 9.18%-ით - გაძვირდა ლუდი ბარში; ხოლო ყავა კაფეში - 6.29%-ით არის წლიურად გაძვირებული.ცნობისთვის, მიმდინარე წლის თებერვალში წინა თვესთან შედარებით ინფლაციის დონემ საქართველოში 0.4 პროცენტი, ხოლო წლიური ინფლაციის დონემ 2.4 პროცენტი შეადგინა. რაც შეეხება საბაზო ინფლაციას, საქსტატის მონაცემებით, აღნიშნულმა მაჩვენებელმა 2025 წლის თებერვალში, გასული წლის შესაბამის პერიოდთან შედარებით 2.1 პროცენტი შეადგინა, ხოლო თამბაქოს გარეშე წლიური საბაზო ინფლაციის მაჩვენებელი 2 პროცენტით განისაზღვრა.

ტრანსპორტისა და საგზაო უსაფრთხოების საკითხების ექსპერტის, ფონდ „პარტნიორობა საგზაო უსაფრთხოებისთვის“ დირექტორის, ირაკლი იზორიას განცხადებით, სავარაუდოდ, ძალიან მალე იქნება მოთხოვნა, რომ საქალაქთაშორისო გადამყვან სატრანსპორტო საშუალებებზე სიჩქარის შემზღუდველი მოწყობილობა დამონტაჟდეს.ამასთან, როგორც მან მედიაჰოლდინგ „კვირის“ პრესკლუბში აღნიშნა, ახალი ცვლილებებით, მძღოლები ვალდებულებას იღებენ, ყოველ ნახევარ წელიწადში ერთხელ წარმოადგინონ როგორც ნარკოლოგიური შემოწმების დამადასტურებელი, ასევე ჯანმრთელობის ცნობა.„მძღოლებს წელიწადში სამედიცინო შემოწმება მოუწევთ“„წლებია საუბარი მიმდინარეობს ავტოსადგურებისა და საქალაქთაშორისო გადაყვანის გაუმჯობესების მიმართულებით. საბედნიეროდ, უკვე მიღებული გვაქვს გარკვეული კანონმდებლობა და რეგლამენტი იმასთან დაკავშირებით, რომ ამ მიმართულებით გაუმჯობესება გვქონდეს. კერძოდ, ავტოსადგურების რეგულაციების წესებში შემოდის ახალი ცვლილებები. მაგალითად, 1-ელი მარტიდან უკვე მოთხოვნაში არის სამედიცინო შემოწმების მიმართულება, ასევე მძღოლები ვალდებულებას იღებენ, ყოველ ნახევარ წელიწადში ერთხელ წარმოადგინონ ნარკოლოგიური შემოწმების და ჯანმრთელობის ცნობა. მნიშვნელოვანია, ასევე სახმელეთო ტრანსპორტის სააგენტოს მიერ მოხდეს ამ რეგულირების და აღმოჩენის ხარვეზის მონიტორინგი. წინა კანონმდებლობით, ამის შესაძლებლობას საქართველოს კანონი არ იძლეოდა, მოსამართლის ბრძანებულება იყო საჭირო, რომ სახმელეთო ტრანსპორტის სააგენტოს თანამშრომელს შეემოწმებინა ადგილზე ავტოსადგური. თუმცა, დღევანდელი კანონმდებლობით, ეს სავალდებულო აღარ არის“, - განაცხადა ირაკლი იზორიამ.მისი განმარტებით, ახალი კანონი ასევე, ითვალისწინებს გარკვეული წესების შემოღებას საგზაო უსაფრთხოებასთან დაკავშირებით.„კერძოდ, ვეღარ განახორციელებს 150 კმ-ზე უფრო შორ მანძილზე სამარშრუტო ტაქსი გადაყვანას. მხოლოდ და მხოლოდ იქნება ევრო 4-ის სტანდარტის ავტობუსები, მაღალგაბარიტიანი. ეს ავტობუსი არ უნდა იყოს 20 წელზე მეტი ხნის და ტექნიკურად გამართული უნდა იყოს. ალბათ, ძალიან მალე იქნება მოთხოვნა, რაც ბევრ ევროპულ ქალაქში არის, ეს არის სიჩქარის შემზღუდველი მოწყობილობის დაყენება საქალაქთაშორისო გადამყვან სატრანსპორტო საშუალებებზე“,  - განაცხადა ირაკლი იზორიამ.როგორც მან აღნიშნა, ხშირად მძღოლები სიჩქარეს აჭარბებენ, რის გამოც აუცილებელია ასეთი მოწყობილობის დაყენება, რაც რეალურად, ავტოსაგზაო შემთხვევებს შეამცირებს. ამასთან, როგორც ირაკლი იზორიამ განმარტა, ევროკავშირის დირექტივებით, დაახლოებით 4-5 საათის შემდეგ, აუცილებლად უნდა გაჩეროს მძღოლმა ავტომობილი და შეისვენოს, რომ მან სრულფასოვნად შეძლოს ავტომობილის მართვა.„გარკვეული ტექნიკური რეგლამენტის შესაბამისად, მოთხოვნილი იქნება ბაქნები, სამედიცინო ოთახი, ბავშვთა და დედათა ოთახი. ასევე, მძღოლთა მოსასვენებელი ოთახი. ასევე, უნდა მოხდეს ტექნიკური შემოწმება ყოველი რეისის გასვლის წინ. მნიშვნელოვანია ასევე, მძღოლთა გადამზადების თემა. აუცილებელი იქნება მძღოლებისთვის სპეციალური ინსტრუქტაჟის, ტრენინგების ჩატარება, რომ მაქსიმალურად შევამციროთ გზებზე სიკვდილიანობა, რაც რეალურად, საქართველოში გვაქვს“, - განაცხადა ირაკლი იზორიამ.